મારું શહેર રાજકોટનું ભક્તિનગર રેલવે સ્ટેશન બન્યું આધુનિક સુવિધાઓથી સજ્જ: વડાપ્રધાન નરેન્દ્રભાઈ મોદીએ 75 પુનઃવિકસિત રેલવે સ્ટેશનનું વર્ચ્યુઅલી ઉદ્ઘાટન કર્યું.

ભારતીય રેલવેના આધુનિકીકરણ તરફ વધુ એક મહત્વપૂર્ણ પગલું ભરાયું છે. વડાપ્રધાન શ્રી નરેન્દ્રભાઈ મોદીના હસ્તે ‘અમૃત ભારત સ્ટેશન યોજના’ અંતર્ગત દેશના 20 રાજ્યોમાં આવેલા કુલ 75 પુનઃવિકસિત રેલવે સ્ટેશનોનું વર્ચ્યુઅલી ઉદ્ઘાટન કરવામાં આવ્યું હતું. આ ઐતિહાસિક પ્રસંગે રાજકોટ શહેરના ભક્તિનગર રેલવે સ્ટેશનનું પણ લોકાર્પણ કરવામાં આવ્યું હતું. રાજકોટ ખાતે આયોજિત વિશેષ કાર્યક્રમમાં રાજ્યકક્ષાના મંત્રી શ્રી ત્રિકમભાઈ છાંગાની અધ્યક્ષતામાં સ્ટેશનની તકતીનું અનાવરણ કરવામાં આવ્યું હતું.

રૂ. 26.80 કરોડના ખર્ચે પુનઃવિકસિત કરવામાં આવેલા ભક્તિનગર રેલવે સ્ટેશન હવે આધુનિક સુવિધાઓથી સજ્જ બન્યું છે. સ્ટેશનના નવીનીકરણથી મુસાફરોને વધુ સારી સુવિધાઓ, આરામદાયક વાતાવરણ અને સુરક્ષિત મુસાફરીનો અનુભવ મળશે. રાજકોટ જેવા મહત્વપૂર્ણ શહેરના રેલવે માળખાને આધુનિક બનાવવા માટે કરવામાં આવેલું આ કાર્ય શહેરના વિકાસમાં મહત્વપૂર્ણ ભૂમિકા ભજવશે.

કાર્યક્રમને સંબોધતા રાજ્યકક્ષાના મંત્રી શ્રી ત્રિકમભાઈ છાંગાએ જણાવ્યું હતું કે, ભક્તિનગર રેલવે સ્ટેશન રાજકોટના ઐતિહાસિક રેલવે સ્ટેશનો પૈકીનું એક છે અને તેનું આધુનિકીકરણ સમગ્ર રાજકોટ તેમજ ગુજરાત માટે ગૌરવની બાબત છે. તેમણે જણાવ્યું કે, વર્ષ 2014 પછી દેશમાં રેલવે સહિત વિવિધ ક્ષેત્રોમાં વિકાસની નવી દિશા શરૂ થઈ છે. ટેકનોલોજીના ઉપયોગથી ભારતીય રેલવેમાં અનેક પરિવર્તન આવ્યા છે અને મુસાફરો માટે સુવિધાઓમાં સતત વધારો થયો છે.

મંત્રીશ્રીએ જણાવ્યું હતું કે, આજે દેશને વંદે ભારત જેવી અત્યાધુનિક ટ્રેનો મળી છે, રેલવે સ્ટેશનોનું વિશ્વસ્તરીય માળખાકીય વિકાસ થઈ રહ્યો છે અને મુસાફરોને અગાઉ કરતાં વધુ સારી સેવાઓ મળી રહી છે. ડબલ એન્જિન સરકારના નેતૃત્વ હેઠળ ગુજરાત સતત વિકાસના માર્ગે આગળ વધી રહ્યું છે. તેમણે આગામી સમયમાં ભારત અને ગુજરાત વિકાસની નવી ઊંચાઈઓ સર કરશે તેવી આશા વ્યક્ત કરી હતી અને વર્ષ 2047 સુધીમાં વિકસિત ભારતના સંકલ્પને સાકાર કરવા માટે દરેક નાગરિકને સહયોગ આપવા અપીલ કરી હતી.

રાજકોટના મેયર શ્રી નેહલભાઈ શુક્લે આ પ્રસંગે સ્વચ્છતા પર ભાર મૂકતા જણાવ્યું હતું કે, જ્યારે વડાપ્રધાનશ્રીના નેતૃત્વમાં રેલવે સ્ટેશનો વિશ્વસ્તરીય બની રહ્યા છે ત્યારે તેની સુંદરતા અને સ્વચ્છતા જાળવવાની જવાબદારી પણ દરેક નાગરિકની છે. તેમણે લોકોને અપીલ કરી હતી કે જાહેર સ્થળો પર કચરો ન ફેંકવાનો સંકલ્પ લેવો જોઈએ. કાગળ, રેપર કે અન્ય કચરો કચરાપેટીમાં જ નાખવો જોઈએ જેથી રાજકોટ શહેર વધુ સ્વચ્છ અને સુંદર બની શકે.

ધારાસભ્ય ડો. દર્શિતાબેન શાહે જણાવ્યું હતું કે, વર્ષ 2014 પછી દેશના રેલવે ક્ષેત્રમાં નોંધપાત્ર પરિવર્તન આવ્યું છે. વડાપ્રધાન નરેન્દ્રભાઈ મોદીના નેતૃત્વમાં દેશને વંદે ભારત, મેટ્રો અને બુલેટ ટ્રેન જેવી આધુનિક પરિવહન સેવાઓ મળી છે. વિશ્વસ્તરીય ઇન્ફ્રાસ્ટ્રક્ચર ધરાવતા રેલવે સ્ટેશનોના નિર્માણથી સામાન્ય નાગરિકોને સીધો લાભ મળી રહ્યો છે. તેમણે જણાવ્યું કે સાચો વિકાસ એ છે જેનો લાભ સામાન્ય લોકો સુધી પહોંચે.

ધારાસભ્ય શ્રી રમેશભાઈ ટીલાળાએ જણાવ્યું હતું કે, દેશભરના 75થી વધુ રેલવે સ્ટેશનોનું પુનઃવિકાસ કાર્ય વિકસિત ભારતના રોડમેપને સાકાર કરવાની દિશામાં મહત્વપૂર્ણ પગલું છે. તેમણે જણાવ્યું કે રેલવે માત્ર પરિવહનનું સાધન નથી પરંતુ દેશની આર્થિક પ્રગતિનું મહત્વપૂર્ણ માધ્યમ છે. તેમણે લોકોને વધુમાં વધુ જાહેર પરિવહનનો ઉપયોગ કરવા અપીલ કરી હતી.

પશ્ચિમ રેલવે રાજકોટ ડિવિઝન દ્વારા આયોજિત આ કાર્યક્રમમાં રેલવે અધિકારીઓ, જનપ્રતિનિધિઓ, મુસાફરો અને મોટી સંખ્યામાં નાગરિકો ઉપસ્થિત રહ્યા હતા. ડિવિઝનલ રેલવે મેનેજર શ્રી ગિરિરાજકુમાર મીનાએ ઉપસ્થિત મહાનુભાવોનું સ્વાગત કર્યું હતું, જ્યારે જનસંપર્ક નિરીક્ષક શ્રી વિવેકભાઈ તિવારીએ કાર્યક્રમનું સંચાલન કર્યું હતું.

કાર્યક્રમ દરમિયાન યુવાનો દ્વારા ગણેશ સ્તુતિ નૃત્ય, રાસ અને ‘હર હર ગંગે’ ગીત જેવી સાંસ્કૃતિક રજૂઆતો કરવામાં આવી હતી. આ ઉપરાંત તા. 12થી 15 દરમિયાન યોજાયેલી વિકસિત રેલવે વિષયક ચિત્ર, નિબંધ અને સેલ્ફી સ્પર્ધાના વિજેતા વિદ્યાર્થીઓને પ્રમાણપત્ર આપીને સન્માનિત કરવામાં આવ્યા હતા.

ઉપસ્થિત લોકોએ વીડિયો કોન્ફરન્સના માધ્યમથી વડાપ્રધાનશ્રીના સંબોધન તથા અમૃત ભારત સ્ટેશન યોજનાની શોર્ટ ફિલ્મ પણ નિહાળી હતી. આ પ્રસંગે સિનિયર ડિવિઝનલ કોમર્શિયલ મેનેજર શ્રી સુનિલકુમાર મીના, પી.આર.ઓ. શ્રી હેમરાજ મીના, ચીફ કોમર્શિયલ મેનેજર (યાત્રી સેવા) શ્રી સ્વપ્નિલ વાલીંજકર, શ્રી માધવભાઈ દવે સહિત રેલવે અધિકારીઓ, સ્ટાફ અને મુસાફરો હાજર રહ્યા હતા.

ભક્તિનગર રેલવે સ્ટેશનના આધુનિકીકરણ સાથે રાજકોટના રેલવે વિકાસમાં નવો અધ્યાય શરૂ થયો છે. આધુનિક સુવિધાઓ, સારી વ્યવસ્થા અને મુસાફરોની સુવિધાને ધ્યાનમાં રાખીને કરવામાં આવેલું આ પુનઃવિકાસ કાર્ય રાજકોટને વધુ સક્ષમ અને આધુનિક શહેર બનાવવાની દિશામાં મહત્વપૂર્ણ યોગદાન આપશે.