જિલ્લા કલેકટરશ્રી સુપ્રીત સિંઘ ગુલાટી, જિલ્લા વિકાસ અધિકારીશ્રી રમેશ મેરજા તથા જિલ્લા પોલીસ અધિક્ષકશ્રી અક્ષયરાજ મકવાણાની ઉપસ્થિતિમાં યોજાયો સમારોહ
પાટણ સિવિલ હોસ્પિટલ ખાતે કોરોના વેક્સીનના ૧૦૦ કરોડ ડોઝના સિમાચિહ્નની સિદ્ધિની ઉજવણી અંતર્ગત કોરોના વોરિયર્સનો સન્માન સમારોહ યોજાયો. જિલ્લા કલેકટરશ્રી સુપ્રીત સિંઘ ગુલાટી, જિલ્લા વિકાસ અધિકારીશ્રી રમેશ મેરજા તથા જિલ્લા પોલીસ અધિક્ષકશ્રી અક્ષયરાજ મકવાણાની ઉપસ્થિતિમાં વેક્સિનેશનની ઉત્તમ કામગીરી કરનાર આરોગ્યકર્મીઓનું સન્માન કરવામાં આવ્યુ હતું.
ગત તા.૧૬ જાન્યુઆરી, ૨૦૨૧થી દેશભરમાં શરૂ થયેલા કોરોના પ્રતિરોધક રસીકરણ અભિયાન અંતર્ગત અત્યાર સુધીમાં ૧૦૦ કરોડ ડોઝ આપવામાં આવ્યા છે. કોરોનાકાળ દરમ્યાન દર્દીઓની સારવાર અને રસીકરણ અભિયાન અંતર્ગત સતત કાર્યરત રહેલા હેલ્થકેર વર્કર્સની કામગીરીને બિરદાવવાના ભાગરૂપે પાટણ સિવિલ હોસ્પિટલ ખાતે સન્માન સમારોહ યોજાયો. જેમાં જિલ્લા કલેકટરશ્રી, જિલ્લા વિકાસ અધિકારીશ્રી, જિલ્લા પોલીસ અધિક્ષક શ્રી ઉપરાંત નાયબ પોલીસ અધિક્ષકશ્રીઓ દ્વારા પાટણ તથા ધારપુર જનરલ હોસ્પિટલના તબીબો તથા નર્સીંગ સ્ટાફ સહિતના આરોગ્યકર્મીઓનું પુષ્પગુચ્છ આપી સન્માન કરવામાં આવ્યું હતું.
આ પ્રસંગે જિલ્લા પોલીસ અધિક્ષકશ્રી અક્ષયરાજ મકવાણાએ જણાવ્યું હતું કે, દેશભરમાં કોરોના વેક્સીનના ૧૦૦ કરોડ ડોઝની સિદ્ધિમાં પાટણ જિલ્લાનું પણ યોગદાન છે. આજે જિલ્લામાં મહત્તમ રસીકરણ માટે સતત કાર્યરત આરોગ્યકર્મીઓનું વહિવટી તંત્ર તથા પોલીસ વિભાગ દ્વારા સન્માન કરવામાં આવ્યું છે. આગામી સમયમાં બાકી રહેલા નાગરિકોનું પણ ઝડપથી રસીકરણ પૂર્ણ કરી શકાય તે માટે તેમને પ્રોત્સાહન મળશે.
પાટણ સિવિલ હોસ્પિટલના વેક્સીનેશન વોર્ડ નજીક પોલીસ વિભાગ તથા મેડીકલ સ્ટાફ દ્વારા કોરોના રસીકરણના ૧૦૦ કરોડ ડોઝ થીમ પર રંગોળી તૈયાર કરવામાં આવી હતી. આ પ્રસંગે મુખ્ય જિલ્લા આરોગ્ય અધિકારી શ્રી ડૉ.એસ.એ.આર્ય, મુખ્ય જિલ્લા તબીબી અધિકારી શ્રી ડૉ. અરવિંદ પરમાર, ધારપુર જનરલ હોસ્પિટલના મેડીકલ સુપરિટેન્ડન્ટ શ્રી ડૉ. મનીષ રામાવત, નાયબ પોલીસ અધિક્ષકશ્રીઓ સહિતના ઉચ્ચ અધિકારીશ્રીઓ તથા પાટણ સિવિલ હોસ્પિટલનો સ્ટાફ ઉપસ્થિત રહ્યા હતા.
