મારું શહેર લાલપુર તાલુકા પંચાયતની નવતર પહેલ: સખી મંડળ કેન્ટીન, હેલ્પ ડેસ્ક અને આધુનિક IT સેલનું લોકાર્પણ, ગ્રામિણ વિકાસને મળી નવી દિશા.

જામનગર, તા. 18: જામનગર જિલ્લાના લાલપુર તાલુકા પંચાયતે ગ્રામિણ વિકાસ, મહિલા સશક્તિકરણ અને નાગરિકોને વધુ સરળ અને પારદર્શક વહીવટી સેવાઓ ઉપલબ્ધ કરાવવા માટે એક મહત્વપૂર્ણ પહેલ કરી છે. તાલુકા પંચાયતના સ્વભંડોળમાંથી તૈયાર કરાયેલા વિવિધ લોકકલ્યાણકારી પ્રોજેક્ટ્સનું જિલ્લા વિકાસ અધિકારી સુશ્રી નિશાના વરદ હસ્તે લોકાર્પણ કરવામાં આવ્યું હતું. આ પ્રસંગે સખી મંડળ સંચાલિત આધુનિક કેન્ટીન, અરજદારો માટે હેલ્પ ડેસ્ક તેમજ અત્યાધુનિક કોમ્પ્યુટર લેબ કમ આઈટી સેલને ખુલ્લા મુકવામાં આવ્યા હતા. તાલુકા પંચાયતની આ પહેલને ગ્રામિણ વિકાસના ક્ષેત્રમાં એક પ્રેરણાદાયી અને લોકકેન્દ્રિત પગલું માનવામાં આવી રહ્યું છે. આ પ્રકલ્પોથી સ્થાનિક લોકોને રોજગારી, મહિલાઓને આત્મનિર્ભરતા અને નાગરિકોને ઝડપી તથા સરળ વહીવટી સેવાઓનો સીધો લાભ મળશે.

જિલ્લા વિકાસ અધિકારી સુશ્રી નિશાએ કાર્યક્રમને સંબોધતા જણાવ્યું હતું કે ગ્રામિણ વિકાસ માત્ર રસ્તા, પાણી કે ઈમારતોના નિર્માણ પૂરતો મર્યાદિત નથી, પરંતુ લોકોના જીવનમાં ગુણાત્મક પરિવર્તન લાવતી વ્યવસ્થાઓ ઉભી કરવી પણ એટલી જ જરૂરી છે. લાલપુર તાલુકા પંચાયતે સ્વભંડોળમાંથી આવા પ્રોજેક્ટ્સ ઊભા કરીને એક નવી દિશા દર્શાવી છે. તેમણે જણાવ્યું કે ગ્રામિણ મહિલાઓને આર્થિક રીતે સશક્ત બનાવવાના પ્રયાસો અને વહીવટી સેવાઓને ડિજિટલ માધ્યમથી વધુ કાર્યક્ષમ બનાવવાના પ્રયાસો રાજ્ય સરકારના વિકાસલક્ષી અભિગમ સાથે સુસંગત છે. તેમણે આ કામગીરી બદલ તાલુકા પંચાયતના પદાધિકારીઓ, અધિકારીઓ અને સમગ્ર ટીમને અભિનંદન પાઠવ્યા હતા.

કાર્યક્રમનું મુખ્ય આકર્ષણ રહ્યું સખી મંડળ સંચાલિત આધુનિક કેન્ટીન. ગુજરાત આજીવિકા પ્રમોશન કંપની લિમિટેડના માર્ગદર્શન હેઠળ અને દીનદયાળ અંત્યોદય યોજના – રાષ્ટ્રીય ગ્રામિણ આજીવિકા મિશન અંતર્ગત તૈયાર કરાયેલ આ કેન્ટીનનું સંચાલન 'બાબરિયા સ્વ-સહાય જૂથ'ના સખી મંડળને સોંપવામાં આવ્યું છે. આ કેન્ટીન માત્ર નાસ્તો અને ભોજનની સુવિધા પૂરતી મર્યાદિત નહીં રહે, પરંતુ ગ્રામિણ મહિલાઓ માટે સ્થાયી આવકનું સાધન બનશે. મહિલાઓ પોતાની ક્ષમતા, કૌશલ્ય અને વ્યવસાયિક સંચાલન દ્વારા આત્મનિર્ભર બનશે તેમજ અન્ય મહિલાઓ માટે પણ પ્રેરણારૂપ ઉદાહરણ સ્થાપિત કરશે. સરકાર દ્વારા મહિલા સશક્તિકરણ માટે ચલાવવામાં આવતી વિવિધ યોજનાઓને આ પહેલ વધુ મજબૂત બનાવશે.

તાલુકા પંચાયત ખાતે દરરોજ વિવિધ કામો માટે મોટી સંખ્યામાં અરજદારો, ખેડૂતો, લાભાર્થીઓ અને ગ્રામજનો આવતા હોય છે. આવા લોકોની સુવિધાને ધ્યાનમાં રાખીને પંચાયત પરિસરમાં વિશેષ હેલ્પ ડેસ્ક શરૂ કરવામાં આવ્યો છે. અહીં અરજીઓ સ્વીકારવાની પ્રક્રિયા, ટપાલનું રિસીવિંગ અને ડિસ્પેચ, વિવિધ પ્રમાણપત્રો તથા દાખલાઓ અંગેની માહિતી અને માર્ગદર્શન એક જ સ્થળે ઉપલબ્ધ રહેશે. જેના કારણે અરજદારોને અલગ-અલગ કચેરીઓમાં ધક્કા ખાવાની જરૂર નહીં રહે અને તેમની કામગીરી વધુ ઝડપથી પૂર્ણ થઈ શકશે. હેલ્પ ડેસ્ક દ્વારા નાગરિકોને પારદર્શક, સરળ અને સમયબદ્ધ સેવા આપવાનો હેતુ રાખવામાં આવ્યો છે. આ પહેલથી તાલુકા પંચાયતની વહીવટી કાર્યક્ષમતામાં પણ વધારો થશે.

ડિજિટલ ગવર્નન્સને વધુ મજબૂત બનાવવા માટે તાલુકા પંચાયતમાં અત્યાધુનિક કોમ્પ્યુટર લેબ કમ આઈટી સેલ પણ કાર્યરત કરવામાં આવ્યો છે. આ આઈટી સેલ દ્વારા વિવિધ ઓનલાઈન સરકારી સેવાઓનું સંચાલન, સરકારી યોજનાઓની ડેટા એન્ટ્રી, લાભાર્થીઓની વિગતોનું વેરિફિકેશન, તલાટીઓની કામગીરીનું ઓનલાઈન સુપરવિઝન અને મોનિટરિંગ સહિતની કામગીરી વધુ અસરકારક રીતે થઈ શકશે. ડિજિટલ ટેક્નોલોજીના ઉપયોગથી સરકારી યોજનાઓનો લાભ વધુ ઝડપથી અને પારદર્શક રીતે લાભાર્થીઓ સુધી પહોંચાડવામાં સરળતા રહેશે. આ સેલના માધ્યમથી કાગળ આધારિત પ્રક્રિયામાં ઘટાડો થશે અને ઈ-ગવર્નન્સને નવી ગતિ મળશે.

જિલ્લા વિકાસ અધિકારી સુશ્રી નિશાએ લાલપુર તાલુકા પંચાયતના પ્રમુખ, પદાધિકારીઓ તથા તાલુકા વિકાસ અધિકારી શ્રી કે.આર. ચુડાસમાની લોકાભિમુખ કામગીરીને વિશેષ બિરદાવી હતી. તેમણે જણાવ્યું કે તાલુકા પંચાયતે સ્થાનિક જરૂરિયાતોને ધ્યાનમાં રાખીને જે રીતે પ્રયોગાત્મક અને નવતર પહેલ કરી છે તે અન્ય તાલુકાઓ માટે પણ પ્રેરણારૂપ છે. આ કાર્યક્રમમાં ઉપસ્થિત જિલ્લાના વિવિધ તાલુકાઓના તાલુકા વિકાસ અધિકારીઓને પણ પોતાના વિસ્તારમાં આવી જ પ્રકારની લોકહિતકારી પહેલ અમલમાં મૂકવા અનુરોધ કરવામાં આવ્યો હતો. ગ્રામિણ વિકાસમાં નવીનતા અને સ્થાનિક સ્તરે ઉપલબ્ધ સંસાધનોનો અસરકારક ઉપયોગ કરીને લોકોના જીવનમાં સકારાત્મક પરિવર્તન લાવવાની જરૂરિયાત પર ભાર મૂકવામાં આવ્યો હતો.

લાલપુર તાલુકા પંચાયત દ્વારા હાથ ધરાયેલા આ પ્રોજેક્ટ્સ માત્ર નવી સુવિધાઓનું લોકાર્પણ નથી, પરંતુ ગ્રામિણ વિકાસના સર્વાંગી મોડલ તરીકે પણ ઉભરી રહ્યા છે. એક તરફ મહિલા સ્વ-સહાય જૂથોને રોજગારી અને આત્મનિર્ભરતા તરફ આગળ વધવાની તક મળી છે, તો બીજી તરફ સામાન્ય નાગરિકોને સરળ, પારદર્શક અને ઝડપી વહીવટી સેવાઓનો લાભ મળશે. આધુનિક આઈટી સેલના કારણે પંચાયતની કામગીરી વધુ કાર્યક્ષમ બનશે અને ડિજિટલ ગવર્નન્સને પણ નવી ગતિ મળશે. સ્થાનિક સ્તરે વિકાસને પ્રાથમિકતા આપતી અને લોકોની જરૂરિયાતોને કેન્દ્રમાં રાખીને અમલમાં મુકાયેલી આ પહેલ લાલપુર તાલુકાને વિકાસના નવા માપદંડ તરફ લઈ જશે તેમજ અન્ય તાલુકા પંચાયતો માટે પણ પ્રેરણારૂપ મોડલ સાબિત થશે.