મારું ગુજરાત લીંબુના ભાવ ભડકે, કિલો ₹260 સુધી પહોંચ્યો!
ખાંડ, ડુંગળી અને ખાદ્યતેલ બાદ હવે લીંબુના ભાવમાં પણ મોટો ઉછાળો જોવા મળી રહ્યો છે. અમદાવાદની છૂટક બજારમાં પખવાડિયા પહેલાં આશરે ₹120 પ્રતિ કિલો મળતા લીંબુના ભાવ હવે ₹240થી ₹260 પ્રતિ કિલો સુધી પહોંચી ગયા હોવાનો દાવો છે. પરિણામે લોકો હવે લીંબુ કિલોને બદલે નંગના ભાવે ખરીદવા મજબૂર બન્યા છે.
સામાન્ય રીતે ઉનાળામાં લીંબુના ભાવમાં વધારો જોવા મળે છે, પરંતુ આ વખતે ચોમાસા દરમિયાન જ ભાવમાં થયેલા ઉછાળાએ ગ્રાહકોને ચોંકાવ્યા છે.
અમદાવાદ APMCના ઉપલબ્ધ આંકડા પણ લીંબુના જથ્થાબંધ ભાવમાં વધારો દર્શાવે છે. 31 ઓગસ્ટે અમદાવાદ માર્કેટમાં લીંબુનો ભાવ ₹3,000થી ₹10,000 પ્રતિ ક્વિન્ટલ અને સરેરાશ ₹7,500 પ્રતિ ક્વિન્ટલ નોંધાયો હતો.
ભાવ વધવાનું મુખ્ય કારણ આવકમાં ઘટાડો હોવાનું જણાવવામાં આવી રહ્યું છે. ઓછી આવક સામે માંગ યથાવત રહેતા સપ્લાય પર દબાણ વધ્યું છે અને તેની સીધી અસર છૂટક બજારના ભાવ પર પડી છે.
લીંબુનો ભાવ વધતા દાળ-શાકના વઘારથી લઈને લીંબુ શરબત અને અન્ય વપરાશમાં પણ હવે સામાન્ય પરિવારના બજેટ પર અસર જોવા મળી રહી છે.
