ઈકોનોમી પડકારો વચ્ચે ભારતની અર્થવ્યવસ્થાએ બતાવી મજબૂત ગતિ
પ્રથમ ત્રિમાસિકમાં રિયલ GDP ગ્રોથ 7.8 ટકા, અર્થશાસ્ત્રીઓના અંદાજ કરતાં પણ વધુ
યુએસ-ઈરાન યુદ્ધ, ટેરિફ અને વૈશ્વિક સ્તરે વધતા ક્રોસ-બોર્ડર તણાવ જેવા પડકારો વચ્ચે પણ ભારતીય અર્થતંત્રે પોતાની મજબૂત ગતિ જાળવી રાખી છે. ચાલુ નાણાકીય વર્ષ 2026-27ના પ્રથમ ત્રિમાસિક એટલે કે એપ્રિલથી જૂન દરમિયાન ભારતનો રિયલ GDP ગ્રોથ રેટ 7.8 ટકા નોંધાયો છે.
આ આંકડો મોટાભાગના અર્થશાસ્ત્રીઓના 7.1થી 7.2 ટકાના અંદાજ કરતાં નોંધપાત્ર રીતે વધુ રહ્યો છે. આ સાથે જ ભારતના નોમિનલ GDPમાં પણ 10.3 ટકાનો વધારો નોંધાયો છે.
વૈશ્વિક સ્તરે માલના ઊંચા ભાવ, સપ્લાય ચેઈનમાં પડતી મુશ્કેલીઓ અને ભૌગોલિક-રાજકીય તણાવ વચ્ચે ભારતની આર્થિક કામગીરીને મહત્વપૂર્ણ માનવામાં આવી રહી છે.
ભારતના મજબૂત GDP ગ્રોથ પાછળ મુખ્યત્વે મજબૂત ઘરેલુ માંગ, ઉત્પાદન ક્ષેત્રમાં વૃદ્ધિ અને સરકારી મૂડીરોકાણ જેવા પરિબળો મહત્વપૂર્ણ રહ્યા છે.
વૈશ્વિક અર્થતંત્રમાં અનિશ્ચિતતા વચ્ચે ભારતે સતત મજબૂત વૃદ્ધિ નોંધાવી છે. પ્રથમ ત્રિમાસિકના 7.8 ટકાના આંકડા બાદ ભારતે વિશ્વના સૌથી ઝડપથી વિકસતા મોટા અર્થતંત્ર તરીકે પોતાની સ્થિતિ વધુ મજબૂત કરી હોવાનો દાવો કરવામાં આવી રહ્યો છે.