મારું ગુજરાત મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવી મેદાનમાં

વરસાદગ્રસ્ત વિસ્તારોની મુલાકાત લઈને ઝડપી રાહત કામગીરીના આપ્યા નિર્દેશ

ગુજરાતમાં ભારે વરસાદથી સર્જાયેલી પરિસ્થિતિ વચ્ચે મુખ્યમંત્રી ભૂપેન્દ્રભાઈ પટેલ જાતે મેદાનમાં ઉતરીને અસરગ્રસ્ત વિસ્તારોની મુલાકાત લીધી હતી. મુખ્યમંત્રીએ અમદાવાદના બોપલ, આંબલી અને ઘુમા સહિતના પાણી ભરાયેલા વિસ્તારોમાં પહોંચી વરસાદી પાણી વચ્ચે જ પરિસ્થિતિનું સ્થળ પર નિરીક્ષણ કર્યું હતું. તેમણે સ્થાનિક નાગરિકો સાથે વાતચીત કરીને તેમને પડી રહેલી મુશ્કેલીઓ વિશે માહિતી મેળવી અને અધિકારીઓને તાત્કાલિક અસરકારક કામગીરી કરવા સૂચના આપી હતી. મુખ્યમંત્રીના આ મેદાની નિરીક્ષણનો હેતુ માત્ર સ્થિતિનો અહેવાલ મેળવવાનો નહીં, પરંતુ લોકોની સમસ્યાઓનો પ્રત્યક્ષ અનુભવ કરીને ઝડપી ઉકેલ સુનિશ્ચિત કરવાનો હતો.

અસરગ્રસ્ત વિસ્તારોની મુલાકાત બાદ મુખ્યમંત્રી ભૂપેન્દ્ર પટેલે મંત્રી ઋષિકેશભાઈ પટેલની ઉપસ્થિતિમાં અમદાવાદ મહાનગરપાલિકા, પોલીસ વિભાગ, માર્ગ અને મકાન વિભાગ, ફાયર બ્રિગેડ, આરોગ્ય વિભાગ તેમજ અન્ય સંબંધિત વિભાગોના વરિષ્ઠ અધિકારીઓ સાથે ઉચ્ચસ્તરીય સમીક્ષા બેઠક યોજી હતી. બેઠક દરમિયાન શહેરમાં વરસાદી પાણીના નિકાલ, ટ્રાફિક વ્યવસ્થા, બચાવ કામગીરી અને નાગરિકોને જરૂરી સેવાઓ સમયસર ઉપલબ્ધ કરાવવા અંગે વિગતવાર ચર્ચા કરવામાં આવી હતી.

મુખ્યમંત્રીએ અધિકારીઓને સ્પષ્ટ સૂચના આપી હતી કે વરસાદના કારણે નાગરિકોને પડતી મુશ્કેલીઓ દૂર કરવા માટે યુદ્ધના ધોરણે કામગીરી હાથ ધરવામાં આવે. જ્યાં પાણી ભરાયું હોય ત્યાં ઝડપથી પાણીનો નિકાલ કરવામાં આવે, ટ્રાફિકને સુચારુ બનાવવામાં આવે અને જરૂરી હોય ત્યાં વધારાના પંપ, મશીનરી અને માનવબળ તૈનાત કરવામાં આવે. તેમણે ખાસ ભાર મૂક્યો હતો કે વરસાદથી અસરગ્રસ્ત વિસ્તારોમાં રાહત કામગીરીમાં કોઈ પ્રકારની ઢીલાશ ન રહે અને દરેક વિભાગ સંકલન સાથે કાર્ય કરે.

મુખ્યમંત્રીએ વરસાદ બાદ ઉભી થતી સ્વચ્છતા અને આરોગ્ય સંબંધિત સમસ્યાઓને પણ ગંભીરતાથી લેવા સૂચના આપી હતી. તેમણે અસરગ્રસ્ત વિસ્તારોમાં તાત્કાલિક સફાઈ અભિયાન હાથ ધરવા, ગંદા પાણીનો નિકાલ કરવા, ફોગિંગ અને જંતુનાશક દવાનો છંટકાવ કરવા તેમજ પીવાના શુદ્ધ પાણીની વ્યવસ્થા સુનિશ્ચિત કરવા જણાવ્યું હતું. સાથે જ આરોગ્ય વિભાગને ચેપી રોગચાળો ન ફેલાય તે માટે જરૂરી તમામ તકેદારી રાખવા પણ સૂચના આપવામાં આવી હતી.

બીજી તરફ, નાયબ મુખ્યમંત્રી હર્ષ સંઘવી પણ દક્ષિણ ગુજરાતના ભારે વરસાદથી સૌથી વધુ અસરગ્રસ્ત ઉમરગામ તાલુકાની મુલાકાતે પહોંચ્યા હતા. તેમણે વરસાદથી થયેલા નુકસાનનું સ્થળ પર નિરીક્ષણ કર્યું અને જિલ્લા વહીવટી તંત્ર પાસેથી સમગ્ર પરિસ્થિતિની વિગતવાર માહિતી મેળવી હતી. નાયબ મુખ્યમંત્રીએ અધિકારીઓને નુકસાનનો સર્વે ઝડપથી પૂર્ણ કરીને અસરગ્રસ્ત લોકોને સરકારની સહાય સમયસર પહોંચે તે માટે તાત્કાલિક કાર્યવાહી કરવા નિર્દેશ આપ્યો હતો.  

ઉમરગામની મુલાકાત દરમિયાન નાયબ મુખ્યમંત્રી હર્ષ સંઘવીએ સ્થાનિક ધારાસભ્ય રમણલાલ પાટકર અને પારડી પ્રાંત અધિકારી નિરવ પટેલ સાથે બેઠક કરીને તાલુકાની સ્થિતિ અંગે માહિતી મેળવી હતી. ત્યારબાદ તેમણે ભીલાડ, સાતનાળા અને ધોડીપાડા સહિતના અસરગ્રસ્ત વિસ્તારોની મુલાકાત લીધી અને સ્થાનિક નાગરિકો સાથે સીધી વાતચીત કરી હતી. તેમણે લોકોને સરકાર તેમની સાથે છે તેવી ખાતરી આપતાં ખેડૂતો, પશુપાલકો અને વરસાદથી અસર પામેલા તમામ પરિવારોને સરકારની વિવિધ સહાય યોજનાઓનો લાભ ઝડપથી મળે તે માટે સંબંધિત વિભાગોને જરૂરી માર્ગદર્શન આપ્યું હતું.

રાજ્ય સરકાર દ્વારા વરસાદની પરિસ્થિતિ પર સતત નજર રાખવામાં આવી રહી છે અને તમામ જિલ્લા વહીવટી તંત્રને એલર્ટ મોડ પર રાખવામાં આવ્યું છે. મુખ્યમંત્રી અને નાયબ મુખ્યમંત્રીની મેદાની મુલાકાતો રાજ્ય સરકારની ઝડપી પ્રતિબદ્ધતાનું પ્રતિબિંબ માનવામાં આવી રહી છે. સરકારનું મુખ્ય ધ્યાન હાલ નાગરિકોની સુરક્ષા, પાણી ભરાવાની સમસ્યાનો તાત્કાલિક ઉકેલ, રાહત કામગીરીને વધુ અસરકારક બનાવવી અને અસરગ્રસ્ત પરિવારોને ઝડપથી સહાય પહોંચાડવા પર કેન્દ્રિત છે. વરસાદની સ્થિતિ સામાન્ય ન થાય ત્યાં સુધી તમામ વિભાગોને સતત સતર્ક રહી કામગીરી ચાલુ રાખવાના નિર્દેશ આપવામાં આવ્યા છે.