મારું ગુજરાત બાળકોને માત્ર હોશિયાર નહીં, સારા અને જવાબદાર નાગરિક બનાવો: નાયબ મુખ્યમંત્રી હર્ષ સંઘવી.

વડોદરાની મહારાણી શાંતાદેવી પ્રાથમિક શાળામાં શાળા પ્રવેશોત્સવ અને કન્યા કેળવણી મહોત્સવની ભવ્ય ઉજવણી

વડોદરા, તા. 25: રાજ્ય સરકાર દ્વારા શિક્ષણના વ્યાપ અને ગુણવત્તામાં વધારો કરવા માટે રાજ્યભરમાં શાળા પ્રવેશોત્સવ અને કન્યા કેળવણી મહોત્સવની ઉજવણી કરવામાં આવી રહી છે. તેના ભાગરૂપે વડોદરા શહેરના ખોડીયાર નગર સ્થિત મહારાણી શાંતાદેવી પ્રાથમિક શાળા ખાતે નાયબ મુખ્યમંત્રી **હર્ષ સંઘવી**ના અધ્યક્ષસ્થાને અને મહિલા તથા બાળ કલ્યાણ મંત્રી **ડૉ. મનીષા વકીલ**ની પ્રેરક ઉપસ્થિતિમાં શાળા પ્રવેશોત્સવ અને કન્યા કેળવણી મહોત્સવની ઉત્સાહભેર ઉજવણી કરવામાં આવી હતી.

કાર્યક્રમમાં મોટી સંખ્યામાં વિદ્યાર્થીઓ, વાલીઓ, શિક્ષકો, શિક્ષણ સમિતિના અધિકારીઓ અને સ્થાનિક આગેવાનો ઉપસ્થિત રહ્યા હતા. સમગ્ર કાર્યક્રમ શિક્ષણ પ્રત્યે જાગૃતિ, બાળ વિકાસ અને ગુણવત્તાયુક્ત શિક્ષણના સંદેશ સાથે ઉજવાયો હતો.

આ પ્રસંગે નાયબ મુખ્યમંત્રી હર્ષ સંઘવીએ શિક્ષકોને સંબોધતા જણાવ્યું હતું કે વાલીઓ પોતાના બાળકોને ખૂબ વિશ્વાસ સાથે શિક્ષકોના હાથમાં સોંપે છે. તેથી શિક્ષકોની જવાબદારી માત્ર પાઠ્યપુસ્તકો ભણાવવાની નથી, પરંતુ બાળકના સમગ્ર વ્યક્તિત્વનું ઘડતર કરવાની છે. તેમણે જણાવ્યું કે એક સારો શિક્ષક બાળકના ભવિષ્યનો શિલ્પકાર હોય છે અને શિક્ષણ દ્વારા જ રાષ્ટ્રનું ભવિષ્ય ઘડાય છે.

તેમણે ભારપૂર્વક જણાવ્યું હતું કે બાળકોને માત્ર પરીક્ષામાં સારા ગુણ મેળવનારા વિદ્યાર્થીઓ બનાવવાના બદલે તેમને સારા, સંસ્કારી અને જવાબદાર નાગરિક બનાવવાની જરૂર છે. શિક્ષણનો હેતુ માત્ર નોકરી મેળવવાનો નહીં પરંતુ જીવન જીવવાની કળા શીખવવાનો હોવો જોઈએ.

નાયબ મુખ્યમંત્રીશ્રીએ કહ્યું કે બાળકો પર માત્ર અભ્યાસનું ભારણ ન લાદવું જોઈએ. તેમને રમતગમત, વિજ્ઞાન, સંગીત, કલા, સાહિત્ય અને અન્ય સર્જનાત્મક પ્રવૃત્તિઓ સાથે જોડવા જોઈએ. આવા સર્વાંગી વિકાસથી બાળકોમાં આત્મવિશ્વાસ વધે છે અને તેઓ જીવનમાં આવતી હાર-જીતનો સામનો કરવાની ક્ષમતા વિકસાવી શકે છે.

તેમણે વધુમાં જણાવ્યું કે આજના યુગમાં બાળકોને પુસ્તકના જ્ઞાન સાથે જીવન મૂલ્યોનું શિક્ષણ પણ એટલું જ જરૂરી છે. બાળકોમાં શિસ્ત, સ્વચ્છતા, દેશપ્રેમ, સંવેદનશીલતા અને સામાજિક જવાબદારી જેવા ગુણોનો વિકાસ કરવો સમયની માંગ છે.

વાલીઓને સંબોધતા હર્ષ સંઘવીએ જણાવ્યું હતું કે બાળકોને સ્વસ્થ જીવનશૈલી અપનાવવા પ્રોત્સાહિત કરવું જોઈએ. રોજિંદા જીવનમાં સ્વચ્છતા, નિયમિતતા અને આરોગ્યપ્રદ આદતો વિકસાવવામાં પરિવારની ભૂમિકા અત્યંત મહત્વપૂર્ણ છે. બાળકનું પ્રથમ શિક્ષણ ઘરેથી જ શરૂ થાય છે અને માતા-પિતા તેના પ્રથમ ગુરુ હોય છે.

કાર્યક્રમ દરમિયાન નાયબ મુખ્યમંત્રીશ્રીએ વડોદરા નગર પ્રાથમિક શિક્ષણ સમિતિની કામગીરીની વિશેષ પ્રશંસા કરી હતી. તેમણે જણાવ્યું કે આજે વડોદરા નગર શિક્ષણ સમિતિની ગુજરાતી, હિન્દી અને અંગ્રેજી માધ્યમની શાળાઓમાં કુલ 49,924 વિદ્યાર્થીઓ અભ્યાસ કરી રહ્યા છે, જે સરકારી શિક્ષણ પ્રત્યે લોકોના વધતા વિશ્વાસનું પ્રતિબિંબ છે.

તેમણે ગૌરવપૂર્વક જણાવ્યું કે ચાલુ વર્ષે 7,544 વિદ્યાર્થીઓએ નવા પ્રવેશ મેળવ્યા છે, જ્યારે ખાસ નોંધપાત્ર બાબત એ છે કે 1,354 વિદ્યાર્થીઓએ ખાનગી શાળાઓ છોડીને સરકારી નગર પ્રાથમિક શાળાઓમાં પ્રવેશ મેળવ્યો છે. તેમણે આ સિદ્ધિને વડોદરા નગર શિક્ષણ સમિતિ અને જિલ્લા શિક્ષણ તંત્રની મહત્ત્વપૂર્ણ સફળતા ગણાવી હતી.

નાયબ મુખ્યમંત્રીશ્રીએ જણાવ્યું કે સરકારી શાળાઓમાં વધતી ગુણવત્તા, આધુનિક સુવિધાઓ, અનુભવી શિક્ષકો અને નવી શિક્ષણ નીતિના અસરકારક અમલીકરણના કારણે વાલીઓનો વિશ્વાસ સતત વધી રહ્યો છે. ખાનગી શાળાઓમાંથી વિદ્યાર્થીઓ સરકારી શાળાઓમાં પ્રવેશ લઈ રહ્યા છે તે શિક્ષણ ક્ષેત્રમાં સકારાત્મક પરિવર્તનનો સંકેત છે.

તેમણે ખાસ કરીને ડ્રોપઆઉટ વિદ્યાર્થીઓને ફરીથી શિક્ષણની મુખ્યધારામાં લાવવા માટે શિક્ષણ વિભાગ દ્વારા કરવામાં આવેલી કામગીરીની પ્રશંસા કરી હતી. ઘરે-ઘરે જઈને વિદ્યાર્થીઓને પુનઃપ્રવેશ અપાવવાના પ્રયાસો માટે તેમણે શિક્ષણ સમિતિ અને જિલ્લા તંત્રને અભિનંદન પાઠવ્યા હતા.

કાર્યક્રમ દરમિયાન આંગણવાડી, બાલવાટિકા અને ધોરણ-1માં નવા પ્રવેશ મેળવનાર નાનાં ભૂલકાઓનું સ્વાગત કરવામાં આવ્યું હતું. નાયબ મુખ્યમંત્રી તથા અન્ય મહાનુભાવોના હસ્તે બાળકોને શૈક્ષણિક કિટ અને અભિનંદન પાઠવી તેમના શૈક્ષણિક જીવનની નવી શરૂઆત કરાવવામાં આવી હતી.

મળતી માહિતી મુજબ નગર પ્રાથમિક શિક્ષણ સમિતિ હેઠળની શાળાઓમાં આ વર્ષે બાલવાટિકામાં 4,167 વિદ્યાર્થીઓએ પ્રવેશ મેળવ્યો છે, જ્યારે ધોરણ 1થી 8 સુધીમાં ખાનગી શાળાઓમાંથી આવેલા વિદ્યાર્થીઓ સહિત કુલ 7,544 નવા વિદ્યાર્થીઓએ પ્રવેશ મેળવ્યો છે. આ ઉપરાંત દિવ્યાંગ બાળકોને પણ વિશેષ પ્રવેશ અપાવી સમાન શિક્ષણના અધિકારને વધુ મજબૂત બનાવવામાં આવ્યો હતો.

કાર્યક્રમ દરમિયાન તેજસ્વી વિદ્યાર્થીઓ, દિવ્યાંગ રમતવીરો તથા શિક્ષણની મુખ્યધારામાં ફરી જોડાયેલા વિદ્યાર્થીઓનું સન્માન કરવામાં આવ્યું હતું. આ સન્માન દ્વારા અન્ય વિદ્યાર્થીઓને પણ પ્રેરણા મળે અને તેઓ જીવનમાં આગળ વધવા માટે ઉત્સાહિત થાય તેવો સંદેશ આપવામાં આવ્યો હતો.

નગર પ્રાથમિક શિક્ષણ સમિતિના શાસનાધિકારી **ડો. વિપુલ ભરતીયા**એ સ્વાગત પ્રવચનમાં વડોદરા શિક્ષણ સમિતિના "વિઝન-2030" અંગે માહિતી આપી હતી. તેમણે જણાવ્યું હતું કે શહેરની વિવિધ ઉદ્યોગ સંસ્થાઓ અને CSR સંગઠનોને શિક્ષણ વિકાસ સાથે જોડવામાં આવશે, જેથી શાળાઓમાં વધુ આધુનિક અને હાઈટેક સુવિધાઓ ઉપલબ્ધ થઈ શકે.

તેમણે વધુમાં જણાવ્યું કે શિક્ષકો માટે વિશેષ તાલીમ કાર્યક્રમો, સેમિનારો અને વિદ્યાર્થીઓ માટે અનુભવ આધારિત શિક્ષણની વ્યવસ્થા ઉભી કરવામાં આવશે, જે રાષ્ટ્રીય શિક્ષણ નીતિ (NEP)ના અસરકારક અમલીકરણમાં મદદરૂપ બનશે.

કાર્યક્રમ બાદ નાયબ મુખ્યમંત્રી હર્ષ સંઘવી અને અન્ય મહાનુભાવોએ શાળા પરિસરની મુલાકાત લઈને વિવિધ સુવિધાઓનું નિરીક્ષણ કર્યું હતું. તેમણે શિક્ષકો અને વિદ્યાર્થીઓ સાથે સંવાદ સાધી શાળાની પ્રવૃત્તિઓ અંગે માહિતી મેળવી હતી.

આ પ્રસંગે ધારાસભ્ય ચૈતન્ય દેસાઈ, વડોદરા મહાનગરપાલિકાના મેયર ગીતાબેન મકવાણા, ડેપ્યુટી મેયર આદિત્યભાઈ પટેલ, શિક્ષણ સમિતિના અધ્યક્ષ અંજનાબેન ઠક્કર, કમિશનર અરુણ મહેશ બાબુ, જિલ્લા શિક્ષણ અધિકારી મહેશ પાંડે, બીઆરસી મુકેશ શર્મા, સ્થાનિક પદાધિકારીઓ, વાલીઓ અને મોટી સંખ્યામાં વિદ્યાર્થીઓ ઉપસ્થિત રહ્યા હતા.

આ સમગ્ર કાર્યક્રમે શિક્ષણ પ્રત્યે સમાજના વધતા વિશ્વાસ, સરકારી શાળાઓની ગુણવત્તામાં થયેલા સુધારા અને બાળકોના સર્વાંગી વિકાસ માટે રાજ્ય સરકારની પ્રતિબદ્ધતાને ઉજાગર કરી હતી. નાયબ મુખ્યમંત્રી હર્ષ સંઘવીનો “બાળકોને માત્ર હોશિયાર વિદ્યાર્થી નહીં પરંતુ સારા નાગરિક બનાવવાનો” સંદેશ સમગ્ર કાર્યક્રમનું કેન્દ્રબિંદુ રહ્યો હતો.