દેવભૂમિ દ્વારકા જિલ્લામાં ગેરકાયદેસર માછીમારી સામે કડક વલણ અપનાવતા પોલીસે મોટી કાર્યવાહી હાથ ધરી છે. ઓખામઢી નજીકના દરિયામાં લાઇન ફિશીંગ કરતા માછીમારો સામે દેવભૂમિ દ્વારકા SOGએ લાલ આંખ દેખાડી છે. ખાસ ઓપરેશન ચલાવીને SOGએ એકસાથે 55 માછીમારી બોટોને ઝડપી પાડી કાયદેસરની કાર્યવાહી શરૂ કરી છે.
સમુદ્રમાં 8 નોટીકલ માઈલ દૂર ચાલતી ગેરકાયદેસર પ્રવૃત્તિ
મળતી માહિતી અનુસાર, દેવભૂમિ દ્વારકા SOGને બાતમી મળી હતી કે ઓખામઢીથી પશ્ચિમ તરફ આશરે 8 નોટીકલ માઈલ દૂર દરિયામાં મોટી સંખ્યામાં માછીમારો લાઇન ફિશીંગ કરી રહ્યા છે.આ માહિતીના આધારે SOGએ તાત્કાલિક ટીમ બનાવી અને દરિયામાં રેડ યોજી. તપાસ દરમિયાન જાણવા મળ્યું કે માછીમારો અલગ-અલગ ચાર જૂથમાં વહેંચાઈને ગેરરીતિથી લાઇન ફિશીંગ કરી રહ્યા હતા.
ચાર ગૃપમાં સંકલિત રીતે ચાલતી માછીમારી
SOGના અધિકારીઓના જણાવ્યા મુજબ, કુલ 55 બોટો ચાર જુદા-જુદા ગૃપમાં વહેંચાઈને સંકલિત રીતે માછીમારી કરી રહી હતી. આ પ્રકારની લાઇન ફિશીંગ પદ્ધતિથી મોટા પ્રમાણમાં માછલીઓ ઝડપાઈ જાય છે, જેના કારણે સમુદ્રી પર્યાવરણ પર ગંભીર અસર પડે છે.આથી, આવા પ્રકારની માછીમારીને નિયંત્રણમાં રાખવા માટે નિયમો બનાવવામાં આવ્યા છે. તેમ છતાં કેટલાક માછીમારો આ નિયમોની અવગણના કરીને ગેરકાયદેસર રીતે માછીમારી કરતા હોવાનું સામે આવ્યું છે.
એકસાથે 55 બોટ ઝડપાતા માછીમારોમાં હડકંપ
SOGની આ અચાનક કાર્યવાહીથી દરિયામાં હાજર માછીમારોમાં હડકંપ મચી ગયો હતો. અનેક બોટો ભાગવાનો પ્રયાસ પણ કર્યો હતો, પરંતુ SOGની ટીમે ઘેરાબંધી કરીને તમામ બોટોને ઝડપી પાડી.આ કામગીરી દરમિયાન SOGએ તમામ બોટોને કબ્જે લઈને આગળની તપાસ શરૂ કરી છે. માછીમારો પાસેથી જરૂરી દસ્તાવેજો, લાઇસન્સ અને પરમિટ અંગે પણ પૂછપરછ કરવામાં આવી રહી છે.
લાઇન ફિશીંગ પર પ્રતિબંધ કેમ?
લાઇન ફિશીંગ (Longline Fishing) એક એવી પદ્ધતિ છે જેમાં લાંબી દોરી પર અનેક હૂક લગાવીને એકસાથે મોટી સંખ્યામાં માછલીઓ પકડવામાં આવે છે. આ પદ્ધતિના કારણે:
-
નાના અને મોટા તમામ પ્રકારની માછલીઓ ઝડપાઈ જાય છે
-
સમુદ્રી જીવસૃષ્ટિ પર નકારાત્મક અસર પડે છે
-
માછીમારીના કુદરતી સંતુલન પર ખલેલ પડે છે
