ગુજરાતના ખેડૂત માટે આજે ફરી એક ઐતિહાસિક દિવસ બની રહ્યો છે. અણધારી આફત અને કમોસમી વરસાદના કારણે નુકશાન ભોગવનારા ખેડૂતોના દુઃખમાં ભાગીદાર બનીને તેમને સધિયારો આપવા રાજ્ય સરકારે મુખ્યમંત્રી શ્રી ભૂપેન્દ્રભાઈ પટેલના માર્ગદર્શન હેઠળ રૂ. 10,000 કરોડનું વિશાળ કૃષિ રાહત પેકેજ જાહેર કર્યું છે. આ પેકેજની જમીનસ્તર પર અમલી પ્રક્રિયા કેવી રીતે આગળ વધી રહી છે તે જાણવા અને ખેડૂતોને પ્રોત્સાહન આપવા માટે કૃષિ મંત્રી શ્રી જીતુભાઈ વાઘાણી આજે ગાંધીનગર જિલ્લાના દહેગામ તાલુકાના નાંદોલ ગામ અને ગાંધીનગર તાલુકાના વીરા તલાવડી ગામની મુલાકાતે પહોંચ્યા હતા.
ખેડૂતો વચ્ચે પહોંચ્યા મંત્રીશ્રી — ખેતરમાં જઈને લીધો વાસ્તવિક અહેવાલ
મંત્રીશ્રી વાઘાણીએ પ્રથમ નાંદોલ ગામના અસરગ્રસ્ત ખેતરોની મુલાકાત લીધી. કમોસમી વરસાદના કારણે પાણી ભરાયેલા ખેતરોમાં સ્વયં ઉતરીને પાકની હાલત નિરીક્ષણ કરી તેમણે ખેડૂતો સાથે સીધો સંવાદ કર્યો. ખેતરમાં હાજર ખેડૂતોએ મંત્રીએ આગળ પોતાનો દુઃખ અને નુકશાનની વાત કરી, જેમાં મોટાભાગે ખેડૂતોનો પાક બગડેલો અથવા સંપૂર્ણ નાશ પામેલો હોવાનું જણાયું.
મંત્રીશ્રીએ ખેડૂતોને ખાતરી આપી કે “આ વખતે રાજ્ય સરકાર તમારા દરેક ઘરમાં પહોંચશે. એકપણ ખેડૂત સહાયથી વંચિત નહીં રહે. સરકાર તમને પડખે છે અને તમારું નુકશાન પૂરુ કરવા માટે પ્રતિબદ્ધ છે.”
ઇતિહાસમાં પ્રથમવાર — 16,000થી વધુ ગામોમાં પંચ રોજકામ દ્વારા સહાય
કૃષિ મંત્રીશ્રીએ જણાવ્યું કે, “ગુજરાતના ઇતિહાસમાં પહેલીવાર 16,000થી વધુ ગામોમાં સરકાર સીધી ગ્રામ પંચાયત કચેરીમાં જઈને ખેડૂતોની વિગતો લઈ રહી છે. પંચ રોજકામ દ્વારા જ જે પાકની માહિતી ખેડૂતો આપશે, તેના આધારે સહાય પૂરી પાડવામાં આવશે.” તેમણે ઉમેર્યું કે આ યોજના કોઈ મર્યાદા વિના છે — કોઈ કેટલા પણ એકર ધરાવતા હોય, તેમને સહાય મળશે.
ખેડૂતોને સધિયારો આપતી સહાનુભૂતિપૂર્ણ સરકાર
મંત્રીશ્રીએ સ્પષ્ટ શબ્દોમાં કહ્યું કે દુઃખની આ ઘડીમાં રાજ્ય સરકારે વાદ-વિવાદ કે રાજકારણથી પર રહીને માત્ર અને માત્ર ખેડૂતોના હિતને જ પ્રાધાન્ય આપ્યું છે. “આ સરકારે કામ શબ્દોથી નહીં, કૃત્યોથી સાબિત કર્યું છે કે ધરતીપુત્રો માટે તે ખરા અર્થમાં સમર્પિત છે,” એમ વાઘાણીએ કહ્યું.
તેમણે કહ્યું કે વડાપ્રધાન શ્રી નરેન્દ્રભાઈ મોદી જ્યારે ગુજરાતના મુખ્યમંત્રી હતા, ત્યારથી જ તેમણે ખેડૂતોના કલ્યાણ માટે અનેક નવીન યોજનાઓ અમલમાં મૂકી હતી. આજ પણ મુખ્યમંત્રી શ્રી ભૂપેન્દ્રભાઈ પટેલ તે જ વિઝનને આગળ લઈ જઈ રહ્યા છે. “ખેડૂત સમૃદ્ધ બનશે તો જ ગુજરાત સમૃદ્ધ બનશે,” એમ મંત્રીશ્રીએ કહ્યું.
વીરા તલાવડી ગામના ખેડૂતોમાં ઉત્સાહ
નાદોલ બાદ કૃષિ મંત્રીશ્રી વીરા તલાવડી ગામ પહોંચ્યા, જ્યાં ખેડૂતોની ભીડ તેમને મળવા ઉમટી પડી હતી. મંત્રીશ્રીએ ગામના ખુલ્લા મેદાનમાં આયોજિત ખેડૂતોના સભામાં સંબોધન કર્યું. તેમણે કહ્યું કે ગુજરાતની આ ધરતી પર મહેનતુ ખેડૂતોના પરસેવે સુખાકારીનું બીજ વાવવામાં આવ્યું છે. આજે જ્યારે પ્રકૃતિએ અણધાર્યો આઘાત આપ્યો છે, ત્યારે રાજ્ય સરકાર ખેડૂતોને એકલા છોડશે નહીં.
આ પ્રસંગે ગામના ખેડૂત ભાણાભાઈ પટેલે કહ્યું કે, “અમે આટલો મોટો પેકેજ ક્યારેય સાંભળ્યો ન હતો. સરકારએ અમારો અવાજ સાંભળ્યો છે અને આ સહાય અમને ફરી ખેતરમાં કામ કરવા માટે શક્તિ આપશે.”
રૂ. 10,000 કરોડના રાહત પેકેજની વિગતો
મંત્રીશ્રીએ સમજાવ્યું કે આ પેકેજ હેઠળ પાકની નુકશાનની તીવ્રતા અનુસાર સીધી નાણાકીય સહાય આપવામાં આવશે. જિલ્લા તંત્ર દ્વારા ખેડૂતોના પાકનું મૂલ્યાંકન થઈ રહ્યું છે. સહાયની રકમ સીધી ખેડૂતોના બેંક ખાતામાં જમા કરવામાં આવશે જેથી પારદર્શિતા જળવાઈ રહે.
આ ઉપરાંત તાત્કાલિક ખેતી માટે જરૂરી બીજ, ખાતર અને ટેકનિકલ માર્ગદર્શન પણ કૃષિ વિભાગ દ્વારા પૂરી પાડવામાં આવશે. રાજ્ય સરકારના આ પેકેજથી અંદાજે 30 લાખથી વધુ ખેડૂતોને લાભ થવાની શક્યતા છે.
લોકપ્રતિનિધિઓએ વ્યક્ત કર્યો આભાર
આ પ્રસંગે ગાંધીનગર દક્ષિણના ધારાસભ્ય શ્રી અલ્પેશ ઠાકોરે જણાવ્યું કે, “કમોસમી વરસાદે ખેડૂતોને ભારે નુકશાન પહોંચાડ્યું છે, પરંતુ સરકારે આ પીડા સમજીને જે રીતે ઉદારતમ પેકેજ જાહેર કર્યું છે તે પ્રશંસનીય છે. આ નિર્ણયથી ખેડૂતોમાં વિશ્વાસ અને નવી આશા જાગી છે.”
દહેગામના ધારાસભ્ય શ્રી બલરાજસિંહ ચૌહાણે પણ મંત્રીશ્રીએ લીધેલા સંકલ્પની પ્રશંસા કરતાં કહ્યું કે, “ખેડૂત ગુજરાતની રીડ છે. સરકાર તેમના દુઃખમાં ભાગીદાર બનીને જ પોતાના ધ્યેયને સિદ્ધ કરી શકે છે. આજે જે રીતે મંત્રીશ્રીએ સીધા ખેતરમાં જઈને ખેડૂતો સાથે વાત કરી તે અનોખું દૃશ્ય છે.”
