મારું ગુજરાત ગુજરાતમાં વરસાદની અસમાનતા યથાવત્: 9 જિલ્લામાં 30%થી વધુ ઘટ, દેવભૂમિ દ્વારકામાં સૌથી વધુ 81% અછત.
ગુજરાતમાં ચાલુ ચોમાસાની સિઝનમાં અત્યાર સુધીમાં સરેરાશ 25 ઈંચ વરસાદ સાથે મોસમનો આશરે 70 ટકા વરસાદ નોંધાયો છે. જોકે, રાજ્યના વિવિધ વિસ્તારોમાં વરસાદનું વિતરણ અસમાન રહેતા ચિંતાની સ્થિતિ જોવા મળી રહી છે. રાજ્યના 14 જિલ્લાઓમાં હજુ વરસાદની ઘટ છે, જેમાં 9 જિલ્લાઓમાં 30 ટકાથી પણ વધુ વરસાદી ઘટ નોંધાઈ છે.
દેવભૂમિ દ્વારકામાં સૌથી વધુ વરસાદની ઘટ
વરસાદના આંકડા મુજબ દેવભૂમિ દ્વારકા જિલ્લામાં સૌથી વધુ 81 ટકા વરસાદની ઘટ નોંધાઈ છે. જિલ્લામાં અત્યાર સુધીમાં સરેરાશ માત્ર 2.06 ઈંચ એટલે કે સિઝનના આશરે 6.24 ટકા જેટલો વરસાદ નોંધાયો છે.
આ ઉપરાંત પોરબંદરમાં 67 ટકા જેટલી વરસાદની ઘટ છે. જ્યારે જામનગર, કચ્છ, અરવલ્લી, સાબરકાંઠા, દાહોદ અને ગીર સોમનાથ સહિતના જિલ્લાઓમાં પણ વરસાદની અછત જોવા મળી રહી છે.
દક્ષિણ ગુજરાતમાં સૌથી વધુ વરસાદ
રાજ્યના અલગ-અલગ પ્રદેશોની વાત કરીએ તો દક્ષિણ ગુજરાતમાં મેઘરાજાએ સૌથી વધુ મહેર કરી છે. અહીં અત્યાર સુધીમાં 58.83 ઈંચ સાથે મોસમનો આશરે 97 ટકા વરસાદ નોંધાયો છે.
જ્યારે અન્ય વિસ્તારોમાં વરસાદની સ્થિતિ આ પ્રમાણે છે:
- દક્ષિણ ગુજરાત: 58.83 ઈંચ — 97%
- પૂર્વ-મધ્ય ગુજરાત: 15.10 ઈંચ — 67%
- સૌરાષ્ટ્ર: 16.37 ઈંચ — 54.58%
- ઉત્તર ગુજરાત: 14.78 ઈંચ — 51.39%
- કચ્છ: 5.71 ઈંચ — માત્ર 29%
કચ્છ અને ઉત્તર ગુજરાતમાં સારા વરસાદની રાહ
રાજ્યમાં એક તરફ દક્ષિણ ગુજરાતમાં સિઝનનો મોટાભાગનો વરસાદ પડી ચૂક્યો છે, તો બીજી તરફ કચ્છ અને ઉત્તર ગુજરાતમાં હજુ પણ સારા વરસાદની રાહ જોવાઈ રહી છે. વરસાદના આ અસમાન વિતરણની અસર કૃષિ અને જળસંચય પર પડવાની શક્યતા છે.
ખાસ કરીને જે જિલ્લાઓમાં 30 ટકાથી વધુ વરસાદની ઘટ છે ત્યાં આગામી દિવસોમાં સારો વરસાદ નહીં થાય તો પાકની સ્થિતિ, પીવાના પાણીની ઉપલબ્ધતા અને જળાશયોના પાણીના સ્તર પર તેની અસર જોવા મળી શકે છે.
હાલ રાજ્યમાં સરેરાશ 70 ટકા વરસાદ નોંધાયો હોવા છતાં જિલ્લાવાર વરસાદમાં રહેલી મોટી અસમાનતા આગામી ચોમાસાના દિવસોમાં મહત્વપૂર્ણ બની રહેશે. ખેડૂતો અને વહીવટી તંત્રની નજર હવે આગામી વરસાદી સિસ્ટમ પર ટકેલી છે.
