મારું ગુજરાત ગુજરાતમાં નશાબંધી વચ્ચે ડ્રગ્સનો વધતો કહેર!

3 વર્ષમાં 65,549 કિલો ડ્રગ્સ ઝડપાયું, 1,649 કેસ નોંધાયા; કોર્ટમાં સજા અપાવવામાં તંત્ર સામે સવાલો

અમદાવાદ: મહાત્મા ગાંધી અને સરદાર પટેલની ભૂમિ ગુજરાતમાં દાયકાઓથી નશાબંધીનો કાયદો અમલમાં છે. તેમ છતાં રાજ્યમાં ડ્રગ્સની હેરાફેરી અને કાળા કારોબારને લઈને ચોંકાવનારા આંકડા સામે આવ્યા છે. દરિયાઈ અને રોડ માર્ગે ગુજરાતમાં મોટા પ્રમાણમાં ડ્રગ્સ ઘૂસાડવામાં આવી રહ્યું હોવાના અહેવાલો વચ્ચે રાજ્ય ડ્રગ્સ માફિયાઓ માટે મહત્વનું ટ્રાન્ઝિટ પોઇન્ટ બની રહ્યું હોવાની ચિંતા વ્યક્ત થઈ રહી છે.

કેન્દ્રીય ગૃહ મંત્રાલયના જણાવ્યા અનુસાર, છેલ્લા ત્રણ વર્ષમાં ગુજરાતમાંથી 65,549 કિલો ડ્રગ્સ, ઉપરાંત 45,564 નશીલી ટેબ્લેટ્સ અને 4,841 લિટર પ્રવાહી ડ્રગ્સ જપ્ત કરવામાં આવ્યું છે. એટલું જ નહીં, છેલ્લા બે વર્ષ દરમિયાન રાજ્યમાંથી 121 કિલો કોકેઈન પણ ઝડપાયું હોવાનું જણાવાયું છે.

1,649 કેસ, પરંતુ સજા કેટલી?

ડ્રગ્સની મોટી માત્રામાં જપ્તી સામે કાયદાકીય કાર્યવાહી અંગે પણ સવાલો ઊભા થઈ રહ્યા છે. ઉપલબ્ધ આંકડા પ્રમાણે છેલ્લા ત્રણ વર્ષમાં ગુજરાતમાં ડ્રગ્સ સંબંધિત 1,649 કેસ નોંધાયા હતા.

આંકડાઓ દર્શાવે છે કે પોલીસ દ્વારા મોટા પ્રમાણમાં નશીલા પદાર્થો જપ્ત કરવામાં આવ્યા છે અને આરોપીઓ સામે કેસ પણ નોંધવામાં આવ્યા છે. પરંતુ ત્યારબાદની કોર્ટ પ્રક્રિયામાં દોષિત ઠરાવવાના પ્રમાણને લઈને ચિંતા વ્યક્ત થઈ રહી છે.

ડ્રગ્સનો જથ્થો ઝડપાયા બાદ પોલીસ અને વિવિધ તપાસ એજન્સીઓની કામગીરી સામે આવે છે, પરંતુ કેસને અદાલતમાં સફળતાપૂર્વક સાબિત કરીને આરોપીઓને સજા અપાવવી પણ એટલી જ મહત્વપૂર્ણ છે. પુરાવા એકત્ર કરવાની પ્રક્રિયા, તપાસની ગુણવત્તા, ચાર્જશીટ, સાક્ષીઓ અને કોર્ટમાં કેસની અસરકારક રજૂઆત જેવા મુદ્દાઓ અહીં મહત્વના બની જાય છે.

દરિયાઈ માર્ગથી ડ્રગ્સની હેરાફેરી મોટો પડકાર

ગુજરાતનો લાંબો દરિયાકિનારો અને આંતરરાષ્ટ્રીય દરિયાઈ વેપાર સાથેનું જોડાણ ડ્રગ્સની હેરાફેરી રોકવા માટે સુરક્ષા એજન્સીઓ માટે મોટો પડકાર ઊભો કરે છે. બીજી તરફ રોડ નેટવર્ક મારફતે પણ નશીલા પદાર્થોને રાજ્યના વિવિધ વિસ્તારોમાં પહોંચાડવાના પ્રયાસો થતા હોવાના કિસ્સાઓ સામે આવતા રહ્યા છે.

આ સ્થિતિમાં માત્ર ડ્રગ્સનો જથ્થો પકડી પાડવો પૂરતો નથી, પરંતુ આ સમગ્ર નેટવર્કના મુખ્ય સૂત્રધારો સુધી પહોંચવું અને અદાલતમાં મજબૂત પુરાવા સાથે સજા સુનિશ્ચિત કરવી વધુ મહત્વપૂર્ણ બની રહે છે.

ગુજરાતમાં નશાબંધી હોવા છતાં ડ્રગ્સની આટલી મોટી હેરાફેરીના આંકડાઓ સામે આવતા હવે સવાલ એ છે કે ડ્રગ્સના સપ્લાય નેટવર્કને મૂળથી નાબૂદ કરવા અને ઝડપાયેલા આરોપીઓને કાયદાની કસોટી પર સજા અપાવવા માટે તંત્ર વધુ અસરકારક પગલાં ક્યારે ભરશે?