સબરસ 2027 વનડે વર્લ્ડ કપ માટે ICCએ ક્વૉલિફાયરનું શિડ્યૂલ જાહેર કર્યું, 22 ફેબ્રુઆરીથી 23 માર્ચ સુધી રમાશે ટૂર્નામેન્ટ.
World Cup 2027 Qualifier Schedule: આગામી વર્ષે યોજાનારા ICC પુરુષ ક્રિકેટ વર્લ્ડ કપ 2027 માટેની તૈયારીઓ શરૂ થઈ ગઈ છે. ઈન્ટરનેશનલ ક્રિકેટ કાઉન્સિલ (ICC)એ વર્લ્ડ કપ ક્વૉલિફાયર ટૂર્નામેન્ટની સત્તાવાર તારીખોની જાહેરાત કરી છે. 10 ટીમો વચ્ચે રમાનાર ક્વૉલિફાયર ટૂર્નામેન્ટ 22 ફેબ્રુઆરીથી 23 માર્ચ, 2027 દરમિયાન યોજાશે. જોકે, આ મહત્વપૂર્ણ ક્વૉલિફાયર માટેનું યજમાન દેશ અથવા વેન્યૂ અંગે હજુ સુધી કોઈ સત્તાવાર જાહેરાત કરવામાં આવી નથી.
નવા ફોર્મેટમાં રમાશે 2027નો વર્લ્ડ કપ
2027નો વનડે વર્લ્ડ કપ નવા ફોર્મેટ હેઠળ રમાશે, જેમાં કુલ 14 ટીમો ભાગ લેશે. આ નવા ફોર્મેટમાં ક્વૉલિફાયર ટૂર્નામેન્ટનું મહત્વ વધુ વધી ગયું છે.
ક્વૉલિફાયરમાં પ્રથમ સ્થાન મેળવનારી ટીમને સીધો મુખ્ય વર્લ્ડ કપમાં પ્રવેશ મળશે. જ્યારે બીજા, ત્રીજા અને ચોથા ક્રમે રહેનારી ટીમો વચ્ચે 'સુપર સિરીઝ' રમાશે. આ સિરીઝ વર્લ્ડ કપના પ્રથમ તબક્કા તરીકે ગણાશે અને તેમાં વિજેતા ટીમ ટોપ-12માં પોતાનું સ્થાન નિશ્ચિત કરશે.
ત્રણ દેશોની યજમાનીમાં રમાશે વિશ્વકપ
2027નો વર્લ્ડ કપ પ્રથમ વખત ત્રણ આફ્રિકન દેશો સંયુક્ત રીતે યોજશે.
- દક્ષિણ આફ્રિકા
- ઝિમ્બાબ્વે
- નામિબિયા
ટૂર્નામેન્ટ 4 ઓક્ટોબરથી 21 નવેમ્બર, 2027 દરમિયાન રમાશે.
કુલ 12 સ્ટેડિયમમાં મેચો યોજાશે, જેમાં:
- 8 વેન્યૂ દક્ષિણ આફ્રિકામાં
- 3 વેન્યૂ ઝિમ્બાબ્વેમાં
- 1 વેન્યૂ નામિબિયામાં
આયોજિત કરવામાં આવશે.
કઈ ટીમો રમશે ક્વૉલિફાયર?
ક્વૉલિફાયરમાં કુલ 10 ટીમો ભાગ લેશે.
આ ટીમોની પસંદગી નીચે મુજબ થશે:
- 30 સપ્ટેમ્બર 2026 સુધીની ODI રેન્કિંગ મુજબ યજમાન દેશોને બાદ કરતાં સૌથી નીચેની બે ફુલ-મેમ્બર ટીમો.
- ICC ક્રિકેટ વર્લ્ડ કપ લીગ-2ની ટોપ-4 ટીમો.
- વર્લ્ડ કપ ક્વૉલિફાયર પ્લેઓફમાંથી ટોપ-4 ટીમો.
વેસ્ટ ઈન્ડિઝ પર ફરી ક્વૉલિફાયરનું સંકટ
બે વખતની વર્લ્ડ ચેમ્પિયન વેસ્ટ ઈન્ડિઝ માટે ફરી એકવાર સીધો વર્લ્ડ કપ રમવાનો માર્ગ મુશ્કેલ બન્યો છે.
2023ના વર્લ્ડ કપમાં પણ વેસ્ટ ઈન્ડિઝ ક્વૉલિફાયર પાર કરી શક્યું નહોતું અને મુખ્ય ટૂર્નામેન્ટમાંથી બહાર રહ્યું હતું. હાલમાં ટીમ ODI રેન્કિંગમાં 10મા સ્થાને છે.
30 સપ્ટેમ્બરની કટ-ઓફ પહેલાં વેસ્ટ ઈન્ડિઝને ભારત સામે માત્ર બે વનડે મેચો રમવાની છે.
આ ઉપરાંત અફઘાનિસ્તાન અને આયર્લેન્ડ વચ્ચેની વનડે શ્રેણીના પરિણામો પણ વેસ્ટ ઈન્ડિઝના ભાવિ પર અસર કરશે. જો આયર્લેન્ડ શ્રેણી 4-1 અથવા 5-0થી જીતી જાય અને વેસ્ટ ઈન્ડિઝ ભારત સામે બંને વનડે જીતે, તો કેરેબિયન ટીમ માટે ટોપ-8માં પહોંચવાની શક્યતા બની શકે છે.
ક્વૉલિફાયર પર રહેશે ક્રિકેટ જગતની નજર
ICC દ્વારા તારીખોની જાહેરાત બાદ હવે ક્રિકેટ ચાહકોની નજર ક્વૉલિફાયરના યજમાન દેશ અને સંપૂર્ણ મેચ શિડ્યૂલ પર ટકેલી છે. નવા ફોર્મેટ સાથે રમાનારો 2027નો વર્લ્ડ કપ વધુ સ્પર્ધાત્મક બનવાની અપેક્ષા છે અને ક્વૉલિફાયર ટૂર્નામેન્ટ પણ અનેક ટીમો માટે 'કરો અથવા મરો' જેવી સાબિત થવાની છે.
