મારું શહેર જામનગરના સેવાભાવી યુવા અગ્રણી અને પત્રકાર રાજેશભાઈ પરમારે જન્મદિવસને બનાવ્યો સેવાનો ઉત્સવ, બાળકો અને જરૂરિયાતમંદોના ચહેરા પર સ્મિત રેલાવ્યું.

જન્મદિવસની ઉજવણી કેક કાપીને કે ભવ્ય પાર્ટીઓ યોજીને કરવાની પરંપરાથી અલગ જઈને જામનગરના જાણીતા સેવાભાવી યુવા અગ્રણી અને પત્રકાર રાજેશભાઈ પરમારે આ વર્ષે પણ પોતાના જન્મદિવસને સમાજસેવાના કાર્ય સાથે જોડીને અનોખી રીતે ઉજવ્યો હતો. પોતાના ખાસ દિવસને સમાજના વંચિત અને જરૂરિયાતમંદ લોકો માટે સમર્પિત કરીને તેમણે ફરી એકવાર માનવસેવાનો સંદેશ આપ્યો હતો. તેમની આ પહેલને વિવિધ વર્ગના લોકો દ્વારા બિરદાવવામાં આવી રહી છે.

દર વર્ષની જેમ આ વર્ષે પણ રાજેશભાઈ પરમારે સેવાકીય પરંપરા જાળવી રાખી હતી. તેમણે ઝૂંપડપટ્ટી વિસ્તારમાં વસતા જરૂરિયાતમંદ પરિવારોને ભોજન પીરસીને માનવતાનું ઉત્તમ ઉદાહરણ પૂરું પાડ્યું હતું. સાથે જ સરકારી શાળામાં અભ્યાસ કરતા વિદ્યાર્થીઓ માટે પૌષ્ટિક નાસ્તાની વ્યવસ્થા કરવામાં આવી હતી, જેથી બાળકોને પોષણયુક્ત આહાર મળી રહે. આ સેવા પ્રવૃત્તિ દરમિયાન બાળકો અને સ્થાનિકોમાં ખુશીનો માહોલ જોવા મળ્યો હતો.

આ ઉપરાંત આંગણવાડીમાં અભ્યાસ કરતા નાના ભુલકાંઓને શૈક્ષણિક રમકડાં અને વિવિધ રમકડાંની કિટ્સનું વિતરણ કરવામાં આવ્યું હતું. રમકડાં માત્ર મનોરંજન પૂરતા મર્યાદિત ન રહે પરંતુ બાળકોના બૌદ્ધિક વિકાસમાં પણ ઉપયોગી સાબિત થાય તેવો ખાસ વિચાર રાખીને તેમની પસંદગી કરવામાં આવી હતી. રમતા-રમતા બાળકો નવી બાબતો શીખે અને તેમના સર્વાંગી વિકાસમાં મદદ મળે તેવો આ પ્રયાસ હતો.

બાળકોને આપવામાં આવેલા રમકડાંમાં ૧થી ૧૦ સુધીના આંકડા ઓળખતા શૈક્ષણિક મોડલ, A to Z અંગ્રેજી અક્ષરો શીખવતા સેટ, જેસીબી, ટ્રક, કાર, પોલીસ કાર, ફાયર બ્રિગેડ, ૧૦૮ એમ્બ્યુલન્સ, સ્કૂલ બસ અને મિલિટરી વાહનોના મોડેલનો સમાવેશ કરવામાં આવ્યો હતો. ઉપરાંત પાલતુ અને જંગલી પ્રાણીઓ, દરિયાઈ જીવો, વિવિધ પક્ષીઓ, ફળોની ઓળખ કરાવતા રમકડાં, નાની બાળકીઓ માટે રસોડાના વાસણોના સેટ, કેન્ડી ફ્લેવર સેટ, બાર્બી ડોલ, માઇન્ડ ગેમ્સ તેમજ સ્પોર્ટ્સ સાધનોની ઓળખ કરાવતા રમકડાં પણ બાળકોને ભેટરૂપે આપવામાં આવ્યા હતા.

આ રમકડાં અને શૈક્ષણિક સામગ્રી મળતાં નાના બાળકોના ચહેરા પર ખુશીની અનોખી ઝલક જોવા મળી હતી. બાળકો ઉત્સાહપૂર્વક રમકડાં સાથે રમતા જોવા મળ્યા હતા અને શિક્ષકો તેમજ વાલીઓએ પણ આ પહેલની પ્રશંસા કરી હતી. શિક્ષણ અને મનોરંજનનું સંયોજન ધરાવતા આ ઉપહારો બાળકોના શૈક્ષણિક વિકાસમાં પણ ઉપયોગી બનશે તેવી આશા વ્યક્ત કરવામાં આવી હતી.

રાજેશભાઈ પરમાર અગાઉ પણ અનેક સમાજોપયોગી કાર્યો માટે જાણીતા રહ્યા છે. બે વર્ષ પહેલાં તેમણે પોતાના જન્મદિવસ નિમિત્તે રક્તદાન કેમ્પ અને સર્વરોગ નિદાન કેમ્પનું આયોજન કરીને અનેક લોકોને લાભ પહોંચાડ્યો હતો. જ્યારે ગત વર્ષે વિશ્વપ્રસિદ્ધ શ્રી બાલા હનુમાન મંદિરમાં અખંડ રામધૂનના ૬૨મા વર્ષના પ્રારંભ પ્રસંગે વિશેષ રામધૂનનું આયોજન કરીને ધાર્મિક અને સામાજિક સેવા સાથે જોડાયેલી અનોખી ઉજવણી કરી હતી.

સમાજના તમામ વર્ગોને સાથે લઈને સેવા કરવાના સંકલ્પ સાથે કાર્યરત રાજેશભાઈ પરમારે ફરી એકવાર સાબિત કર્યું છે કે જન્મદિવસ માત્ર વ્યક્તિગત ખુશીનો દિવસ નહીં, પરંતુ સમાજને કંઈક પરત આપવાનો અવસર પણ બની શકે છે. તેમની આ પ્રેરણાદાયી પહેલથી અનેક યુવાનોને પણ જન્મદિવસ જેવા પ્રસંગોને સમાજસેવા સાથે જોડવાની પ્રેરણા મળી રહી છે. તેમના આ સેવાભાવી કાર્યને શહેરના વિવિધ સામાજિક અગ્રણીઓ અને નાગરિકોએ પણ હૃદયપૂર્વક બિરદાવ્યું છે.