અમદાવાદ:
અમદાવાદના નરેન્દ્ર મોદી સ્ટેડિયમ (મોટેરા) ખાતે 19 ડિસેમ્બર, 2025ના રોજ ભારત અને દક્ષિણ આફ્રિકા (IND vs SA) વચ્ચેની T20 ક્રિકેટ મેચ યોજાવાની છે. આ મેચ દરમિયાન મોટી સંખ્યામાં દર્શકો ઉમટવાની શક્યતા હોવાથી શહેર ટ્રાફિક પોલીસ દ્વારા ટ્રાફિક વ્યવસ્થા જાળવવા માટે મહત્વપૂર્ણ જાહેરનામું બહાર પાડવામાં આવ્યું છે.ટ્રાફિકના સરળ સંચાલન અને જાહેર સલામતીને ધ્યાનમાં રાખીને મોટેરા વિસ્તારમાં કેટલાક મુખ્ય માર્ગો પર અવરજવર પર પ્રતિબંધ મુકવામાં આવશે.
આ રસ્તા રહેશે બંધ
ટ્રાફિક પોલીસ દ્વારા આપવામાં આવેલી માહિતી મુજબ,જનપથ ટીથી મોટેરા સ્ટેડિયમના મેઈન ગેટ સુધી, ત્યારબાદ કૃપા રેસિડેન્સી ટીથી મોટેરા ગામ ટી સુધીના માર્ગ પર તમામ પ્રકારની વાહન અવરજવર પર પ્રતિબંધ રહેશે.આ પ્રતિબંધ મેચના સમયગાળા દરમિયાન લાગુ રહેશે જેથી સ્ટેડિયમ સુધી પહોંચતા વાહનોને નિયંત્રિત કરી શકાય અને ભીડને સંભાળી શકાય.
કોને આ જાહેરનામું લાગુ પડશે નહીં?
જાહેરહિતને ધ્યાનમાં રાખીને કેટલીક સેવાઓ અને વ્યક્તિઓને આ પ્રતિબંધમાંથી મુક્તિ આપવામાં આવી છે. આ જાહેરનામું નીચે દર્શાવેલ પર લાગુ પડશે નહીં:
-
બોર્ડ (BCCI) અને ક્રિકેટ મેચ સાથે જોડાયેલા અધિકૃત વાહનો
-
ક્રિકેટ મેચ સાથે સંકળાયેલા વાહનો
-
ફરજમાં રોકાયેલા સરકારી વાહનો
-
ફાયર બ્રિગેડ અને એમ્બ્યુલન્સ સહિતના ઇમરજન્સી વાહનો
-
આકસ્મિક સંજોગોમાં અવરજવર કરનાર વ્યક્તિઓ
-
પ્રતિબંધિત વિસ્તારમાં વસવાટ કરતા સ્થાનિક રહેવાસીઓ
જાહેરનામું લાગુ રહેવાનો સમયગાળો
ટ્રાફિક પોલીસ દ્વારા જાહેર કરાયેલ આ પ્રતિબંધ:
19 ડિસેમ્બર, 2025ના બપોરના 3 વાગ્યાથી
20 ડિસેમ્બર, 2025ના રાત્રિના 2 વાગ્યા સુધી લાગુ રહેશે.
આ સમયગાળા દરમિયાન સામાન્ય નાગરિકોને પ્રતિબંધિત માર્ગોનો ઉપયોગ ન કરવા અપીલ કરવામાં આવી છે.
વાહનચાલકો માટે વૈકલ્પિક માર્ગો
ટ્રાફિકમાં અસુવિધા ન થાય તે માટે પોલીસે વૈકલ્પિક માર્ગોની વ્યવસ્થા પણ જાહેર કરી છે:
➡️ તપોવન સર્કલથી ONGC ચાર રસ્તા → વિસત ટી → પાવર હાઉસ ચાર રસ્તા → પ્રબોધ રાવળ સર્કલ તરફથી જત-આવત કરી શકાશે.
➡️ કૃપા રેસિડેન્સી ટી → શરણ સ્ટેટ્સ ચાર રસ્તા → ભાટ-કોટેશ્વર રોડ → એપોલો સર્કલ તરફ અવરજવર કરી શકાશે.
ટ્રાફિક પોલીસની અપીલ
અમદાવાદ ટ્રાફિક પોલીસે નાગરિકોને અપીલ કરી છે કે મેચના દિવસે બિનજરૂરી મુસાફરી ટાળે, સૂચિત વૈકલ્પિક માર્ગોનો ઉપયોગ કરે અને ટ્રાફિક પોલીસના માર્ગદર્શનનું પાલન કરે. સ્ટેડિયમ ખાતે આવનાર દર્શકોને સમયસર પહોંચવા માટે અગાઉથી આયોજન કરવા પણ વિનંતી કરવામાં આવી છે.ક્રિકેટપ્રેમીઓ માટે આ મેચ ઉત્સાહજનક હોવાની સાથે ટ્રાફિક વ્યવસ્થાનું પાલન કરવું પણ એટલું જ મહત્વપૂર્ણ હોવાનું પોલીસ તંત્રએ જણાવ્યું છે.
