મારું ગુજરાત ગુજરાત બનશે સેમિકન્ડક્ટર ડિઝાઇનનું નવું હબ: ChipIN સેન્ટર અને VLSI સેન્ટર ઑફ એક્સેલન્સથી મળશે ટેક્નોલોજીને નવી દિશા.
ભારત વૈશ્વિક સેમિકન્ડક્ટર ક્ષેત્રમાં પોતાની મજબૂત ઓળખ ઊભી કરી રહ્યું છે અને આ સફરમાં ગુજરાત અગ્રણી ભૂમિકા ભજવવા તરફ આગળ વધી રહ્યું છે. રાજ્યમાં સેમિકન્ડક્ટર ડિઝાઇન, સંશોધન અને નવીનતાને વેગ આપવા માટે ગુજરાત સરકારે વધુ એક મહત્વપૂર્ણ પહેલ હાથ ધરી છે. મુખ્યમંત્રી ભૂપેન્દ્ર પટેલના માર્ગદર્શન અને વિજ્ઞાન તથા ટેક્નોલોજી મંત્રી અર્જુન મોઢવાડિયાના નેતૃત્વ હેઠળ ગુજરાત સ્ટેટ ઇલેક્ટ્રોનિક્સ મિશન (GSEM), ગુજરાત ટેક્નોલોજિકલ યુનિવર્સિટી (GTU) અને સેન્ટર ફોર ડેવલપમેન્ટ ઑફ એડવાન્સ્ડ કમ્પ્યુટિંગ (C-DAC), બેંગલુરુના સહયોગથી પ્રસ્તાવિત ChipIN એક્સ્ટેન્શન સેન્ટર અને VLSI માટેના સેન્ટર ઑફ એક્સેલન્સ (CoE) માટે ઓરિએન્ટેશન કાર્યક્રમ અને કિક-ઓફ બેઠકનું આયોજન કરવામાં આવ્યું હતું. આ પહેલ ગુજરાતને સેમિકન્ડક્ટર ડિઝાઇન ક્ષેત્રમાં રાષ્ટ્રીય સ્તરે વધુ મજબૂત સ્થાન અપાવશે.
કાર્યક્રમના ઉદ્ઘાટન સત્રમાં વિજ્ઞાન અને ટેક્નોલોજી વિભાગના સચિવ પી. ભારતી મુખ્ય અતિથિ તરીકે ઉપસ્થિત રહ્યા હતા. તેમની સાથે GSEMના મિશન ડિરેક્ટર નેહા કુમારી (IAS), દેશની અગ્રણી શૈક્ષણિક સંસ્થાઓના પ્રતિનિધિઓ, સંશોધકો, ઉદ્યોગ અગ્રણીઓ અને વિવિધ ટેક્નોલોજી સંસ્થાઓના નિષ્ણાતો પણ જોડાયા હતા. કાર્યક્રમ દરમિયાન ગુજરાતમાં સેમિકન્ડક્ટર ડિઝાઇન ઇકોસિસ્ટમને વધુ મજબૂત બનાવવા માટે સરકાર, શૈક્ષણિક સંસ્થાઓ અને ઉદ્યોગ વચ્ચે સંકલિત પ્રયાસો પર ભાર મૂકવામાં આવ્યો હતો.
C-DAC, બેંગલુરુના નિષ્ણાતોએ રાષ્ટ્રીય ChipIN પહેલ અંગે વિસ્તૃત માહિતી આપી હતી. આ પહેલ અંતર્ગત શૈક્ષણિક સંસ્થાઓ અને સંશોધકોને અત્યાધુનિક Electronic Design Automation (EDA) Tools, High Performance Computing (HPC), સેમિકન્ડક્ટર IP Libraries તેમજ Tape-out Support જેવી આધુનિક સુવિધાઓ ઉપલબ્ધ કરાવવામાં આવશે. આ સુવિધાઓના ઉપયોગથી વિદ્યાર્થીઓ, સંશોધકો અને સ્ટાર્ટઅપ્સને વૈશ્વિક સ્તરની ચિપ ડિઝાઇન ટેક્નોલોજી સુધી પહોંચ સરળ બનશે. કાર્યક્રમમાં ગુજરાતની 30થી વધુ શૈક્ષણિક સંસ્થાઓએ ભાગ લઈને આ પહેલનો લાભ મેળવવા માટે માર્ગદર્શન મેળવ્યું હતું.
પ્રસ્તાવિત ChipIN એક્સ્ટેન્શન સેન્ટર અને VLSI સેન્ટર ઑફ એક્સેલન્સ રાજ્યમાં સેમિકન્ડક્ટર ડિઝાઇન માટેનું મજબૂત ઇનોવેશન પ્લેટફોર્મ બનશે. આ સેન્ટર દ્વારા યુનિવર્સિટીઓ, સ્ટાર્ટઅપ્સ, MSMEs, સંશોધન સંસ્થાઓ અને ઉદ્યોગોને એક જ મંચ પર લાવી સહયોગને પ્રોત્સાહન આપવામાં આવશે. સાથે જ સંશોધનને માત્ર પ્રયોગશાળા સુધી મર્યાદિત રાખવાને બદલે તેને પ્રોડક્ટ ડેવલપમેન્ટ અને વ્યાવસાયિકીકરણ સુધી પહોંચાડવાનો પ્રયાસ કરવામાં આવશે. આ પહેલથી ગુજરાતમાં ટેક્નોલોજી આધારિત ઉદ્યોગોને પણ નવી તકો પ્રાપ્ત થશે.
આ નવી પહેલનો સૌથી મોટો ફાયદો ઉભરતી ટેક્નોલોજીમાં જોવા મળશે. AI Accelerators, Automotive Electronics, RISC-V Processors, Embedded Systems અને Internet of Things (IoT) જેવા ક્ષેત્રોમાં નવી ચિપ ડિઝાઇન, સંશોધન અને નવીનતા માટે રાજ્યમાં મજબૂત માળખું ઊભું થશે. ગુજરાતમાં સેમિકન્ડક્ટર મેન્યુફેક્ચરિંગ ક્ષેત્રે થઈ રહેલા ઝડપી રોકાણોને ધ્યાનમાં રાખતા હવે ડિઝાઇન ક્ષમતાઓ અને કુશળ માનવબળનું નિર્માણ પણ સમાન ગતિએ આગળ વધશે, જેના કારણે સમગ્ર સેમિકન્ડક્ટર ઇકોસિસ્ટમ વધુ સશક્ત બનશે.
ગુજરાત સ્ટેટ ઇલેક્ટ્રોનિક્સ મિશન (GSEM) આ સમગ્ર પહેલમાં નોડલ એજન્સી તરીકે મહત્વપૂર્ણ જવાબદારી નિભાવી રહ્યું છે. શૈક્ષણિક સંસ્થાઓને ChipIN પ્લેટફોર્મ સાથે જોડવા, ઉદ્યોગ અને શિક્ષણ જગત વચ્ચે સહયોગ વધારવા, નવી ટેક્નોલોજી આધારિત ઇકોસિસ્ટમ વિકસાવવા અને સંશોધનને ઉદ્યોગ સાથે જોડવા માટે GSEM સતત કામગીરી કરી રહ્યું છે. રાજ્ય સરકારનો ઉદ્દેશ માત્ર મેન્યુફેક્ચરિંગ સુધી મર્યાદિત ન રહી, પરંતુ સેમિકન્ડક્ટર ડિઝાઇન, સંશોધન અને ઇનોવેશનમાં પણ ગુજરાતને અગ્રણી સ્થાન અપાવવાનો છે.
બે દિવસીય આ કાર્યક્રમ દરમિયાન સેમિકન્ડક્ટર ડિઝાઇન ઇન્ફ્રાસ્ટ્રક્ચર, HPC, સ્વદેશી પ્રોસેસર ઇકોસિસ્ટમ, IoT સોલ્યુશન્સ અને ચિપ ડેવલપમેન્ટ જેવા વિષયો પર વિવિધ ટેક્નિકલ સત્રો યોજાશે. કાર્યક્રમમાં IIT ગાંધીનગરના ડિરેક્ટર ડૉ. રજત મૂના, SETS ચેન્નાઈના એક્ઝિક્યુટિવ ડિરેક્ટર ડૉ. એન. સુબ્રમણિયન, GTUના ઇન્ચાર્જ વાઇસ ચાન્સેલર ડૉ. વૈભવ ભટ્ટ, C-DAC બેંગલુરુના સેન્ટિલ કુમાર આર. સહિત અનેક અગ્રણી નિષ્ણાતો ઉપસ્થિત રહ્યા હતા. આ સમગ્ર પહેલ રાજ્યમાં "Design to Innovation" અને **"Research to Product"**ના વિઝનને સાકાર કરવામાં મહત્વપૂર્ણ સાબિત થશે અને સાથે જ ભારતને વૈશ્વિક સેમિકન્ડક્ટર ક્ષેત્રમાં અગ્રણી બનાવવાના રાષ્ટ્રીય લક્ષ્યને પણ નવી ગતિ આપશે.
