મારું શહેર આરોગ્ય મંત્રી પ્રફુલ પાનશેરીયાની અધ્યક્ષતામાં જામનગર તાલુકાની 8 શાળાઓમાં શાળા પ્રવેશોત્સવ-2026ની ભવ્ય ઉજવણી.

175 નવપ્રવેશી વિદ્યાર્થીઓને શૈક્ષણિક કીટ આપી કરાયો ઉષ્માભર્યો આવકાર, કન્યા કેળવણી દ્વારા દીકરીઓના સશક્તિકરણનો સંદેશ

જામનગર, તા. 24 જૂન :
ગુજરાત સરકાર દ્વારા સમગ્ર રાજ્યમાં આયોજિત શાળા પ્રવેશોત્સવ અને કન્યા કેળવણી મહોત્સવ-2026 અંતર્ગત જામનગર તાલુકાની વિવિધ શાળાઓમાં ઉત્સાહ, આનંદ અને શૈક્ષણિક જાગૃતિના વાતાવરણ વચ્ચે કાર્યક્રમોની ઉજવણી કરવામાં આવી હતી. રાજ્યના આરોગ્ય મંત્રી શ્રી પ્રફુલ પાનશેરીયાના અધ્યક્ષસ્થાને દડિયા પ્રાથમિક શાળા, એચ.એમ. નંદા માધ્યમિક શાળા તથા નાઘુના પ્રાથમિક શાળા ખાતે આયોજિત કાર્યક્રમોમાં કુલ 175 જેટલા બાળકોને શૈક્ષણિક કીટ અર્પણ કરીને શાળામાં આવકારવામાં આવ્યા હતા.

કાર્યક્રમ દરમિયાન આરોગ્ય મંત્રીશ્રીએ જણાવ્યું હતું કે શાળા પ્રવેશોત્સવ માત્ર એક ઔપચારિક કાર્યક્રમ નથી, પરંતુ દરેક બાળકના જીવનમાં જ્ઞાન, વિકાસ અને ઉજ્જવળ ભવિષ્ય તરફનું પ્રથમ પગલું છે. રાજ્ય સરકાર શિક્ષણને સર્વોચ્ચ પ્રાથમિકતા આપી રહી છે અને દરેક બાળકને ગુણવત્તાયુક્ત, આધુનિક તથા સર્વસમાવેશક શિક્ષણ ઉપલબ્ધ થાય તે માટે સતત પ્રયાસો કરી રહી છે.

તેમણે જણાવ્યું હતું કે કન્યા કેળવણી મહોત્સવ દીકરીઓના શિક્ષણ અને સશક્તિકરણ માટેનું એક મહત્વપૂર્ણ અભિયાન છે. છેલ્લા કેટલાક વર્ષોમાં ગુજરાતમાં દીકરીઓના શિક્ષણ પ્રત્યે જાગૃતિમાં નોંધપાત્ર વધારો થયો છે અને આજે દીકરીઓ શિક્ષણ, વિજ્ઞાન, રમતગમત, વહીવટ, આરોગ્ય અને ઉદ્યોગ જેવા વિવિધ ક્ષેત્રોમાં પોતાની પ્રતિભા સાબિત કરી રહી છે.

મંત્રીશ્રીએ ભારપૂર્વક જણાવ્યું કે શાળાના દ્વારે પ્રવેશ કરતું દરેક બાળક આવનારા વિકસિત ભારત અને આત્મનિર્ભર ગુજરાતના નિર્માણમાં મહત્વપૂર્ણ ભૂમિકા ભજવશે. શિક્ષણ એવી શક્તિ છે, જે સામાન્ય પરિવારમાં જન્મેલા બાળકને પણ જીવનમાં અસાધારણ સફળતા પ્રાપ્ત કરવાની તક આપે છે.

તેમણે જણાવ્યું કે શાળા પ્રવેશોત્સવ અને કન્યા કેળવણી અભિયાનનો પાયો વડાપ્રધાન શ્રી નરેન્દ્ર મોદીએ ગુજરાતના મુખ્યમંત્રી તરીકે કાર્યરત હતા ત્યારે નાખ્યો હતો. આ અભિયાનનો મુખ્ય ઉદ્દેશ રાજ્યના દરેક બાળકને શિક્ષણની મુખ્ય ધારામાં જોડવાનો અને ખાસ કરીને દીકરીઓના શિક્ષણને પ્રોત્સાહન આપવાનો હતો. આજે મુખ્યમંત્રી શ્રી ભૂપેન્દ્ર પટેલના નેતૃત્વ હેઠળ આ અભિયાન વધુ વ્યાપક અને અસરકારક બન્યું છે.

રાજ્ય સરકાર દ્વારા શિક્ષણ ક્ષેત્રે અનેક સુધારાત્મક પગલાં લેવામાં આવ્યા હોવાનું જણાવતાં મંત્રીશ્રીએ કહ્યું કે શાળાઓમાં આધુનિક માળખાકીય સુવિધાઓ, સ્માર્ટ ક્લાસરૂમ, ડિજિટલ શિક્ષણ, ગુણવત્તાયુક્ત શિક્ષણ સામગ્રી અને વિદ્યાર્થીઓને અનુકૂળ વાતાવરણ ઉપલબ્ધ કરાવવા માટે સતત કામગીરી કરવામાં આવી રહી છે.

દડિયા પ્રાથમિક શાળા ખાતે યોજાયેલા કાર્યક્રમમાં આંગણવાડી, બાલવાટિકા, દડિયા પ્રાથમિક શાળા તથા ગણેશનગર પ્રાથમિક શાળાના કુલ 63 વિદ્યાર્થીઓને શૈક્ષણિક કીટ અર્પણ કરીને આવકારવામાં આવ્યા હતા. એચ.એમ. નંદા માધ્યમિક શાળામાં ધોરણ-9માં પ્રવેશ મેળવનાર 52 વિદ્યાર્થીઓ ઉપરાંત આંગણવાડીના 6, બાલવાટિકાના 10 અને નારણપુર તાલુકા શાળાના 6 વિદ્યાર્થીઓ મળી કુલ 74 વિદ્યાર્થીઓનું સ્વાગત કરવામાં આવ્યું હતું.

તે જ રીતે નાઘુના પ્રાથમિક શાળા ખાતે યોજાયેલા કાર્યક્રમમાં નાઘુના પ્રાથમિક શાળા, નવા નાઘુના પ્રાથમિક શાળા, નવસર્જન ઉત્તર બુનિયાદી વિદ્યાલય, આંગણવાડી તથા બાલવાટિકાના મળી કુલ 38 બાળકોને શૈક્ષણિક કીટ આપી શાળામાં પ્રવેશ અપાવવામાં આવ્યો હતો.

આમ ત્રણેય સ્થળોએ મળીને કુલ 175 વિદ્યાર્થીઓને મહાનુભાવોના હસ્તે શૈક્ષણિક કીટ અર્પણ કરીને શિક્ષણયાત્રાની શુભ શરૂઆત કરાવવામાં આવી હતી.

કાર્યક્રમ દરમિયાન શૈક્ષણિક ક્ષેત્રે ઉત્કૃષ્ટ પ્રદર્શન કરનાર વિદ્યાર્થીઓ તેમજ વિવિધ સ્પર્ધાત્મક પરીક્ષાઓમાં સફળતા મેળવનાર વિદ્યાર્થીઓનું પ્રમાણપત્ર આપી સન્માન કરવામાં આવ્યું હતું. આ સન્માનથી અન્ય વિદ્યાર્થીઓમાં પણ પ્રેરણા અને ઉત્સાહનો સંચાર થયો હતો.

કાર્યક્રમમાં વિદ્યાર્થીઓ દ્વારા સ્વચ્છતા અભિયાન, પર્યાવરણ સંરક્ષણ, વૃક્ષોનું મહત્વ અને સામાજિક જવાબદારી જેવા વિષયો પર અસરકારક પ્રવચનો રજૂ કરવામાં આવ્યા હતા. ઉપરાંત દેશભક્તિ, સંસ્કાર અને શિક્ષણના મહત્વને ઉજાગર કરતી સાંસ્કૃતિક કૃતિઓએ સૌનું ધ્યાન આકર્ષિત કર્યું હતું.

પર્યાવરણ પ્રત્યે જાગૃતિ ફેલાવવા માટે કાર્યક્રમના અંતે મહાનુભાવો દ્વારા વૃક્ષારોપણ કરવામાં આવ્યું હતું. ઉપસ્થિત મહાનુભાવોએ વિદ્યાર્થીઓને વધુમાં વધુ વૃક્ષો વાવવા અને પર્યાવરણની જાળવણી માટે યોગદાન આપવા અપીલ કરી હતી.

આ કાર્યક્રમોમાં ધારાસભ્ય શ્રી રાઘવજીભાઈ પટેલ, હાપા માર્કેટિંગ યાર્ડના ચેરમેન શ્રી મુકુંદ સભાયા, અગ્રણી શ્રી ડો. વિનોદભાઈ ભંડેરી, ગુજરાત રાજ્ય પ્રાથમિક શિક્ષક સંઘના પ્રમુખ શ્રી દિગ્વિજયસિંહ જાડેજા, તાલુકા પંચાયતના સભ્ય શ્રીમતી હીનાબેન હરવરા, દડિયા ગામના સરપંચ શ્રી રાજેશભાઈ, જિલ્લા પંચાયત અને તાલુકા પંચાયતના સભ્યો, એસએમસી અધ્યક્ષ શ્રી કમલેશ હરવરા, વિવિધ શાળાઓના આચાર્યશ્રીઓ, શિક્ષકો, આગેવાનો, ગ્રામજનો અને મોટી સંખ્યામાં વિદ્યાર્થીઓ ઉપસ્થિત રહ્યા હતા.

શાળા પ્રવેશોત્સવ અને કન્યા કેળવણી મહોત્સવના આ કાર્યક્રમો દ્વારા શિક્ષણ પ્રત્યે જાગૃતિ, દીકરીઓના શિક્ષણનું મહત્વ અને સમાજની ભાગીદારીનો મજબૂત સંદેશ પ્રસર્યો હતો. કાર્યક્રમ દરમિયાન સમગ્ર વાતાવરણ શૈક્ષણિક ઉત્સાહ અને ઉજ્જવળ ભવિષ્યના સંકલ્પથી ગુંજી ઉઠ્યું હતું.