મારું શહેર IMDની ભારે વરસાદની ચેતવણી બાદ જામનગરના તમામ બંદરો પર લોકલ કૉશનરી સિગ્નલ-III લાગુ.
ભારતીય હવામાન વિભાગ (IMD) દ્વારા ગુજરાતના દરિયાકાંઠા વિસ્તારમાં ભારે વરસાદ, તીવ્ર પવન અને દરિયો તોફાની બનવાની આગાહીને ધ્યાનમાં રાખીને ગુજરાત મેરીટાઇમ બોર્ડ (GMB), જામનગરે મહત્વપૂર્ણ નિર્ણય લીધો છે. જામનગર જૂથ હેઠળ આવતા તમામ બંદરો પર લોકલ કૉશનરી સિગ્નલ-III (LCS-III) ફરકાવવામાં આવ્યું છે. આ ચેતવણી આગામી સૂચના સુધી અમલમાં રહેશે. આ અંગે ગુજરાત મેરીટાઇમ બોર્ડ, જામનગરના પોર્ટ ઓફિસરે સત્તાવાર માહિતી આપી છે.
IMDની તાજેતરની હવામાન ચેતવણી મુજબ આગામી કલાકોમાં દરિયાકાંઠાના વિસ્તારોમાં ભારે વરસાદ, તેજ પવન અને ઊંચા મોજાં ઊછળવાની શક્યતા છે. આ પરિસ્થિતિને ધ્યાનમાં રાખીને બંદર વિસ્તારની તમામ પ્રવૃત્તિઓ પર સતત નજર રાખવામાં આવી રહી છે. બંદર પર કાર્યરત અધિકારીઓ, કર્મચારીઓ તેમજ સંબંધિત એજન્સીઓને હાઈ એલર્ટ પર રાખવામાં આવ્યા છે જેથી કોઈપણ આપાતકાલીન સ્થિતિમાં તાત્કાલિક કાર્યવાહી કરી શકાય.
ગુજરાત મેરીટાઇમ બોર્ડે માછીમારો, વહાણ સંચાલકો, શિપિંગ એજન્સીઓ અને બંદર સાથે સંકળાયેલા તમામ લોકોને આગામી સૂચના સુધી સંપૂર્ણ સાવચેતી રાખવા અપીલ કરી છે. ખાસ કરીને નાના બોટ અને માછીમારીના વહાણોને દરિયામાં ન જવા તેમજ દરિયામાં રહેલા વહાણોને સુરક્ષિત સ્થળે પરત લાવવાની સલાહ આપવામાં આવી છે. હવામાન સામાન્ય ન થાય ત્યાં સુધી દરિયાઈ પ્રવૃત્તિઓમાં જરૂરી સાવચેતી રાખવા સૂચના આપવામાં આવી છે.
પોર્ટ ઓફિસરે જણાવ્યું છે કે હવામાનની સ્થિતિ પર સતત નજર રાખવામાં આવી રહી છે અને ભારતીય હવામાન વિભાગ તરફથી મળતી નવી સૂચનાઓના આધારે આગળના નિર્ણયો લેવામાં આવશે. બંદર વિસ્તાર સાથે સંકળાયેલા તમામ લોકોને સત્તાવાર સૂચનાઓનું પાલન કરવા અને કોઈપણ પ્રકારની અફવાઓથી દૂર રહેવાની અપીલ પણ કરવામાં આવી છે. નાગરિકોની સુરક્ષા અને દરિયાઈ પરિવહનની સલામતીને સર્વોચ્ચ પ્રાથમિકતા આપવામાં આવી રહી છે.
