મારું શહેર દેવભૂમિ દ્વારકા SOGની મોટી કાર્યવાહી: ભાણવડમાં ગેરકાયદેસર લાકડાનો જથ્થો ભરેલા બે પીકઅપ ઝડપાયા, રૂ. 13.18 લાખનો મુદ્દામાલ જપ્ત.

ભાણવડ: દેવભૂમિ દ્વારકા જિલ્લા એસ.ઓ.જી.એ ભાણવડ વિસ્તારમાં ગેરકાયદેસર રીતે કપાયેલા વૃક્ષોના લાકડાના જથ્થાના પરિવહન સામે સફળ કાર્યવાહી હાથ ધરી છે. પોલીસે બે બોલેરો પીકઅપ વાહનો સાથે બે આરોપીઓને ઝડપી પાડી કુલ રૂ. 13,18,000નો મુદ્દામાલ કબજે કરી કાયદેસરની કાર્યવાહી હાથ ધરી છે.

પોલીસ અધિક્ષક જયરાજસિંહ વાળાના માર્ગદર્શન હેઠળ તેમજ એસ.ઓ.જી.ના અધિકારીઓના સૂચન અનુસાર ગેરકાયદેસર પ્રવૃત્તિઓ સામે ચલાવવામાં આવી રહેલી ઝુંબેશ દરમિયાન પોલીસ પેટ્રોલિંગમાં હતી. તે દરમિયાન બાતમી મળી હતી કે પોરબંદર તરફથી બે બોલેરો પીકઅપ વાહનોમાં ગેરકાયદેસર રીતે કપાયેલા વૃક્ષોના લાકડાનો મોટો જથ્થો ભરી ભાણવડ મારફતે જામનગર તરફ વેચાણ માટે લઈ જવામાં આવી રહ્યો છે.

બાતમીના આધારે એસ.ઓ.જી.ની ટીમે ભાણવડ વિસ્તારમાં વોચ ગોઠવી હતી. થોડા સમય બાદ બંને શંકાસ્પદ પીકઅપ વાહનો આવતા તેમને રોકી તપાસ કરવામાં આવી હતી.

તપાસ દરમિયાન બંને વાહનોમાંથી મોટી માત્રામાં ગેરકાયદેસર રીતે કપાયેલા વૃક્ષોના લાકડાનો જથ્થો મળી આવ્યો હતો. પૂછપરછમાં વાહનચાલકોએ પોરબંદર જિલ્લાના રણાવાવ વિસ્તાર પાસેથી લાકડા ભરી જામનગરમાં વેચાણ માટે લઈ જતાં હોવાનું જણાવ્યું હતું. જોકે લાકડાના પરિવહન માટે જરૂરી વન વિભાગની મંજૂરી કે અન્ય કોઈ કાયદેસર દસ્તાવેજ રજૂ કરી શક્યા નહોતા.

પોલીસે બંને આરોપીઓની ધરપકડ કરી છે. ઝડપાયેલા આરોપીઓમાં:

• અર્જુનભાઈ ગાડુભાઈ માણાવા (ઉ.વ. 22), રહે. વેલનાથપરા, રણાવાવ, જિલ્લો પોરબંદર
• શામજીભાઈ ભીખુભાઈ મોઢતરીયા (ઉ.વ. 40), રહે. વેલનાથપરા, રણાવાવ, જિલ્લો પોરબંદર

નો સમાવેશ થાય છે.

કાર્યવાહી દરમિયાન પોલીસે અંદાજે રૂ. 3,18,000ના લાકડાનો જથ્થો તેમજ રૂ. 10 લાખ કિંમતના બે બોલેરો પીકઅપ વાહનો સહિત કુલ રૂ. 13,18,000નો મુદ્દામાલ કબજે કર્યો છે.

આ અંગે બંને આરોપીઓ સામે સૌરાષ્ટ્ર ફેલિંગ ઓફ ટ્રીઝ (પ્રતિબંધ) અધિનિયમ, 1951 હેઠળ ગુનો નોંધી વધુ તપાસ માટે સમગ્ર કેસ ભાણવડ પોલીસ સ્ટેશનને સોંપવામાં આવ્યો છે.

આ સફળ કામગીરી એસ.ઓ.જી. દેવભૂમિ દ્વારકાના પોલીસ અધિકારીઓ અને સ્ટાફ દ્વારા સંયુક્ત રીતે હાથ ધરવામાં આવી હતી.