મારું શહેર પ્રસંગ પૂરતું નહીં, જતન સાથેનું વૃક્ષારોપણ જ સાચું પર્યાવરણ સંરક્ષણ: માટેલ તાલુકા શાળામાં 127 વૃક્ષોનું વાવેતર.

માટેલ: પર્યાવરણનું સંરક્ષણ માત્ર એક દિવસના વૃક્ષારોપણ કાર્યક્રમથી શક્ય નથી, પરંતુ વાવેલા વૃક્ષોને સતત સાચવીને, ઉછેરીને અને તેનું સંવર્ધન કરીને જ સાચા અર્થમાં હરિયાળું ભવિષ્ય બનાવી શકાય છે. આ જ સંદેશ સાથે માટેલ તાલુકા શાળાએ પર્યાવરણ પ્રત્યે પોતાની પ્રતિબદ્ધતા દર્શાવતા શાળા પરિસરમાં 127 વૃક્ષોનું વાવેતર કર્યું છે. એલ એન્ડ ટી કન્સ્ટ્રક્શનના સહયોગથી યોજાયેલ આ વૃક્ષારોપણ અભિયાનમાં વિદ્યાર્થીઓ, શિક્ષકો અને શાળા પરિવારના સભ્યોએ ઉત્સાહપૂર્વક ભાગ લીધો હતો.

શાળાના આચાર્ય કિશોરભાઈ સરવૈયાના માર્ગદર્શન હેઠળ યોજાયેલા આ કાર્યક્રમનો મુખ્ય ઉદ્દેશ માત્ર વૃક્ષો વાવવાનો નહીં પરંતુ વિદ્યાર્થીઓમાં પર્યાવરણ પ્રત્યે જવાબદારીની ભાવના વિકસાવવાનો હતો. કાર્યક્રમ દરમિયાન વિદ્યાર્થીઓને વૃક્ષોનું માનવજીવનમાં મહત્વ, પર્યાવરણ સંતુલન જાળવવામાં વૃક્ષોની ભૂમિકા અને વાવેલા વૃક્ષોની યોગ્ય રીતે કાળજી રાખવાની જરૂરિયાત અંગે માર્ગદર્શન આપવામાં આવ્યું હતું.

આ પ્રસંગે શાળાના શિક્ષકો ખાંદલા વિનોદભાઈ, પટેલ મિત્તલબેન, પટેલ આશાબેન, માસ્ટર શ્વેતાબેન, પરમાર જીજ્ઞેશભાઈ અને કંડોળીયા મંજુલાબેન સહિત સમગ્ર સ્ટાફ તેમજ 713 જેટલા વિદ્યાર્થીઓ જોડાયા હતા. સૌએ સાથે મળીને વૃક્ષારોપણ કર્યું હતું અને વાવેલા છોડના નિયમિત જતન તથા સિંચાઈ કરવાની જવાબદારી નિભાવવાનો સંકલ્પ લીધો હતો.

આચાર્ય કિશોરભાઈ સરવૈયાએ જણાવ્યું હતું કે શાળામાં વૃક્ષારોપણને માત્ર ઔપચારિક કાર્યક્રમ તરીકે લેવામાં આવતું નથી. અહીં વાવેલા દરેક વૃક્ષની નિયમિત દેખરેખ રાખવામાં આવે છે અને તેના વિકાસ માટે સતત પ્રયાસો કરવામાં આવે છે. તેમણે જણાવ્યું કે અગાઉના વર્ષોમાં પણ શાળા પરિસરમાં કુલ 275 જેટલા વૃક્ષોનું વાવેતર કરવામાં આવ્યું હતું.

તેમણે વધુમાં જણાવ્યું કે કુદરતી આફતો અને વિવિધ પરિસ્થિતિઓને કારણે કેટલાક વૃક્ષોને નુકસાન થયું હોવા છતાં શાળાએ પર્યાવરણ સંરક્ષણની કામગીરી અટકાવી નથી. સતત જતન અને સંભાળના પરિણામે આજે શાળા પરિસરમાં 32 જેટલા વૃક્ષો વિશાળ અને ઘટાદાર બની વિદ્યાર્થીઓને ઠંડકભર્યો છાંયો, શુદ્ધ હવા અને સુંદર વાતાવરણ આપી રહ્યા છે.

વૃક્ષારોપણ કાર્યક્રમ દરમિયાન શિક્ષકો, વિદ્યાર્થીઓ અને એલ એન્ડ ટી કન્સ્ટ્રક્શનના પ્રતિનિધિઓએ માત્ર છોડ રોપવાની કામગીરી જ નહીં પરંતુ તેની આસપાસની સફાઈ, પાણી આપવાની વ્યવસ્થા અને સંભાળની કામગીરી પણ કરી હતી. શાળા દ્વારા આગામી દિવસોમાં પણ આ વૃક્ષોના વિકાસ માટે નિયમિત આયોજન કરવામાં આવશે.

માટેલ તાલુકા શાળાનો આ પ્રયાસ માત્ર હરિયાળી વધારવાનો ઉપક્રમ નથી, પરંતુ નવી પેઢીમાં પ્રકૃતિપ્રેમ, પર્યાવરણ જાગૃતિ અને સામાજિક જવાબદારીના સંસ્કારોનું સિંચન કરતો પ્રેરણાદાયી પ્રયાસ છે. વૃક્ષારોપણ સાથે તેના જતનનો સંદેશ આપતી આ પહેલ અન્ય શાળાઓ અને સંસ્થાઓ માટે પણ એક ઉત્તમ ઉદાહરણ બની રહી છે.