મારું શહેર જામનગર જિલ્લામાં જમીન દફતર સેવાઓ હવે તાલુકા મથકે: 'ઇન્સ્પેક્ટર ઓફ લેન્ડ રેકોર્ડ્સ'ની 7 નવી કચેરીઓ કાર્યરત

જામનગર: જમીન માપણી, પ્રોપર્ટી કાર્ડ, સ્વામિત્વ યોજના સહિતની જમીન દફતર સંબંધિત સેવાઓ હવે નાગરિકોને જિલ્લા મથક સુધી ધક્કા ખાવા વગર પોતાના તાલુકા મથકે જ ઉપલબ્ધ બનશે. મહેસૂલ વિભાગ દ્વારા વહીવટી તંત્રને વધુ કાર્યક્ષમ, સુદ્રઢ અને પ્રજાલક્ષી બનાવવા માટે જામનગર જિલ્લામાં **'ઇન્સ્પેક્ટર ઓફ લેન્ડ રેકોર્ડ્સ' (Inspector of Land Records)**ની 7 નવી તાલુકા કક્ષાની કચેરીઓ નવા સરનામે કાર્યરત કરવામાં આવી છે.

મહેસૂલ વિભાગ હેઠળ ગાંધીનગર સ્થિત સેટલમેન્ટ કમિશનર અને જમીન દફતર નિયામકની કચેરી દ્વારા જમીન દફતરની કામગીરીનું તાલુકા કક્ષાએ વિકેન્દ્રીકરણ કરવામાં આવ્યું છે. આ અંતર્ગત અગાઉ કાર્યરત જિલ્લા નિરીક્ષક જમીન દફતર (DILR), સિટી સર્વે સુપ્રિન્ટેન્ડેન્ટ અને હક્કચોક્સી અધિકારી જેવા હોદ્દાઓનું નામાભિધાન બદલીને હવે 'જમીન દફતર નિરીક્ષક, વર્ગ-2 (Inspector of Land Records)' કરવામાં આવ્યું છે.

આ નવી વ્યવસ્થાનો મુખ્ય હેતુ નાગરિકોને જમીન દફતર સંબંધિત વિવિધ સેવાઓ માટે જિલ્લા કચેરી સુધી જવું ન પડે અને પોતાના તાલુકામાં જ ઝડપી તથા સરળ સેવાઓ મળી રહે તે છે. હવે એક જ કચેરીમાંથી જમીન માપણી, પ્રોપર્ટી કાર્ડ, સ્વામિત્વ યોજના અને અન્ય જમીન રેકોર્ડ સંબંધિત સેવાઓ ઉપલબ્ધ થશે.

જિલ્લાની નવી કાર્યરત 7 તાલુકા કક્ષાની કચેરીઓ

1. જામનગર શહેર
મોજણી ભવન, ગ્રાઉન્ડ ફ્લોર, જિલ્લા સેવાસદન, શરૂ સેકશન રોડ, જામનગર.

2. જામનગર ગ્રામ્ય
સેવાસદન-3, લાલ બંગલા કમ્પાઉન્ડ, પ્રથમ માળ, જામનગર.

3. કાલાવડ
તાલુકા સેવા સદન, પ્રથમ માળ, ધોરાજી રોડ, કાલાવડ.

4. ધ્રોલ
જૂનું કોર્ટ બિલ્ડિંગ, જોડિયા નાકા પાસે, જોડિયા રોડ, ધ્રોલ.

5. જોડિયા
તાલુકા સેવા સદન, પ્રથમ માળ, જોડિયા.

6. લાલપુર
જ્ઞાનદીપ વિદ્યામંદિર, પટેલ શેરી, જૂની શાક માર્કેટ રોડ, લાલપુર.

7. જામજોધપુર
સ્ટેશન પ્લોટ, અંજુ ભગવાનદાસ પારવાણીનું મકાન, મામલતદાર કચેરી સામે, જામજોધપુર.

નવી વ્યવસ્થા અમલમાં આવતાં જમીન દફતરની કામગીરીમાં વધુ ઝડપ અને પારદર્શિતા આવશે. અગાઉ નાગરિકોને પ્રોપર્ટી કાર્ડ માટે સિટી સર્વે કચેરી અને જમીન માપણી માટે ડી.આઈ.એલ.આર. કચેરી ખાતે અલગ-અલગ જવું પડતું હતું. હવે આ તમામ સેવાઓ એક જ તાલુકા કક્ષાની કચેરીમાં ઉપલબ્ધ થતાં સમય, ખર્ચ અને પરેશાનીમાં નોંધપાત્ર ઘટાડો થશે.

આ વ્યવસ્થાથી ખાસ કરીને ખેડૂતો, જમીનધારકો, મિલકત માલિકો અને સ્વામિત્વ યોજના હેઠળ લાભાર્થીઓને સીધો લાભ મળશે. જમીન સંબંધિત અરજીઓના ઝડપી નિકાલ ઉપરાંત પ્રોપર્ટી કાર્ડ મેળવવાની પ્રક્રિયા પણ વધુ સરળ બનશે.

જામનગર જિલ્લાના કલેક્ટર પી.બી. પંડ્યાએ અખબારી યાદી દ્વારા જિલ્લાના તમામ નાગરિકોને જમીન રેકોર્ડ, જમીન માપણી, પ્રોપર્ટી કાર્ડ અને અન્ય સેવાઓ માટે પોતાના તાલુકાની સંબંધિત કચેરીનો સંપર્ક સાધવા અનુરોધ કર્યો છે. સાથે જ સુપ્રિન્ટેન્ડેન્ટ લેન્ડ રેકોર્ડ્સ કમ એકત્રીકરણ અધિકારી એચ.એસ. રબારીએ પણ નાગરિકોને સ્થાનિક કક્ષાએ ઉપલબ્ધ કરવામાં આવેલી આ નવી સેવાઓનો વધુમાં વધુ લાભ લેવા અપીલ કરી છે. આ પહેલથી મહેસૂલ વિભાગની સેવાઓ વધુ સરળ, ઝડપી અને નાગરિકકેન્દ્રિત બનશે તેવી આશા વ્યક્ત કરવામાં આવી રહી છે.