આયુર્વેદ ફોર પીપલ એન્ડ પ્લેનેટ : ધ્રોલ ખાતે 10મા રાષ્ટ્રીય આયુર્વેદ દિવસ નિમિત્તે નિ:શુલ્ક મેગા આયુર્વેદ નિદાન અને સારવાર કેમ્પનો ભવ્ય આયોજાન

ધ્રોલ, તા. 23 સપ્ટેમ્બર — આરોગ્ય અને પરિવાર કલ્યાણ વિભાગ, ગાંધીનગર, નિયામકશ્રી આયુષની કચેરી તથા જિલ્લા આયુર્વેદ અધિકારી, જામનગરના માર્ગદર્શન હેઠળ ધ્રોલ ખાતે 10મા રાષ્ટ્રીય આયુર્વેદ દિવસની ભવ્ય ઉજવણી નિમિત્તે નિ:શુલ્ક મેગા આયુર્વેદ નિદાન અને સારવાર કેમ્પનું આયોજન ઉમા હોલ, ઉમિયા સોસાયટી ખાતે કરવામાં આવ્યું હતું. આ વર્ષનું કેન્દ્રિય સૂત્ર હતું – “Ayurveda for People and Planet”, જે અંતર્ગત સમાજના તમામ વર્ગો સુધી આયુર્વેદિક સારવાર પદ્ધતિ પહોંચે અને માનવી તથા પ્રકૃતિ વચ્ચેનો સંતુલિત સંબંધ મજબૂત બને તેવા ઉદ્દેશ્યથી વિવિધ કાર્યક્રમો યોજાયા હતા.

કેમ્પનું આયોજન અને ઉદ્દેશ્ય

આ કેમ્પનું આયોજન આયુષ્માન આરોગ્ય મંદિર, મોટા ઈટાળા તથા મેઘપરના સંયુક્ત ઉપક્રમે કરવામાં આવ્યું હતું. મુખ્ય ઉદ્દેશ્ય સામાન્ય નાગરિકોને આયુર્વેદ પદ્ધતિ દ્વારા સ્વસ્થ જીવનશૈલી અપનાવવા પ્રેરિત કરવાનો હતો. આજના સમયમાં, લોકો ઝડપી જીવનશૈલીમાં એલોપેથી દવાઓ પર આધારિત થઇ ગયા છે, પરંતુ પ્રકૃતિપ્રદત્ત આયુર્વેદિક ઉપચાર પદ્ધતિ લાંબા ગાળે માત્ર રોગ નાબુદ જ નથી કરતી પરંતુ શરીરની રોગપ્રતિકારક શક્તિ વધારી જીવનને દીર્ઘાયુ તથા તંદુરસ્ત બનાવે છે.

દર્દીઓનું નિદાન અને સારવાર

કેમ્પમાં જિલ્લા આયુર્વેદ અધિકારી ડો. હિરેન ઠક્કર, મોટા ઈટાળાના મેડિકલ ઓફિસર ડો. જીગ્નેશ સોનગરા અને મેઘપરના મેડિકલ ઓફિસર ડો. કશ્યપ ચૌહાણ દ્વારા મળીને 204 જેટલા દર્દીઓનું આયુર્વેદિક પદ્ધતિથી નિદાન કરવામાં આવ્યું.

દર્દીઓને નાડી પરીક્ષણ દ્વારા તેમના દોષ – વાયુ, પિત્ત, કફની સમતોલન સ્થિતિ વિશે માહિતી આપવામાં આવી.
વિવિધ દીર્ઘકાલીન રોગો જેમ કે સાંધાનો દુખાવો, માથાનો દુખાવો, પાચન તકલીફો, ત્વચા સંબંધિત સમસ્યાઓ, બ્લડ પ્રેશર, ડાયાબિટીસ, થાઇરોઇડ જેવી બીમારીઓ માટે આયુર્વેદિક દવાઓ આપીને સારવાર કરાઈ.
દર્દીઓને પથ્ય-અપથ્ય (Diet Plan) અંગે માર્ગદર્શન આપ્યું કે કયા ખોરાકથી રોગ વધી શકે છે અને કયા ખોરાકથી સ્વસ્થતા ઝડપી પ્રાપ્ત થઈ શકે.

ઉકાળાનું વિતરણ અને રોગપ્રતિકારક શક્તિનો વધારો

કેમ્પમાં 270 જેટલા લાભાર્થીઓને સ્વાસ્થ્યવર્ધક ઉકાળા તથા સંશમની વટીનું નિ:શુલ્ક વિતરણ કરાયું. આ ઉકાળો ખાસ કરીને ઋતુપરિવર્તન સમયે થતી સામાન્ય બીમારીઓ – સર્દી, ઉધરસ, તાવ, વાયરસ ઇન્ફેક્શન સામે શરીરને રક્ષણ આપે છે.
આયુર્વેદિક ઉકાળામાં તુલસી, આદુ, દાલચીની, લવંગ, લીંબુછાળો જેવી કુદરતી ઔષધિય સામગ્રીનો સમાવેશ કરાયો હતો, જેનાથી બાળકો, વૃદ્ધો તથા સ્ત્રીઓ માટે ખૂબ જ ફાયદાકારક સાબિત થાય છે.

જાગૃતિ અને પ્રચાર કાર્યક્રમો

કેમ્પ દરમિયાન માત્ર સારવાર જ નહીં પરંતુ જાગૃતિ પ્રવૃત્તિઓને પણ મહત્વ અપાયું.

સ્વસ્થવૃત્ત (Healthy Lifestyle) વિશે માર્ગદર્શન આપવા પત્રિકાઓ અને બેનરો પ્રદર્શિત કરવામાં આવ્યા.
મિલેટ્સના પોષણ મૂલ્ય અને આરોગ્યલક્ષી ફાયદાઓ અંગે લોકોને માહિતી આપવામાં આવી.
રસોડાના મસાલાઓ અને ઔષધિઓનો રોજિંદા જીવનમાં ઉપચાર રૂપે ઉપયોગ કેવી રીતે કરી શકાય તે અંગે વિશદ માહિતી આપવામાં આવી.
પુસ્તિકાઓનું વિતરણ કરી લોકોને આયુર્વેદ અને આહાર વચ્ચેના અવિનાશી સંબંધને સમજાવાયું.

વિશિષ્ટ મહેમાનોની હાજરી અને પ્રવચનો

આ કાર્યક્રમમાં અનેક અગ્રણીઓની ઉપસ્થિતિ નોંધાઈ.

ધારાસભ્ય મેઘજીભાઈ ચાવડાએ પોતાના પ્રવચનમાં જણાવ્યું કે “આયુર્વેદ માત્ર દવા નહીં પરંતુ જીવન જીવવાની એક પદ્ધતિ છે. જો આપણે આપણા આહાર અને જીવનશૈલીમાં નાના-નાના ફેરફારો કરીએ તો મોટા ભાગની બીમારીઓથી બચી શકીએ.” તેમણે મિલેટ્સ અને રસોડાના મસાલાઓને કુદરતી ઔષધિ તરીકે અપનાવવાની અપીલ કરી.
જિલ્લા આયુર્વેદ અધિકારી ડો. હિરેન ઠક્કરે જણાવ્યું કે “નાડી પરીક્ષણ એ આયુર્વેદનો પ્રાચીન અને વૈજ્ઞાનિક ઉપાય છે, જેનાથી શરીરના ત્રિદોષોનું સંતુલન જાણી યોગ્ય ઉપચાર મળી શકે છે.” તેમણે દર્દીઓને પથ્ય-અપથ્ય વિશે માર્ગદર્શન આપ્યું.
કાર્યક્રમમાં ધ્રોલ નગરપાલિકાના પ્રમુખ શ્રી વિનુભાઈ વાઘેલા, ઉપપ્રમુખ શ્રી રંજનબેન દલસાણીયા, કારોબારી અધ્યક્ષ શ્રી સુરેશભાઈ ગોસાઈ સહિતના અગ્રણીઓએ ઉપસ્થિત રહી પોતાના આશીર્વચન પાઠવ્યા.