મારું ગુજરાત ગુજરાતમાં આગામી 7 દિવસ હળવાથી મધ્યમ વરસાદની આગાહી, સૌરાષ્ટ્રમાં વરસાદની 31% ઘટથી ખેડૂતોમાં ચિંતા.
ગુજરાતમાં આગામી સાત દિવસ દરમિયાન મોટાભાગના વિસ્તારોમાં હળવાથી મધ્યમ વરસાદની સંભાવના વ્યક્ત કરવામાં આવી છે. ભારતીય હવામાન વિભાગ (IMD) મુજબ રાજ્યમાં આગામી એક સપ્તાહ દરમિયાન ભારે વરસાદની કોઈ ખાસ આગાહી નથી અને ગુજરાત રીજન તેમજ સૌરાષ્ટ્ર-કચ્છ માટે કોઈ વિશેષ ચેતવણી જાહેર કરવામાં આવી નથી.
સૌરાષ્ટ્ર વિસ્તારમાં વરસાદની આશરે 31 ટકા ઘટ નોંધાતા ખેડૂતોમાં ચિંતા વધી છે. વરસાદની અછતને કારણે મગફળી, કપાસ, સોયાબીન સહિતના ઉભા પાક પર અસર થવાની ભીતિ વ્યક્ત કરવામાં આવી રહી છે.
અમદાવાદ અને ગાંધીનગરમાં આગામી દિવસોમાં ભેજયુક્ત ગરમી વચ્ચે છૂટાછવાયા હળવા વરસાદ અથવા ઝાપટાં પડવાની શક્યતા છે. જોકે, હાલ ભારે વરસાદની કોઈ આગાહી કરવામાં આવી નથી.
હવામાન વિભાગે ખેડૂતો અને નાગરિકોને સ્થાનિક હવામાન અપડેટ પર સતત નજર રાખવા તેમજ વરસાદની પરિસ્થિતિને ધ્યાનમાં રાખીને જરૂરી આયોજન કરવાની સલાહ આપી છે.
