મારું શહેર ગોંડલ–નાસિક રૂટ પર નવી અદ્યતન સ્લીપર બસ શરૂ, લાંબા અંતરના મુસાફરોને મળશે વધુ આરામદાયક સફર.

ગોંડલ: ગુજરાત રાજ્ય માર્ગ પરિવહન નિગમ (GSRTC) દ્વારા મુસાફરોને વધુ ગુણવત્તાસભર અને આરામદાયક પરિવહન સેવા પૂરી પાડવાના હેતુથી ગોંડલ–નાસિક રૂટ પર નવી અદ્યતન સ્લીપર બસની શરૂઆત કરવામાં આવી છે. આ નવી બસ શરૂ થતાં ગોંડલ સહિત રાજકોટ અને આસપાસના વિસ્તારોમાંથી મહારાષ્ટ્ર જતાં મુસાફરોને લાંબા અંતરની મુસાફરી દરમિયાન વધુ આરામદાયક અને સુરક્ષિત સફરનો લાભ મળશે.

ગોંડલ એસટી ડેપોના મેનેજર શ્રી એસ. એમ. મોમીને જણાવ્યું હતું કે રાજ્ય સરકાર દ્વારા મુસાફરોની સુવિધાને ધ્યાનમાં રાખીને નવી સ્લીપર બસ ફાળવવામાં આવી છે. આ બસ ગોંડલથી રાજકોટ, લીંબડી, વડોદરા, સુરત અને સાપુતારા થઈને નાસિક સુધી દોડશે. પરિણામે ગુજરાત અને મહારાષ્ટ્ર વચ્ચે નિયમિત મુસાફરી કરતા હજારો મુસાફરોને વધુ અનુકૂળ અને વિશ્વસનીય પરિવહન સેવા ઉપલબ્ધ બનશે.

નવી સ્લીપર બસમાં લાંબા અંતરની મુસાફરીને ધ્યાનમાં રાખીને આરામદાયક સ્લીપર બર્થ સહિત આધુનિક સુવિધાઓ ઉપલબ્ધ કરાવવામાં આવી છે. ખાસ કરીને રાત્રિ દરમિયાન મુસાફરી કરતા મુસાફરો માટે આ સેવા વધુ આરામદાયક સાબિત થશે અને સતત વધતી મુસાફરોની માંગને પણ સંતોષી શકશે.

શ્રી મોમીને વધુમાં જણાવ્યું હતું કે રાજ્ય પરિવહન નિગમ દ્વારા તબક્કાવાર આધુનિક બસોનો કાફલો વધારવામાં આવી રહ્યો છે, જેથી મુસાફરોને સુરક્ષિત, સમયબદ્ધ અને ગુણવત્તાસભર પરિવહન સેવા મળી રહે. આંતરરાજ્ય રૂટ પર નવી સ્લીપર બસ શરૂ થતાં પ્રવાસન, વેપાર અને રોજગાર હેતુસર મુસાફરી કરતા લોકોને પણ તેનો સીધો લાભ મળશે.

નવી બસના પ્રારંભ પ્રસંગે ગોંડલ એસટી ડેપોના મેનેજર શ્રી એસ. એમ. મોમીન, રાજકોટ જિલ્લા ભાજપ પ્રેસ મીડિયા સહ-ઇન્ચાર્જ શ્રી કુલદીપસિંહ જાડેજા તેમજ એસટીની ત્રણેય માન્ય યુનિયનના આગેવાનો ઉપસ્થિત રહ્યા હતા. મહાનુભાવોએ નવી બસને લીલી ઝંડી બતાવી પ્રસ્થાન કરાવ્યું અને આ નવી સેવા મુસાફરો માટે ઉપયોગી સાબિત થાય તેવી શુભેચ્છાઓ પાઠવી હતી.

રાજ્ય પરિવહન નિગમની આ નવી પહેલથી ગોંડલ–નાસિક રૂટ પર મુસાફરી કરતા મુસાફરોને વધુ આરામદાયક, સુરક્ષિત અને સુવિધાસભર સફરનો અનુભવ મળશે તેવી આશા વ્યક્ત કરવામાં આવી છે.