મારું શહેર વિચરતી અને વિમુક્ત સમુદાયોના સશક્તિકરણ માટે જામનગરમાં SEED યોજના સમીક્ષા બેઠક, ભરતભાઈ પટણીએ લાભાર્થીઓ સાથે કર્યો સીધો સંવાદ.

વિચરતી અને વિમુક્ત સમુદાયોના સામાજિક તથા આર્થિક વિકાસને વધુ ગતિ આપવા માટે કેન્દ્ર સરકાર દ્વારા અમલમાં મૂકવામાં આવેલી SEED (Scheme for Economic Empowerment of DNTs) યોજનાના અમલીકરણની સમીક્ષા માટે જામનગર કલેક્ટર કચેરી ખાતે મહત્વપૂર્ણ બેઠક યોજાઈ હતી. વિચરતી અને વિમુક્ત સમુદાયોના વિકાસ અને કલ્યાણ બોર્ડના સદસ્યશ્રી ભરતભાઈ પટણીની અધ્યક્ષતામાં યોજાયેલી આ બેઠકમાં જામનગર જિલ્લાના SEED યોજનાના લાભાર્થીઓ, અધિકારીઓ અને સમાજના અગ્રણીઓ ઉપસ્થિત રહ્યા હતા.

બેઠકનો મુખ્ય હેતુ યોજનાના વાસ્તવિક અમલીકરણની સ્થિતિનું મૂલ્યાંકન કરવાનો, લાભાર્થીઓના પ્રશ્નો સાંભળવાનો અને વધુ અસરકારક રીતે યોજનાના લાભો સમાજના અંતિમ વ્યક્તિ સુધી પહોંચે તે માટે જરૂરી માર્ગદર્શન આપવાનો હતો. આ પ્રસંગે સદસ્યશ્રી ભરતભાઈ પટણીએ લાભાર્થીઓ સાથે સીધો સંવાદ સાધી તેમની સમસ્યાઓ, જરૂરિયાતો અને યોજનાથી મળતા લાભો અંગે વિસ્તૃત માહિતી મેળવી હતી.

SEED યોજના કેન્દ્ર સરકારની મહત્વાકાંક્ષી યોજના છે, જેનો મુખ્ય ઉદ્દેશ વિચરતી, અર્ધ-વિચરતી અને વિમુક્ત જાતિઓના આર્થિક સશક્તિકરણ સાથે તેમના જીવનધોરણમાં સુધારો લાવવાનો છે. સમાજના મુખ્ય પ્રવાહથી વંચિત રહેલા આવા વર્ગોને શિક્ષણ, રોજગારી, આવાસ, ઓળખપત્રો અને અન્ય સરકારી સહાય સાથે જોડવા માટે આ યોજના અમલમાં મૂકવામાં આવી છે.

બેઠક દરમિયાન ભરતભાઈ પટણીએ જણાવ્યું હતું કે દેશના વિકાસમાં દરેક વર્ગની સમાન ભાગીદારી જરૂરી છે. વિચરતી અને વિમુક્ત જાતિઓ લાંબા સમયથી અનેક મૂળભૂત સુવિધાઓથી વંચિત રહી છે, ત્યારે કેન્દ્ર સરકાર તેમના સર્વાંગી વિકાસ માટે પ્રતિબદ્ધ છે. તેમણે ભારપૂર્વક જણાવ્યું કે માત્ર યોજનાઓ જાહેર કરવી પૂરતી નથી, પરંતુ તેના લાભો ખરેખર જરૂરિયાતમંદ લોકો સુધી પહોંચે તે વધુ મહત્વનું છે.

સમીક્ષા બેઠક દરમિયાન વિવિધ લાભાર્થીઓએ પોતાના અનુભવો રજૂ કર્યા હતા. કેટલાક લાભાર્થીઓએ SEED યોજનાના કારણે તેમને મળેલા લાભો અંગે સંતોષ વ્યક્ત કર્યો હતો, જ્યારે કેટલાક લોકોએ દસ્તાવેજીકરણ, ઓળખપત્રો મેળવવા, રહેઠાણ અને રોજગારી સંબંધિત પડકારોની પણ રજૂઆત કરી હતી. સદસ્યશ્રીએ તમામ રજૂઆતોને ગંભીરતાથી સાંભળી સંબંધિત અધિકારીઓને યોગ્ય અને સમયબદ્ધ નિરાકરણ લાવવા સૂચના આપી હતી.

શ્રી ભરતભાઈ પટણીએ અધિકારીઓને ખાસ સૂચના આપી હતી કે વિચરતી અને વિમુક્ત સમુદાયોના લોકો માટે રેશનકાર્ડ, આધારકાર્ડ અને અન્ય જરૂરી ઓળખપત્રો ઝડપથી કાઢી આપવામાં આવે. ઘણા પરિવારો હજુ પણ સરકારી દસ્તાવેજોના અભાવે વિવિધ યોજનાઓના લાભોથી વંચિત રહેતા હોવાનું તેમણે જણાવ્યું હતું.

આ ઉપરાંત તેમણે સરકારના નિયમો અનુસાર યોગ્ય લાભાર્થીઓને રહેઠાણ માટે જમીન ફાળવવા, પીવાના પાણી, વીજળી અને અન્ય મૂળભૂત સુવિધાઓ ઉપલબ્ધ કરાવવા માટે પણ સંબંધિત વિભાગોને સક્રિય કામગીરી કરવા જણાવ્યું હતું. તેમણે જણાવ્યું કે આવાસ અને મૂળભૂત સુવિધાઓ કોઈપણ પરિવારના વિકાસ માટે પ્રથમ જરૂરિયાત છે અને આ બાબતમાં કોઈપણ પ્રકારની બેદરકારી ન ચાલે.

બેઠક દરમિયાન રોજગારીના મુદ્દાને પણ વિશેષ મહત્વ આપવામાં આવ્યું હતું. ભરતભાઈ પટણીએ વડાપ્રધાનના “હર હાથ કો કામ, હર હાથ કો દામ” સૂત્રને યાદ કરતાં જણાવ્યું હતું કે વિચરતી અને વિમુક્ત સમુદાયોના યુવાનોને કૌશલ્ય વિકાસ અને રોજગારીની તકો સાથે જોડવા માટે વિશેષ પ્રયાસો થવા જોઈએ. તેમણે અધિકારીઓને આ વર્ગના યુવાનો માટે વિવિધ રોજગારલક્ષી યોજનાઓ અને તાલીમ કાર્યક્રમો સાથે સંકલન સાધવાની સૂચના આપી હતી.

તેમણે વધુમાં જણાવ્યું કે સમાજના આ વર્ગને આત્મનિર્ભર બનાવવાનો સૌથી અસરકારક માર્ગ શિક્ષણ અને રોજગારી છે. તેથી બાળકોના શિક્ષણ, કૌશલ્ય વિકાસ અને સ્વરોજગારીના ક્ષેત્રોમાં વિશેષ ધ્યાન કેન્દ્રિત કરવાની જરૂર છે. સરકાર દ્વારા ઉપલબ્ધ વિવિધ સહાય યોજનાઓનો મહત્તમ લાભ લાભાર્થીઓ સુધી પહોંચે તે માટે પણ તેમણે અધિકારીઓને સૂચનો આપ્યા હતા.

બેઠક દરમિયાન યોજનાના અમલીકરણમાં આવતી વહીવટી અને વ્યવહારુ મુશ્કેલીઓની પણ ચર્ચા કરવામાં આવી હતી. લાભાર્થીઓએ પોતાના પ્રશ્નો ખુલ્લેઆમ રજૂ કર્યા હતા, જેના આધારે આગામી સમયમાં વધુ અસરકારક કામગીરી માટે માર્ગદર્શન આપવામાં આવ્યું હતું.

આ પ્રસંગે નિવાસી અધિક કલેક્ટર શારદા કાથડ, જામનગર ગ્રામ્ય પ્રાંત અધિકારી બ્રિજેશ કાલરીયા, વિકસતી જાતિના જિલ્લા નાયબ નિયામક એ.કે. પરમાર સહિત વિવિધ વિભાગોના અધિકારીઓ, સમાજના અગ્રણીઓ અને મોટી સંખ્યામાં લાભાર્થીઓ હાજર રહ્યા હતા.

બેઠકના અંતે સદસ્યશ્રી ભરતભાઈ પટણીએ વિશ્વાસ વ્યક્ત કર્યો હતો કે કેન્દ્ર અને રાજ્ય સરકારના સંકલિત પ્રયાસોથી વિચરતી અને વિમુક્ત સમુદાયોના જીવનમાં સકારાત્મક પરિવર્તન આવશે અને સમાજના આ વર્ગને વિકાસના મુખ્ય પ્રવાહ સાથે વધુ મજબૂત રીતે જોડવામાં સફળતા મળશે. તેમણે તમામ અધિકારીઓને સંવેદનશીલતા અને પ્રતિબદ્ધતા સાથે કાર્ય કરવાની અપીલ કરી હતી, જેથી સરકારની કલ્યાણકારી યોજનાઓનો લાભ ખરેખર જરૂરિયાતમંદ લોકો સુધી પહોંચી શકે.