જામનગર:
બાંગ્લાદેશમાં હિન્દુઓ પર થતા અત્યાચારના વિરોધમાં જામનગર શહેરમાં મોડી રાત્રે હિન્દુ સેના દ્વારા ઉગ્ર વિરોધ પ્રદર્શન કરવામાં આવ્યું હતું. આ પ્રદર્શન હિન્દુ સેના જામનગર શહેરના યુવા ઉપપ્રમુખ સાગર ચૌહાણની આગેવાનીમાં યોજાયું હતું, જ્યારે હિન્દુ સેના ગુજરાતના પ્રદેશ અધ્યક્ષ પ્રતિકભાઈ ભટ્ટની ઉપસ્થિતિ પણ નોંધપાત્ર રહી હતી.
પ્રાપ્ત માહિતી મુજબ, આશરે ૪૦ જેટલા હિન્દુ સેના કાર્યકરો જામનગર શહેરના વિક્ટોરિયા પુલ પાસે આવેલી નેતાજી સુભાષચંદ્ર બોઝની પ્રતિમા નજીક એકત્રિત થયા હતા. કાર્યકરો દ્વારા બાંગ્લાદેશમાં હિન્દુ સમાજ પર થઈ રહેલા કહેવાતા અત્યાચાર સામે ભારે આક્રોશ વ્યક્ત કરવામાં આવ્યો હતો.
પ્રદર્શન દરમિયાન કાર્યકરોએ રસ્તા પર બાંગ્લાદેશના રાષ્ટ્રધ્વજની આકૃતિ બનાવી તેના પર પગ મૂકીને સૂત્રોચાર કર્યા હતા. આ દરમિયાન “હિન્દુઓ પર અત્યાચાર બંધ કરો”, “બાંગ્લાદેશ સરકાર વિરોધી નારા” સહિતના સૂત્રોચારો કરવામાં આવ્યા હતા. ઘટનાને પગલે આસપાસના વિસ્તારમાં થોડા સમય માટે તણાવનું વાતાવરણ સર્જાયું હતું.
