ટ્રાવેલ દેશભરમાં વરસાદનો કહેર: ગુજરાતથી મુંબઈ અને ઉત્તરાખંડ સુધી જળબંબાકાર, ભૂસ્ખલન-પૂરથી જનજીવન અસ્તવ્યસ્ત.

દેશભરમાં ચોમાસાએ હવે રૌદ્ર સ્વરૂપ ધારણ કર્યું છે. ગુજરાત, મહારાષ્ટ્ર, મધ્યપ્રદેશ અને ઉત્તરાખંડ સહિત અનેક રાજ્યોમાં ભારે વરસાદને કારણે જનજીવન ગંભીર રીતે પ્રભાવિત બન્યું છે. અનેક શહેરોમાં રસ્તાઓ નદીઓમાં ફેરવાઈ ગયા છે, નદીઓ ભયજનક સપાટીએ વહી રહી છે, જ્યારે ભૂસ્ખલન અને મકાન ધરાશાયી થવાની ઘટનાઓએ ચિંતા વધારી છે. વહીવટી તંત્ર દ્વારા વિવિધ વિસ્તારોમાં એલર્ટ જાહેર કરી બચાવ અને રાહત કામગીરી તેજ કરવામાં આવી છે.

અમદાવાદમાં ગઈકાલે આશરે ચાર ઈંચ વરસાદ નોંધાતા શહેરના અનેક વિસ્તારોમાં પાણી ભરાઈ ગયા હતા. અનેક મુખ્ય માર્ગો પર ટ્રાફિક જામ સર્જાયો હતો અને ચાર મહત્વના અંડરપાસને લગભગ ત્રણ કલાક માટે બંધ કરવાની ફરજ પડી હતી. વરસાદની સાથે જ શહેરના અનેક વિસ્તારોમાં રોડ બેસી જવાની ઘટનાઓ સામે આવી, જેના કારણે અમદાવાદ મ્યુનિસિપલ કોર્પોરેશનની પ્રી-મોન્સૂન કામગીરી સામે પણ સવાલો ઊભા થયા છે. સ્થાનિક લોકોને ભારે હાલાકીનો સામનો કરવો પડ્યો હતો.

મહારાષ્ટ્રના પુણેમાં પણ સતત વરસી રહેલા વરસાદને કારણે પૌડ રોડ વિસ્તારમાં પૂર જેવી સ્થિતિ સર્જાઈ છે. ઘૂંટણસમા પાણી ભરાઈ જતાં અનેક રહેણાંક વિસ્તારોમાં પાણી ઘૂસી ગયા હતા અને વાહનવ્યવહારને ભારે અસર પહોંચી હતી. બીજી તરફ મુંબઈ-પુણે એક્સપ્રેસવે પર ખાંડાલા એક્ઝિટ નજીક આવેલા 'મિસિંગ લિંક' પ્રોજેક્ટ વિસ્તારમાં ભારે વરસાદના કારણે મોટું ભૂસ્ખલન થયું હતું. પહાડ પરથી માટી અને વિશાળ પથ્થરો રોડ પર આવી પડતાં મુંબઈ તરફ જતી લેનને તાત્કાલિક બંધ કરી દેવામાં આવી હતી. રાહતની વાત એ છે કે આ ઘટનામાં જાનહાનિ થઈ નથી, પરંતુ કાટમાળ દૂર કરવા માટે તંત્ર દ્વારા યુદ્ધના ધોરણે કામગીરી હાથ ધરવામાં આવી છે.

ઉત્તરાખંડમાં સતત વરસાદને કારણે અલકનંદા નદીનું જળસ્તર ઝડપથી વધી રહ્યું છે. રુદ્રપ્રયાગ ખાતે આવેલો પ્રસિદ્ધ નમામિ ઘાટ સંપૂર્ણપણે પાણીમાં ડૂબી ગયો છે. જિલ્લા વહીવટીતંત્રે હાઈએલર્ટ જાહેર કરીને લોકોને નદી કિનારાથી દૂર રહેવા અને બિનજરૂરી મુસાફરી ટાળવા અપીલ કરી છે. નદીના વધતા પ્રવાહને ધ્યાનમાં રાખીને બચાવ દળોને પણ સતર્ક રાખવામાં આવ્યા છે.

મધ્યપ્રદેશના ઉજ્જૈનમાં પણ ભારે વરસાદ બાદ પવિત્ર શિપ્રા નદી ગાંડીતૂર બની છે. નદીમાં આવેલા પૂરને કારણે પ્રસિદ્ધ રામઘાટ સહિત આસપાસના અનેક નાના-મોટા મંદિરો પાણીમાં ગરકાવ થઈ ગયા છે. ધાર્મિક સ્થળોએ સુરક્ષાના ભાગરૂપે લોકોની અવરજવર પર નિયંત્રણ મૂકવામાં આવ્યું છે અને પ્રશાસન સતત સ્થિતિ પર નજર રાખી રહ્યું છે.

મુંબઈમાંથી વધુ એક દુઃખદ ઘટના સામે આવી છે. માંખુર્દના જનતા નગર વિસ્તારમાં ત્રણ માળનું મકાન અને તેની સાથે જોડાયેલી કેટલીક ઝૂંપડીઓ ધરાશાયી થઈ ગઈ હતી. આ દુર્ઘટનામાં 6 લોકોના કમકમાટીભર્યા મોત થયા છે, જ્યારે એક વ્યક્તિ ગંભીર રીતે ઘાયલ થતાં તેને સારવાર માટે હોસ્પિટલમાં દાખલ કરવામાં આવ્યો છે. બચાવ દળોએ કાટમાળમાંથી લોકોને બહાર કાઢવા માટે લાંબા સમય સુધી રાહત કામગીરી હાથ ધરી હતી.

હવામાન વિભાગે આગામી દિવસોમાં પણ ગુજરાત સહિત પશ્ચિમ અને મધ્ય ભારતના અનેક વિસ્તારોમાં ભારેથી અતિભારે વરસાદની શક્યતા વ્યક્ત કરી છે. નદી કિનારાના વિસ્તારોમાં રહેતા લોકો, પહાડી વિસ્તારોમાં મુસાફરી કરતા પ્રવાસીઓ તેમજ નીચાણવાળા વિસ્તારોના રહેવાસીઓને ખાસ સતર્ક રહેવા અને સ્થાનિક તંત્ર દ્વારા આપવામાં આવતી સૂચનાઓનું પાલન કરવા અપીલ કરવામાં આવી છે. સતત વરસી રહેલા વરસાદને કારણે આગામી દિવસોમાં પણ સ્થિતિ વધુ ગંભીર બની શકે તેવી શક્યતા વ્યક્ત કરવામાં આવી રહી છે.