હવે સમગ્ર રાજ્યમાં એક જ ‘યુનિવર્સલ એફિડેવિટ’ માન્ય, અલગ-અલગ ફોર્મેટની ઝંઝટનો અંત

ગાંધીનગર:
ગુજરાત સરકાર દ્વારા નાગરિકોને સરકારી સેવાઓ મેળવવામાં થતા દસ્તાવેજી જટિલતા અને અલગ-અલગ પ્રકારના એફિડેવિટના કારણે ઉભી થતી મુશ્કેલીઓ દૂર કરવા માટે મહત્વપૂર્ણ વહીવટી સુધારો કરવામાં આવ્યો છે. મુખ્યમંત્રી ભુપેન્દ્રભાઈ પટેલના નેતૃત્વ હેઠળ રાજ્યના કાયદા વિભાગે સમગ્ર રાજ્યમાં માન્ય ગણાય તેવું “યુનિવર્સલ એફિડેવિટ”નું નવું ધોરણસરનું ફોર્મેટ જાહેર કર્યું છે.

આ નિર્ણય મુજબ હવે જ્યાં કાયદા અથવા નિયમ મુજબ સોગંદનામું જરૂરી હોય પરંતુ કોઈ નિશ્ચિત ફોર્મેટ નક્કી ન હોય, ત્યાં માત્ર એક જ સમાન યુનિવર્સલ એફિડેવિટ સમગ્ર ગુજરાતમાં ફરજિયાત રીતે સ્વીકારવામાં આવશે. આથી વિવિધ વિભાગો દ્વારા અલગ-અલગ લખાણવાળા એફિડેવિટ કરાવવાની પરંપરાનો અંત આવશે.

કાયદા વિભાગ દ્વારા જાહેર કરાયેલા આ નવા ફોર્મેટને રાજ્યની તમામ સરકારી કચેરીઓ, જિલ્લા-તાલુકા કચેરીઓ, ગ્રામ્ય અને શહેરી સેવા કેન્દ્રો તથા તમામ અધિકારીઓ દ્વારા અમલમાં મૂકવામાં આવશે. સાથે જ ડિજિટલ ગુજરાત પોર્ટલ અને જન સેવા કેન્દ્રો પર પણ આ એક જ ફોર્મેટનો ઉપયોગ કરીને નાગરિકોને સરળ સેવા આપવામાં આવશે.

સરકારના જણાવ્યા મુજબ અત્યાર સુધીમાં અલગ-અલગ વિભાગોમાં જુદી જુદી યોજનાઓ, પ્રમાણપત્રો અને સેવાઓ માટે નાગરિકોને અલગ પ્રકારના સોગંદનામાં રજૂ કરવા પડતા હતા. આ વિવિધતા કારણે સામાન્ય નાગરિકોને દસ્તાવેજ તૈયાર કરાવવામાં મુશ્કેલી પડતી હતી, સમયનો વ્યય થતો હતો અને ઘણી વખત વહીવટી પ્રક્રિયામાં વિલંબ પણ થતો હતો. આ પરિસ્થિતિ દૂર કરવા માટે આ નવો નિર્ણય લેવામાં આવ્યો છે.

નવા નિયમ મુજબ જે સેવાઓમાં કાયદાકીય રીતે એફિડેવિટ જરૂરી નથી, ત્યાં હવે માત્ર સ્વઘોષણા (Self Declaration) આધારિત સરળ પ્રક્રિયા જ અમલમાં રહેશે. એટલે કે આવા કેસોમાં સોગંદનામું ફરજિયાત નહીં રહે.

કાયદા વિભાગ દ્વારા તૈયાર કરાયેલ આ યુનિવર્સલ એફિડેવિટ ફોર્મેટને ગુજરાતી અને અંગ્રેજી બંને ભાષામાં ઉપલબ્ધ બનાવવામાં આવ્યું છે, જેથી નાગરિકો સરળતાથી તેનો ઉપયોગ કરી શકે. આ ફોર્મેટમાં મૂળભૂત માહિતી, ઓળખ વિગતો અને ઘોષણા સંબંધિત સામાન્ય મુદ્દાઓનો સમાવેશ કરવામાં આવ્યો છે, જેથી દરેક પ્રકારની સરકારી સેવા માટે તેનો ઉપયોગ શક્ય બને.

આ નિર્ણયને વહીવટી સુધારાની દિશામાં એક મહત્વપૂર્ણ પગલું માનવામાં આવી રહ્યું છે. ખાસ કરીને સામાન્ય નાગરિકો, ગ્રામ્ય વિસ્તારના લોકો અને ડિજિટલ સેવા કેન્દ્રોનો ઉપયોગ કરનાર લોકો માટે હવે દસ્તાવેજી પ્રક્રિયા વધુ સરળ બનશે.

સરકારી વર્તુળોના મતે આ નવી વ્યવસ્થાથી “એક રાજ્ય – એક ફોર્મેટ”ની દિશામાં મહત્વપૂર્ણ પ્રગતિ થશે અને વહીવટી પ્રક્રિયામાં પારદર્શિતા તથા ઝડપ બંનેમાં વધારો થશે. નાગરિકોને હવે અલગ-અલગ વિભાગો માટે અલગ એફિડેવિટ બનાવવાની ફરજ નહીં રહે, જે સમય અને ખર્ચ બંનેમાં બચત કરશે.