સબરસ અમેરિકામાં 28 હજારથી વધુ ટ્રક ડ્રાઇવરોના કોમર્શિયલ લાઇસન્સ રદ, અંગ્રેજી નિયમ કડક થતાં ભારતીય ડ્રાઇવરોને મોટો ફટકો.
વોશિંગ્ટન: અમેરિકામાં ટ્રમ્પ વહીવટીતંત્રે ટ્રક પરિવહન ક્ષેત્રમાં મોટું પગલું ભરતાં 28,000થી વધુ અપ્રવાસી ટ્રક ડ્રાઇવરોના કોમર્શિયલ ડ્રાઇવિંગ લાઇસન્સ (CDL) રદ કર્યા હોવાનું જાહેર કર્યું છે. વ્હાઇટ હાઉસના જણાવ્યા મુજબ આ કાર્યવાહીનો હેતુ માર્ગ સુરક્ષા મજબૂત બનાવવાનો અને સ્થાનિક અમેરિકન ડ્રાઇવરોને વધુ રોજગારીની તક આપવાનો છે.
સરકારે સાથે સાથે અપ્રવાસી ડ્રાઇવરોને તાલીમ આપતી આશરે 9,500 ડ્રાઇવિંગ સ્કૂલો સામે પણ કાર્યવાહી શરૂ કરી છે. હવે ટ્રક ડ્રાઇવિંગ ક્ષેત્રમાં અમેરિકન સેનાના નિવૃત્ત જવાનોને વધુ તકો આપવા માટે વિશેષ કાર્યક્રમ અમલમાં મૂકવામાં આવી રહ્યો છે.
ફ્લોરિડાની દુર્ઘટના બાદ કડક વલણ
સરકારનું કહેવું છે કે આ નિર્ણય પાછળ ફ્લોરિડામાં ઓગસ્ટ 2025માં થયેલી ગંભીર માર્ગ દુર્ઘટના પણ એક મહત્વનું કારણ છે. અહેવાલો અનુસાર, એક ભારતીય મૂળના ટ્રક ડ્રાઇવર દ્વારા ગેરકાયદેસર યુ-ટર્ન લેવામાં આવતા અકસ્માત સર્જાયો હતો, જેમાં ત્રણ લોકોનાં મોત થયા હતા.
આ ઘટના બાદ અમેરિકન પરિવહન વિભાગે ટ્રક ડ્રાઇવરો માટેના નિયમોની સમીક્ષા કરી અને ખાસ કરીને અંગ્રેજી ભાષા જાણવાની ફરજિયાત શરતોના અમલને વધુ કડક બનાવ્યો.
અંગ્રેજી ભાષાના નિયમો બન્યા નિર્ણાયક
નવી કાર્યવાહી હેઠળ જે ટ્રક ડ્રાઇવરો અંગ્રેજી ભાષા યોગ્ય રીતે વાંચી, લખી અથવા બોલી શકતા નથી, તેમના સામે કડક પગલાં લેવામાં આવી રહ્યા છે. સરકારનું માનવું છે કે ટ્રાફિક સાઇન, સુરક્ષા સૂચનાઓ અને કટોકટીની પરિસ્થિતિમાં અસરકારક સંચાર માટે અંગ્રેજીનું પૂરતું જ્ઞાન જરૂરી છે.
અહેવાલો મુજબ, હજારો ગેર-નાગરિક ટ્રક ડ્રાઇવરોના લાઇસન્સ રદ કરવામાં આવ્યા છે અને મોટી સંખ્યામાં ડ્રાઇવરોને સેવા પરથી દૂર કરવામાં આવ્યા છે.
ભારતીય ડ્રાઇવરો પર પડી શકે છે અસર
અમેરિકામાં ટ્રકિંગ ઉદ્યોગમાં પંજાબ અને હરિયાણાના મોટી સંખ્યામાં ભારતીય મૂળના લોકો કાર્યરત હોવાનું માનવામાં આવે છે. અંદાજે 1.3 લાખથી 1.5 લાખ ભારતીય મૂળના ટ્રક ડ્રાઇવરો આ ક્ષેત્ર સાથે જોડાયેલા હોવાનું વિવિધ અહેવાલોમાં જણાવવામાં આવે છે. તેથી નવા નિયમો અને અંગ્રેજી ભાષાની કડક અમલવારીને કારણે કેટલાક ભારતીય ડ્રાઇવરો પર પણ અસર પડી શકે છે.
પૂર્વ સૈનિકોને મળશે પ્રાથમિકતા
ટ્રમ્પ વહીવટીતંત્રે સાથે સાથે અમેરિકન સેનાના નિવૃત્ત જવાનો માટે વિશેષ પહેલ પણ શરૂ કરી છે. ભારે લશ્કરી વાહનો ચલાવવાનો અનુભવ ધરાવતા પૂર્વ સૈનિકોને કોમર્શિયલ ટ્રક ડ્રાઇવિંગ ક્ષેત્રમાં જોડાવવા માટે સ્કિલ ટેસ્ટમાં કેટલીક છૂટછાટ આપવામાં આવશે.
અમેરિકન પરિવહન વિભાગના જણાવ્યા અનુસાર, આ પગલાંનો મુખ્ય હેતુ માર્ગ સુરક્ષા વધારવો, વ્યાવસાયિક ધોરણો કડક બનાવવાં અને સ્થાનિક અમેરિકન નાગરિકો માટે રોજગારીની નવી તકો ઊભી કરવી છે.
