સબરસ પીએમ મોદીએ આંધ્ર પ્રદેશને આપી ₹18,000 કરોડથી વધુના વિકાસ પ્રોજેક્ટ્સની ભેટ, કહ્યું- 'આંધ્રપ્રદેશ આજે ડબલ સ્પીડથી આગળ વધી રહ્યો છે'
પ્રધાનમંત્રી નરેન્દ્ર મોદીએ આજે આંધ્ર પ્રદેશના વિકાસને નવી ગતિ આપતા ₹18,000 કરોડથી વધુના વિવિધ વિકાસ પ્રોજેક્ટ્સનું ઉદ્ઘાટન અને શિલાન્યાસ કર્યું. આ કાર્યક્રમ દરમિયાન તેમણે ભોગાપુરમ ગ્રીનફિલ્ડ આંતરરાષ્ટ્રીય એરપોર્ટ સહિત રોડ, રેલવે, ઉર્જા અને અન્ય માળખાકીય વિકાસ સાથે જોડાયેલા અનેક મહત્વપૂર્ણ પ્રોજેક્ટ્સ દેશને સમર્પિત કર્યા. પ્રધાનમંત્રીએ જણાવ્યું કે કેન્દ્ર અને રાજ્ય સરકારના સંકલિત પ્રયાસોના કારણે આજે આંધ્ર પ્રદેશ વિકાસની નવી ઊંચાઈઓ સર કરી રહ્યો છે.
કાર્યક્રમને સંબોધતા પ્રધાનમંત્રી મોદીએ કહ્યું કે "આજે આંધ્ર પ્રદેશ ડબલ સ્પીડથી કામ કરી રહ્યું છે. વિકાસના દરેક ક્ષેત્રમાં ઝડપી ગતિએ પ્રગતિ થઈ રહી છે અને તેનો સીધો લાભ રાજ્યના સામાન્ય નાગરિકોને મળી રહ્યો છે." તેમણે જણાવ્યું કે આધુનિક ઈન્ફ્રાસ્ટ્રક્ચર કોઈપણ રાજ્યના આર્થિક વિકાસનો પાયો હોય છે અને કેન્દ્ર સરકાર દેશના દરેક રાજ્યમાં વિશ્વસ્તરીય સુવિધાઓ ઉભી કરવા પ્રતિબદ્ધ છે.
પ્રધાનમંત્રીએ ખાસ કરીને ભોગાપુરમ આંતરરાષ્ટ્રીય એરપોર્ટનો ઉલ્લેખ કરતાં કહ્યું કે આ એરપોર્ટ આંધ્ર પ્રદેશના પ્રવાસન, વેપાર, રોકાણ અને રોજગારી માટે નવો માર્ગ ખોલશે. એરપોર્ટ કાર્યરત બન્યા બાદ વિશાખાપટ્ટનમ અને ઉત્તર આંધ્ર પ્રદેશના વિકાસને વધુ વેગ મળશે તેમજ આંતરરાષ્ટ્રીય કનેક્ટિવિટી મજબૂત બનશે.
પીએમ મોદીએ પોતાના સંબોધનમાં દેશના એવિએશન સેક્ટરની પ્રગતિ પર પણ પ્રકાશ પાડ્યો. તેમણે જણાવ્યું કે છેલ્લા 12 વર્ષમાં ભારતમાં હવાઈ પરિવહન ક્ષેત્રમાં ઐતિહાસિક પરિવર્તન આવ્યું છે. દેશના એરપોર્ટોની સંખ્યા નોંધપાત્ર રીતે વધી છે, હવાઈ મુસાફરી સામાન્ય લોકો માટે વધુ સુલભ બની છે અને પ્રાદેશિક કનેક્ટિવિટી યોજનાઓના કારણે નાના શહેરો પણ હવે હવાઈ નેટવર્ક સાથે જોડાઈ રહ્યા છે.
તેમણે વધુમાં જણાવ્યું કે વિકસિત ભારતના સંકલ્પને સાકાર કરવા માટે આધુનિક એરપોર્ટ, હાઈવે, રેલવે, બંદરો અને ડિજિટલ ઈન્ફ્રાસ્ટ્રક્ચર પર સતત રોકાણ કરવામાં આવી રહ્યું છે. આંધ્ર પ્રદેશમાં શરૂ કરાયેલા નવા પ્રોજેક્ટ્સથી વેપારને પ્રોત્સાહન મળશે, ઔદ્યોગિક વિકાસને વેગ મળશે અને હજારો લોકોને રોજગારીની નવી તકો ઉપલબ્ધ થશે. કાર્યક્રમમાં કેન્દ્ર અને રાજ્ય સરકારના મંત્રીઓ, જનપ્રતિનિધિઓ તથા મોટી સંખ્યામાં નાગરિકો ઉપસ્થિત રહ્યા હતા.
