એજ્યુકેશન ધોરણ-9ના વિદ્યાર્થીઓ પર ત્રણ ભાષાનો ભાર નહીં મૂકો: CBSEની નીતિ સામે સુપ્રીમ કોર્ટમાં અરજી, તાત્કાલિક સુનાવણીની માંગ.
સીબીએસઈ દ્વારા ધોરણ-9ના વિદ્યાર્થીઓ માટે લાગુ કરવામાં આવેલી ત્રણ ભાષા નીતિને લઈને હવે મામલો સુપ્રીમ કોર્ટ સુધી પહોંચ્યો છે. આ નીતિ સામે કેટલીક અરજીઓ દાખલ કરવામાં આવી છે, જેમાં વિદ્યાર્થીઓ પર વધારાનો શૈક્ષણિક ભાર ન મૂકવા અને ભાષા પસંદગીની વ્યવસ્થાને વધુ વ્યવહારુ બનાવવાની માંગ કરવામાં આવી છે. આ મામલે સુપ્રીમ કોર્ટમાં સુનાવણી દરમિયાન અરજદારો તરફથી તાત્કાલિક સુનાવણીની અપીલ કરવામાં આવી હતી.
મુખ્ય ન્યાયાધીશ (CJI) જસ્ટિસ સૂર્યકાન્તની અધ્યક્ષતાવાળી પીઠ સમક્ષ વરિષ્ઠ વકીલ ગોપાલ શંકર નારાયણે રજૂઆત કરી હતી કે, આ કેસ અગાઉ સુનાવણી માટે નક્કી કરવામાં આવ્યો હતો, પરંતુ બાદમાં તેને યાદીમાંથી દૂર કરી દેવામાં આવ્યો હતો. તેમણે કોર્ટ સમક્ષ દલીલ કરી હતી કે આ મુદ્દો વિદ્યાર્થીઓના ભવિષ્ય સાથે સીધો જોડાયેલો છે અને તેના પર ઝડપથી નિર્ણય લેવો જરૂરી છે.
અરજદાર પક્ષે દલીલ કરી હતી કે અનેક શાળાઓમાં ત્રણ ભાષા નીતિનો અમલ કરવામાં મુશ્કેલીઓ ઊભી થઈ રહી છે. વિદ્યાર્થીઓને જે ભાષા પસંદ કરવાની તક આપવામાં આવી રહી છે, તે ભાષા માટે ઘણી જગ્યાએ પૂરતા શિક્ષકો ઉપલબ્ધ નથી. એટલું જ નહીં, કેટલીક શાળાઓમાં જરૂરી પાઠ્યપુસ્તકો અને શૈક્ષણિક સંસાધનોની પણ અછત જોવા મળી રહી છે, જેના કારણે વિદ્યાર્થીઓને મુશ્કેલીનો સામનો કરવો પડી રહ્યો છે.
વરિષ્ઠ વકીલે પશ્ચિમ બંગાળનું ઉદાહરણ આપતા જણાવ્યું હતું કે કેટલીક શાળાઓમાં હિન્દી, બંગાળી અને સંસ્કૃત જેવા વિકલ્પો ઉપલબ્ધ છે, પરંતુ વાસ્તવમાં આ ભાષાઓ ભણાવવા માટે જરૂરી શિક્ષકો ઉપલબ્ધ નથી. તેમણે કહ્યું કે જો ભાષા પસંદગીનો વિકલ્પ આપવામાં આવે તો તે માત્ર કાગળ પર નહીં પરંતુ વ્યવહારિક રીતે પણ અમલમાં આવી શકે તેવી વ્યવસ્થા હોવી જોઈએ.
અરજદારો તરફથી કોર્ટને જણાવવામાં આવ્યું હતું કે નવી ભાષા નીતિ હેઠળ વિવિધ ભાષાઓના વિકલ્પો ઉપલબ્ધ કરાવવાની વાત કરવામાં આવી છે, પરંતુ મોટા ભાગની શાળાઓમાં તમામ ભાષાઓ માટે જરૂરી વ્યવસ્થા નથી. આ સ્થિતિમાં વિદ્યાર્થીઓને તેમની પસંદગી વિના કોઈ ભાષા ભણવા માટે મજબૂર થવું પડી શકે છે.
સુપ્રીમ કોર્ટમાં એવી માંગ કરવામાં આવી છે કે ધોરણ-9ના વિદ્યાર્થીઓ માટે ત્રણ ભાષા નીતિનું ફરજિયાતપણું દૂર કરવામાં આવે. અરજદાર પક્ષનું કહેવું છે કે ધોરણ-9માં પ્રવેશ્યા બાદ વિદ્યાર્થીઓ પર પહેલેથી જ બોર્ડ પરીક્ષાઓ અને અભ્યાસનું દબાણ હોય છે, ત્યારે વધારાની ભાષાનો ભાર તેમના શૈક્ષણિક પ્રદર્શન પર અસર કરી શકે છે.
આ મામલે કોર્ટ દ્વારા પ્રાથમિક રીતે સુનાવણી માટે સકારાત્મક સંકેત આપવામાં આવ્યા છે. મુખ્ય ન્યાયાધીશ જસ્ટિસ સૂર્યકાન્તે જણાવ્યું છે કે આ કેસને આગામી સુનાવણી માટે યાદીમાં સામેલ કરવામાં આવી શકે છે. હવે સૌની નજર સુપ્રીમ કોર્ટના આગામી નિર્ણય પર છે, જે લાખો વિદ્યાર્થીઓની ભાષા શિક્ષણ વ્યવસ્થા અને અભ્યાસક્રમ પર અસર કરી શકે છે.
