ડાકોર રાજા રણછોડ બન્યા મોંઘા.

ધજા ચઢાવવાથી લઈને રાજભોગ અને તુલસી વિવાહ સુધી ભક્તોને હવે ચૂકવવી પડશે વધુ રકમ

પ્રસિદ્ધ યાત્રાધામ Ranchhodraiji Temple ખાતે મંદિર કમિટી દ્વારા વિવિધ મનોરથ અને ધાર્મિક સેવાઓના દરોમાં કરવામાં આવેલા ભારે વધારાને લઈને ભક્તોમાં ચર્ચા અને અસંતોષ બંને જોવા મળી રહ્યા છે. ડાકોર મંદિર કમિટીએ તાજેતરમાં જાહેર કરેલા નવા દરો અનુસાર હવે મંદિરના અનેક ધાર્મિક કાર્યક્રમો અને મનોરથો માટે ભક્તોને અગાઉ કરતાં ઘણી વધુ રકમ ચૂકવવી પડશે.

માહિતી અનુસાર મંદિરના શિખર પર ધજા ચઢાવવાનો પરંપરાગત મનોરથ, જે અગાઉ માત્ર રૂ.610માં પૂર્ણ થતો હતો, હવે તેના માટે ભક્તોને રૂ.2500 ચૂકવવા પડશે. એટલે કે એક જ ઝાટકે ચાર ગણાથી વધુ વધારો કરવામાં આવ્યો છે. આ નિર્ણયથી અનેક ભક્તોમાં આશ્ચર્ય સાથે નારાજગી પણ જોવા મળી રહી છે.

તે ઉપરાંત મંદિરની વિશેષ 52 ગજની ધજા માટે હવે રૂ.11,000નો ખર્ચ નક્કી કરવામાં આવ્યો છે. ઘણા ભક્તો વર્ષોથી પરિવારની સુખ-શાંતિ અને માન્યતાઓ મુજબ આ ધજા ચઢાવતા આવ્યા છે. પરંતુ નવા દરો લાગુ થતા હવે સામાન્ય અને મધ્યમવર્ગીય ભક્તો માટે આ મનોરથ કરવો મુશ્કેલ બની શકે છે તેવી ચર્ચા ચાલી રહી છે.

મંદિરમાં ભગવાનને અર્પણ કરવામાં આવતો રાજભોગ થાળ પણ હવે મોંઘો બન્યો છે. અગાઉ રૂ.3900માં થતો રાજભોગ હવે રૂ.9345માં કરવામાં આવશે. આ વધારો સીધો દોઢથી બે ગણાથી વધુ માનવામાં આવી રહ્યો છે. રાજભોગ મનોરથ ડાકોરમાં સૌથી લોકપ્રિય ધાર્મિક સેવાઓમાંનો એક ગણાય છે, જેમાં ભક્તો ભગવાન રણછોડરાયજીને વિશેષ ભોગ અર્પણ કરે છે.

તે ઉપરાંત વૈષ્ણવ પરંપરામાં અત્યંત મહત્વ ધરાવતા તુલસી વિવાહ મનોરથ માટે હવે ભક્તોને રૂ.51,000 ખર્ચવા પડશે. અગાઉની સરખામણીએ આ રકમમાં પણ નોંધપાત્ર વધારો કરવામાં આવ્યો હોવાનું જાણવા મળી રહ્યું છે. ધાર્મિક ભાવના સાથે જોડાયેલા આ મનોરથના ખર્ચમાં ભારે વધારાને કારણે ઘણા પરિવારોમાં ચર્ચા શરૂ થઈ છે.

કુંજ મનોરથના દરોમાં પણ મોટો વધારો કરવામાં આવ્યો છે. અગાઉ રૂ.5100માં પૂર્ણ થતો આ મનોરથ હવે રૂ.11,000માં કરવામાં આવશે. આ વધારો સીધો બમણાથી વધુ છે. કુંજ મનોરથ વૈષ્ણવ ભક્તોમાં વિશેષ સ્થાન ધરાવે છે અને વર્ષ દરમિયાન મોટી સંખ્યામાં ભક્તો આ સેવા લેતા હોય છે.

મંદિર કમિટીના સૂત્રોના જણાવ્યા અનુસાર છેલ્લા કેટલાક વર્ષોમાં મંદિરના સંચાલન ખર્ચ, જાળવણી, સુરક્ષા વ્યવસ્થા, વીજળી, કર્મચારીઓના ખર્ચ અને વિવિધ સુવિધાઓમાં વધારો થતા નવા દરો લાગુ કરવાની જરૂરિયાત ઉભી થઈ હતી. મંદિરના વિકાસકાર્યો અને આધુનિક સુવિધાઓ માટે આવકમાં વધારો કરવો જરૂરી હોવાનું કમિટીના વર્તુળોમાં માનવામાં આવી રહ્યું છે.

જો કે ભક્તોમાંથી એક વર્ગ આ નિર્ણયનો વિરોધ કરી રહ્યો છે. કેટલાક ભક્તોનું માનવું છે કે મંદિર અને ધાર્મિક આસ્થા સામાન્ય લોકો માટે સરળતાથી ઉપલબ્ધ રહેવી જોઈએ. મનોરથો પર આટલો મોટો આર્થિક બોજ મુકાતા મધ્યમવર્ગ અને ગરીબ ભક્તો માટે ધાર્મિક સેવાઓ કરવી મુશ્કેલ બની શકે છે.

સ્થાનિક વેપારીઓ અને યાત્રાધામ સાથે જોડાયેલા લોકોનું માનવું છે કે ડાકોરમાં દર વર્ષે લાખો ભક્તો દર્શન માટે આવે છે અને મંદિર સાથે ભાવનાત્મક રીતે જોડાયેલા છે. આવા સમયમાં દરોમાં અચાનક થયેલા મોટા વધારાથી યાત્રાળુઓમાં મિશ્ર પ્રતિસાદ જોવા મળી રહ્યો છે.

કેટલાક ભક્તોએ સોશિયલ મીડિયા પર પણ આ મુદ્દે પ્રતિક્રિયા આપતા જણાવ્યું છે કે મંદિર ટ્રસ્ટે દરોમાં વધારો કરતા પહેલા ભક્તોની ભાવનાઓ અને આર્થિક પરિસ્થિતિનો વિચાર કરવો જોઈએ. જ્યારે બીજી તરફ કેટલાક લોકોનું કહેવું છે કે વધતી મોંઘવારી અને સંચાલન ખર્ચને ધ્યાનમાં રાખીએ તો દરોમાં વધારો અનિવાર્ય હતો.

ડાકોર મંદિર ગુજરાતના સૌથી મહત્વપૂર્ણ વૈષ્ણવ તીર્થસ્થાનોમાંનું એક છે. અહીં દર પૂનમ, તહેવારો અને ખાસ પ્રસંગોએ લાખો ભક્તો ઉમટી પડે છે. ખાસ કરીને ફાગણ પૂનમ, જન્માષ્ટમી અને કારતક પૂનમ દરમિયાન અહીં ભારે ભીડ રહેતી હોય છે.

હાલ મંદિર કમિટીના નવા દરોને લઈને સમગ્ર ગુજરાતમાં ચર્ચા ચાલી રહી છે. આગામી દિવસોમાં ભક્તો અને મંદિર સંચાલન વચ્ચે આ મુદ્દે વધુ ચર્ચા થાય તેવી શક્યતા વ્યક્ત થઈ રહી છે. હવે જોવાનું રહેશે કે મંદિર કમિટી ભક્તોની લાગણીઓને ધ્યાનમાં રાખીને કોઈ રાહત આપે છે કે પછી નવા દરો યથાવત્ રાખવામાં આવે છે.