મુંબઈ, તા. 15 જાન્યુઆરી 2026 (ગુરૂવાર):
મહારાષ્ટ્રમાં આજે યોજાઈ રહેલી બૃહન્મુંબઈ મ્યુનિસિપલ કૉર્પોરેશન (BMC)ની ચૂંટણી દરમિયાન લોકશાહી પ્રત્યેની અડગ નિષ્ઠાનું પ્રેરણાદાયી ઉદાહરણ સામે આવ્યું છે. સમય સંદેશ ન્યૂઝના રિપોર્ટર પારુલબેને તાજેતરમાં બ્રેસ્ટ કેન્સરની સર્જરી થયેલી હોવા છતાં પોતાના મતાધિકારનો સંપૂર્ણ ઉપયોગ કરીને એક જવાબદાર મુંબઈકરની ફરજ નિભાવી છે.
શારીરિક તકલીફ અને આરોગ્યની નાજુક સ્થિતિ વચ્ચે પણ પારુલબેન મતદાનમથકે પહોંચી મતદાન કર્યું, જે સમાજ માટે પ્રેરણાનું સ્ત્રોત બની રહ્યું છે. તેમણે સાબિત કરી બતાવ્યું કે મતદાન માત્ર અધિકાર નહીં પરંતુ લોકશાહીના મજબૂત પાયાનું મહત્વપૂર્ણ કર્તવ્ય છે.
મતદાન બાદ પારુલબેને મુંબઈના નાગરિકોને અપીલ કરતા જણાવ્યું હતું કે,
“લોકશાહીના આ પવિત્ર ઉત્સવમાં દરેક નાગરિકે ઉત્સાહપૂર્વક ભાગ લેવો જોઈએ. વધુમાં વધુ મતદાનથી જ આવનારા સમયમાં સુરક્ષિત, સ્વચ્છ અને વિકસિત મુંબઈનું નિર્માણ શક્ય બનશે.”
પારુલબેને ખાસ કરીને યુવા મતદારોને મતદાન માટે આગળ આવવાની અપીલ કરી હતી અને જણાવ્યું હતું કે એક-એક મત શહેરના ભવિષ્યને આકાર આપે છે.
આ સાથે સમય સંદેશ પરિવાર દ્વારા પણ મુંબઈના તમામ નાગરિકોને નમ્ર અપીલ કરવામાં આવી છે કે,
લોકશાહીને મજબૂત બનાવવા માટે ઘરમાં બેઠા ન રહેતા, અવશ્ય મતદાનમથકે જઈને પોતાના મતાધિકારનો ઉપયોગ કરો.
પારુલબેનની હિંમત, સંઘર્ષ અને લોકશાહી પ્રત્યેની પ્રતિબદ્ધતા આજે મુંબઈ સહિત સમગ્ર રાજ્ય માટે પ્રેરણારૂપ બની છે.
