ક્રાઇમ ખમીદાણા ગામની સીમમાં ચણાના ઢગલામાં સંતાડેલો રૂ. 2.52 લાખનો વિદેશી દારૂ ઝડપાયો : કેશોદ પોલીસની મધરાતે મોટી કાર્યવાહી.
337 બોટલ સાથે 21 વર્ષીય યુવક ઝડપાયો, રાજસ્થાનથી પીકઅપ બોલેરોમાં દારૂ લાવ્યાની કબૂલાત
કેશોદ :
જૂનાગઢ જિલ્લા પોલીસ દ્વારા દારૂ અને જુગાર જેવી ગેરકાયદેસર પ્રવૃત્તિઓ સામે ચલાવવામાં આવી રહેલી વિશેષ ઝુંબેશ અંતર્ગત કેશોદ પોલીસને મધરાતે નોંધપાત્ર સફળતા મળી છે. કેશોદ તાલુકાના ખમીદાણા ગામની સીમમાં આવેલા એક ખેતરમાં ચણાના ઢગલામાં સંતાડીને રાખવામાં આવેલ રૂ. 2,52,146 કિંમતનો ભારતીય બનાવટનો વિદેશી દારૂનો જથ્થો પોલીસે ઝડપી પાડ્યો છે. આ કાર્યવાહી દરમિયાન 337 બોટલ દારૂ સાથે એક યુવકની ધરપકડ કરવામાં આવી છે, જ્યારે દારૂ સપ્લાય કરનાર મુખ્ય આરોપી હાલ ફરાર હોવાનું જાણવા મળ્યું છે.
પ્રાપ્ત માહિતી અનુસાર, જૂનાગઢ જિલ્લા પોલીસ અધિક્ષક સુબોધ ઓડેદરા અને ઇન્ચાર્જ નાયબ પોલીસ અધિક્ષક નીલેશ ધાધલીયાના માર્ગદર્શન હેઠળ જિલ્લામાં દારૂ અને જુગારની પ્રવૃત્તિઓને નેસ્તનાબૂદ કરવા માટે વિશેષ અભિયાન ચલાવવામાં આવી રહ્યું છે. બીજી તરફ આગામી મોહરમ તહેવારને ધ્યાનમાં રાખીને પોલીસ દ્વારા રાઉન્ડ ધ ક્લોક પેટ્રોલિંગ પણ કરવામાં આવી રહ્યું છે.
કેશોદ પોલીસ સ્ટેશનના પોલીસ ઇન્સ્પેક્ટર એમ.ડી. ચૌધરીની સૂચના મુજબ પોલીસ સ્ટાફ ખાનગી વાહનમાં વિસ્તારમાં પેટ્રોલિંગ કરી રહ્યો હતો ત્યારે બાતમીદાર મારફતે ચોક્કસ માહિતી મળી હતી કે ખમીદાણા ગામની સીમમાં આવેલ નરશીભાઈ સાજણભાઈ રાઠોડના ખેતરમાં મોટી માત્રામાં વિદેશી દારૂ સંતાડી રાખવામાં આવ્યો છે અને તેની હેરાફેરી કરવાની તૈયારી ચાલી રહી છે.
માહિતીના આધારે પોલીસે પંચોની હાજરીમાં તાત્કાલિક રેડ ગોઠવી હતી. ખેતરમાં પહોંચતા ચણાના ઢગલા નજીક એક શંકાસ્પદ યુવક કંઈક હેરફેર કરતો જોવા મળ્યો હતો. પોલીસને જોઈ યુવક ખુલ્લા ખેતરમાં ભાગવાનો પ્રયાસ કર્યો હતો, પરંતુ પોલીસે પીછો કરીને તેને ઝડપી લીધો હતો.
પકડાયેલા યુવકે પોતાની ઓળખ ગૌરવભાઈ દેવજીભાઈ મારૂ (ઉંમર 21 વર્ષ), રહેવાસી ચર ગામ, તાલુકો કેશોદ તરીકે આપી હતી. ત્યારબાદ પોલીસે ચણાના ઢગલાની તપાસ હાથ ધરી હતી. તપાસ દરમિયાન ઢગલાની અંદર છુપાવવામાં આવેલી દારૂની પેટીઓ મળી આવી હતી.
પોલીસે તમામ પેટીઓ બહાર કાઢીને તપાસ કરતા વિવિધ બ્રાન્ડની ભારતીય બનાવટની વિદેશી દારૂની કુલ 337 બોટલ મળી આવી હતી. જપ્ત કરાયેલા દારૂની કુલ કિંમત રૂ. 2,52,146 હોવાનું સામે આવ્યું હતું.
ગૌરવ મારૂ પાસે આ દારૂ રાખવા અંગે કોઈ કાયદેસર પાસ, પરમિટ કે અન્ય દસ્તાવેજો ન મળતા સમગ્ર જથ્થો કબ્જે લેવામાં આવ્યો હતો અને પંચનામાની કાર્યવાહી હાથ ધરવામાં આવી હતી.
પ્રાથમિક પૂછપરછ દરમિયાન આરોપી ગૌરવ મારૂએ મહત્વની કબૂલાત કરી હતી. તેણે જણાવ્યું હતું કે તે પોતાની પીકઅપ બોલેરો લઈને રાજસ્થાન ગયો હતો અને ઉદયપુર પંથકના બારવાળા ગામમાં રહેતા કુશાભાઈ નામના વ્યક્તિ પાસેથી દારૂ ખરીદીને ગુજરાત લાવ્યો હતો. ત્યારબાદ વેચાણ માટે ખમીદાણા ગામની સીમમાં આવેલા ખેતરમાં ચણાના ઢગલામાં સંતાડી રાખ્યો હતો.
પોલીસે આ મામલે ગૌરવ મારૂની ધરપકડ કરી છે, જ્યારે રાજસ્થાનના બારવાળા ગામના કુશાભાઈને આરોપી નંબર-2 તરીકે ગુનામાં સામેલ કર્યો છે. હાલ તે ફરાર હોવાથી તેને ઝડપી પાડવા માટે પોલીસે અલગ-અલગ ટીમો બનાવી તપાસ શરૂ કરી છે.
કેશોદ પોલીસ સ્ટેશનમાં બંને આરોપીઓ સામે ગુજરાત દારૂબંધી કાયદાની વિવિધ કલમો હેઠળ ગુનો નોંધવામાં આવ્યો છે. સમગ્ર કેસની વધુ તપાસ પોલીસ સબ ઇન્સ્પેક્ટર જે.આર. વાઝા ચલાવી રહ્યા છે.
પોલીસ અધિકારીઓનું માનવું છે કે આ માત્ર એક જથ્થો નહીં પરંતુ આંતરરાજ્ય દારૂ હેરાફેરીના મોટા નેટવર્કનો ભાગ હોઈ શકે છે. તેથી દારૂની ખરીદી, પરિવહન અને સપ્લાય ચેઇન સાથે સંકળાયેલા અન્ય લોકોની ભૂમિકા અંગે પણ તપાસ કરવામાં આવી રહી છે.
જૂનાગઢ જિલ્લા પોલીસે નાગરિકોને અપીલ કરી છે કે ગુજરાતમાં દારૂબંધી કાયદો અમલમાં છે અને કોઈપણ વ્યક્તિએ ગેરકાયદેસર રીતે દારૂનું વેચાણ, સંગ્રહ, પરિવહન કે સેવન કરવું નહીં. જો કોઈ વિસ્તારમાં આવી પ્રવૃત્તિ અંગે જાણકારી મળે તો તાત્કાલિક પોલીસને જાણ કરવી. માહિતી આપનારની ઓળખ સંપૂર્ણપણે ગુપ્ત રાખવામાં આવશે.
કેશોદ પોલીસની આ કાર્યવાહીથી દારૂના ધંધા સાથે સંકળાયેલા તત્વોમાં ફફડાટ ફેલાયો છે. પોલીસનું કહેવું છે કે નશામુક્ત સમાજના નિર્માણ માટે આવી ઝુંબેશ આગામી દિવસોમાં પણ વધુ સઘન રીતે ચાલુ રહેશે.
રિપોર્ટર શોભના બાલસ કેશોદ
