મારું શહેર જામનગરમાં ફૂડ સેફ્ટી વિભાગની ત્રાટક કાર્યવાહી: 41 વેપારી એકમોની તપાસ, 68 કિલો વાસી ખાદ્ય જથ્થો સ્થળ પર જ નાશ કરાયો.

જામનગર મહાનગરપાલિકાના કમિશનર શ્રી દીપેશ કેડિયાના માર્ગદર્શન હેઠળ શહેરમાં નાગરિકોને સ્વચ્છ, સુરક્ષિત અને આરોગ્યપ્રદ ખોરાક મળી રહે તે હેતુથી ફૂડ સેફ્ટી વિભાગ દ્વારા વિવિધ વિસ્તારોમાં વ્યાપક ચેકિંગ અભિયાન હાથ ધરવામાં આવ્યું હતું. આ અભિયાન દરમિયાન હોટલ, રેસ્ટોરન્ટ, ફરસાણની દુકાનો, નોનવેજ શોપ, ફાસ્ટ ફૂડની રેકડીઓ, ફેરિયાઓ તેમજ આઈસ ફેક્ટરીઓ સહિત કુલ 41 વેપારી એકમોની તપાસ કરવામાં આવી હતી. તપાસ દરમિયાન અનહાઇજેનિક સ્થિતિમાં રાખવામાં આવેલો 68 કિલો વાસી ખાદ્ય જથ્થો સ્થળ પર જ નાશ કરવામાં આવ્યો હતો.

ફૂડ સેફ્ટી ઓફિસરની ટીમ દ્વારા શહેરના બેડેશ્વર, રણજીતનગર, કાલાવડ નાકા બહાર, પાંચ હાટડી, ઢીંચડા રોડ, ખોડીયાર કોલોની, પટેલ કોલોની અને પેલેસ રોડ સહિતના વિસ્તારોમાં તપાસ હાથ ધરવામાં આવી હતી. આ દરમિયાન હોટલ-રેસ્ટોરન્ટમાં વપરાતા ખાદ્ય તેલ, પ્રિન્ટેડ પસ્તીનો ઉપયોગ, તૈયાર ખાદ્ય સામગ્રીની ગુણવત્તા, વાસી ખોરાક તેમજ સ્વચ્છતા અંગે ઝીણવટભરી ચકાસણી કરવામાં આવી હતી. અનેક સ્થળોએ ખાદ્ય પદાર્થો અનહાઇજેનિક સ્થિતિમાં સંગ્રહિત હોવાનું સામે આવતા તાત્કાલિક કાર્યવાહી કરવામાં આવી હતી.

તપાસ દરમિયાન કુલ 68 કિલો વાસી ખાદ્ય સામગ્રી માનવ આરોગ્ય માટે અયોગ્ય હાલતમાં મળી આવતાં તેનો સ્થળ પર જ નાશ કરવામાં આવ્યો હતો. ઉપરાંત 6 કિલો પ્રિન્ટેડ પસ્તીનો પણ નાશ કરવામાં આવ્યો હતો. ફૂડ સેફ્ટી ટીમે વેપારીઓને વાસી ખાદ્ય પદાર્થોનું વેચાણ ન કરવા, ખાદ્ય તેલનો યોગ્ય ઉપયોગ કરવા અને ફૂડ સેફ્ટી એન્ડ સ્ટાન્ડર્ડ્સના નિયમોનું કડક પાલન કરવા સૂચના આપી હતી.

અભિયાન દરમિયાન શહેરની આઈસ ફેક્ટરીઓની પણ તપાસ કરવામાં આવી હતી. ટીમે બરફના ઉત્પાદન અને સંગ્રહની પ્રક્રિયા, સ્વચ્છતા તેમજ હાઇજિનની સ્થિતિનું નિરીક્ષણ કર્યું હતું. સંબંધિત સંચાલકોને ઉત્પાદન સ્થળે નિયમિત સફાઈ જાળવવા, હાઇજેનિક કન્ડિશનનું પાલન કરવા તેમજ પાણીમાં નિયમિત ક્લોરીનેશનની પ્રક્રિયા અમલમાં રાખવા સૂચના આપવામાં આવી હતી જેથી નાગરિકોને સુરક્ષિત ગુણવત્તાનો બરફ મળી રહે.

આ ઉપરાંત, પ્રાપ્ત થયેલી એક ફરિયાદના આધારે ફૂડ સેફ્ટી વિભાગની ટીમે સંબંધિત વેપારી એકમમાં રૂબરૂ તપાસ હાથ ધરી હતી. તપાસ દરમિયાન **ફોર્ચ્યુન રિફાઇન્ડ કપાસિયા તેલ (870 ગ્રામ પાઉચ)**નું નમૂના લેવામાં આવ્યું હતું. આ નમૂનાને વધુ પરીક્ષણ માટે વડોદરાની ફૂડ એન્ડ ડ્રગ લેબોરેટરીમાં મોકલવાની કાર્યવાહી હાથ ધરવામાં આવી છે. લેબોરેટરીના રિપોર્ટના આધારે જરૂરી કાનૂની કાર્યવાહી કરવામાં આવશે.

અષાઢી બીજના તહેવારને ધ્યાનમાં રાખીને મીઠાઈના વેચાણ પર પણ વિશેષ નજર રાખવામાં આવી હતી. તહેવારો દરમિયાન લોકો સુધી ગુણવત્તાયુક્ત અને સલામત મીઠાઈ પહોંચે તે માટે શહેરની અન્ય ત્રણ મીઠાઈની દુકાનોમાંથી કુલ ત્રણ મીઠાઈના નમૂનાઓ લેવામાં આવ્યા હતા. આ નમૂનાઓને પણ ગુણવત્તાની ચકાસણી માટે પ્રયોગશાળામાં મોકલવાની કાર્યવાહી કરવામાં આવી છે.

જામનગર મહાનગરપાલિકાની ફૂડ સેફ્ટી શાખા દ્વારા ઓનલાઈન, ઓફલાઈન, ટેલિફોનિક તેમજ રૂબરૂ મળતી નાગરિકોની ફરિયાદોનો પણ તાત્કાલિક નિકાલ કરવામાં આવી રહ્યો છે. મહાનગરપાલિકાએ વેપારીઓને ફૂડ સેફ્ટીના તમામ નિયમોનું પાલન કરવા અનુરોધ કર્યો છે તેમજ નાગરિકોને પણ ખાદ્ય પદાર્થોની ગુણવત્તા અંગે કોઈ શંકા હોય તો મહાનગરપાલિકામાં ફરિયાદ નોંધાવવા અપીલ કરી છે. આગામી સમયમાં પણ શહેરમાં આ પ્રકારના ચેકિંગ અભિયાન વધુ સઘન બનાવવામાં આવશે જેથી નાગરિકોને સુરક્ષિત, સ્વચ્છ અને આરોગ્યપ્રદ ખોરાક મળી રહે.