મારું શહેર ભારે વરસાદની અસર: બગોદરા–સનાથલ હાઈવે બંને બાજુ બંધ, અમદાવાદ–સૌરાષ્ટ્ર વચ્ચે ટ્રાફિક ડાયવર્ટ.

અમદાવાદ: રાજ્યમાં સતત વરસી રહેલા ભારે વરસાદની અસર હવે મુખ્ય માર્ગ વ્યવસ્થા પર પણ જોવા મળી રહી છે. અમદાવાદ જિલ્લામાં છેલ્લા બે દિવસથી પડી રહેલા અતિભારે વરસાદને કારણે અનેક વિસ્તારોમાં જળબંબાકાર સ્થિતિ સર્જાઈ છે. ખાસ કરીને ચાંગોદર નજીક અમદાવાદ–રાજકોટ હાઈવે પર વરસાદી પાણી ભરાઈ જતાં વાહનવ્યવહાર ગંભીર રીતે પ્રભાવિત થયો છે. અનેક વાહનો પાણીમાં અટવાઈ જવાના દૃશ્યો સામે આવ્યા છે, જેના કારણે અમદાવાદથી સૌરાષ્ટ્ર તરફ જતાં અને ત્યાંથી અમદાવાદ આવતાં મુસાફરોને ભારે મુશ્કેલીઓનો સામનો કરવો પડી રહ્યો છે. વરસાદી પાણીનો સ્તર સતત વધતા અને માર્ગ પર સલામત રીતે વાહનવ્યવહાર શક્ય ન હોવાથી બગોદરા–સનાથલ હાઈવે બંને દિશામાં તાત્કાલિક અસરથી બંધ કરી દેવામાં આવ્યો છે. પોલીસ અને ટ્રાફિક તંત્ર દ્વારા સ્થળ પર બેરિકેડ્સ ગોઠવી વાહનોને રોકવામાં આવી રહ્યા છે અને લોકોને વૈકલ્પિક માર્ગોનો ઉપયોગ કરવાની સૂચના આપવામાં આવી રહી છે. અમદાવાદથી રાજકોટ અને સૌરાષ્ટ્ર તરફ જતાં વાહનચાલકો માટે ટ્રાફિક વિભાગે વૈકલ્પિક રૂટ જાહેર કર્યો છે. હવે મુસાફરો સનાથલ સર્કલથી અમદાવાદ–વડોદરા એક્સપ્રેસવે તરફ જઈ, વેજલકા માર્ગે સૌરાષ્ટ્ર તરફ આગળ વધી શકશે. આ રૂટ પર ટ્રાફિકનું દબાણ વધવાની શક્યતા હોવાથી વાહનચાલકોને સાવચેતીપૂર્વક વાહન ચલાવવા અપીલ કરવામાં આવી છે. તે ઉપરાંત, વિરમગામ–સુરેન્દ્રનગર માર્ગ તરફ પણ ડાયવર્ઝન આપવામાં આવ્યું છે. જે વાહનચાલકોને સીધા સૌરાષ્ટ્ર તરફ જવાનું હોય તેઓ વિરમગામ થઈ સુરેન્દ્રનગરના માર્ગનો ઉપયોગ કરી શકે છે. જોકે આ વૈકલ્પિક રૂટ મૂળ માર્ગ કરતાં અંદાજે 40થી 50 કિલોમીટર લાંબો હોવાથી મુસાફરીનો સમય પણ વધશે. ટ્રાફિક પોલીસ અને સ્થાનિક વહીવટી તંત્ર સતત પરિસ્થિતિ પર નજર રાખી રહ્યા છે. માર્ગ પરથી પાણી ઉતરે અને સલામતીની ખાતરી થયા બાદ જ હાઈવે ફરી શરૂ કરવામાં આવશે. હાલ રાહત અને ટ્રાફિક નિયંત્રણ માટે પોલીસની ટીમો વિવિધ સ્થળોએ તૈનાત કરવામાં આવી છે અને લોકોને બિનજરૂરી મુસાફરી ટાળવાની સલાહ આપવામાં આવી રહી છે. હવામાન વિભાગે હજુ પણ અમદાવાદ સહિત રાજ્યના અનેક જિલ્લાઓમાં ભારે વરસાદની આગાહી વ્યક્ત કરી છે. તેથી આગામી કલાકોમાં સ્થિતિમાં વધુ ફેરફાર થઈ શકે છે. તંત્ર દ્વારા મુસાફરોને અપીલ કરવામાં આવી છે કે લાંબી મુસાફરી પર નીકળતા પહેલાં ટ્રાફિક અપડેટ અને માર્ગોની હાલની સ્થિતિની માહિતી મેળવી લે તેમજ વરસાદ દરમિયાન સાવચેતી રાખીને જ મુસાફરી કરે. vidIQ