ટેક્નોલોજી PM મોદી આજે સુરતના પ્રવાસેઃ ₹18,778 કરોડના વિકાસકાર્યોની આપશે ભેટ, 6 હજાર પોલીસ જવાનો સાથે જડબેસલાક બંદોબસ્ત.

સુરત: વડાપ્રધાન શ્રી નરેન્દ્ર મોદી આજે સુરતની મુલાકાતે આવી રહ્યા છે, જ્યાં તેઓ ભારત સરકાર અને ગુજરાત સરકારના સંયુક્ત સહયોગથી તૈયાર થયેલા આશરે ₹18,778 કરોડના વિકાસ પ્રકલ્પોનું લોકાર્પણ અને ખાતમુહૂર્ત કરશે. આ ઐતિહાસિક કાર્યક્રમને લઈને સુરત શહેરમાં ઉત્સાહનો માહોલ જોવા મળી રહ્યો છે, ત્યારે સુરક્ષા વ્યવસ્થાને પણ અત્યંત મજબૂત બનાવવામાં આવી છે.

ઇન્ડોર સ્ટેડિયમ ખાતે ઈકો-ફ્રેન્ડલી કાર્યક્રમ

વડાપ્રધાનના કાર્યક્રમનું આયોજન સુરતના ઇન્ડોર સ્ટેડિયમ ખાતે કરવામાં આવ્યું છે. કાર્યક્રમને પર્યાવરણમૈત્રી બનાવવા માટે વિશેષ આયોજન કરવામાં આવ્યું છે. મહેમાનોને પ્લાસ્ટિકની બોટલોના બદલે માટીના પાત્રોમાં પાણી પીરસવામાં આવશે, જ્યારે કાર્યક્રમ સ્થળે પર્યાવરણ સંરક્ષણનો સંદેશ આપતી વિવિધ વ્યવસ્થાઓ પણ કરવામાં આવી છે.

દક્ષિણ ગુજરાતને મળશે વિકાસની નવી ગતિ

વડાપ્રધાન આજે દક્ષિણ ગુજરાત માટે અનેક મહત્વપૂર્ણ પ્રોજેક્ટ્સની ભેટ આપશે. જેમાં માર્ગ, પાણી, ઔદ્યોગિક વિકાસ, શહેરી સુવિધાઓ, GIDC ઇન્ફ્રાસ્ટ્રક્ચર અને અન્ય વિકાસલક્ષી યોજનાઓનો સમાવેશ થાય છે. આ પ્રોજેક્ટ્સથી સુરત, ભરૂચ, વલસાડ સહિત સમગ્ર દક્ષિણ ગુજરાતના વિકાસને નવી દિશા મળશે.

જડબેસલાક સુરક્ષા વ્યવસ્થા

વડાપ્રધાનના પ્રવાસને ધ્યાનમાં રાખીને સુરત શહેરમાં અભૂતપૂર્વ સુરક્ષા બંદોબસ્ત ગોઠવવામાં આવ્યો છે. શહેરભરમાં આશરે 6 હજાર પોલીસ જવાનો તૈનાત કરવામાં આવ્યા છે. ઉપરાંત ઉચ્ચ પોલીસ અધિકારીઓ, SRP, QRT, બોમ્બ ડિસ્પોઝલ સ્ક્વોડ, ડોગ સ્ક્વોડ અને વિવિધ સુરક્ષા એજન્સીઓ પણ સતર્ક કરવામાં આવી છે.

કાર્યક્રમ સ્થળ તેમજ વડાપ્રધાનના રૂટ પર સીસીટીવી કેમેરા, ડ્રોન સર્વેલન્સ અને ચુસ્ત ચેકિંગની વ્યવસ્થા કરવામાં આવી છે. સુરક્ષા એજન્સીઓ દ્વારા દરેક સ્થળનું અગાઉથી સેનિટાઇઝેશન કરવામાં આવ્યું છે.

લાખો લોકોની નજર કાર્યક્રમ પર

વડાપ્રધાનના આ કાર્યક્રમને લઈને ભાજપ કાર્યકરો, ઉદ્યોગકારો, વિવિધ સંસ્થાઓના પ્રતિનિધિઓ તેમજ સામાન્ય નાગરિકોમાં ભારે ઉત્સુકતા જોવા મળી રહી છે. દક્ષિણ ગુજરાતના વિકાસ માટે મહત્વપૂર્ણ માનવામાં આવતા આ કાર્યક્રમ પર સમગ્ર રાજ્યની નજર મંડાયેલી છે.

વડાપ્રધાન નરેન્દ્ર મોદી દ્વારા આજે કરવામાં આવનાર વિકાસકાર્યોના લોકાર્પણ અને ખાતમુહૂર્તથી ગુજરાતના ઔદ્યોગિક, આર્થિક અને માળખાકીય વિકાસને વધુ વેગ મળશે તેવી અપેક્ષા વ્યક્ત કરવામાં આવી રહી છે.

સમયસંદેસ દ્વારા દેશ - વિદેશના લટેસ્ટ ઉપડેટ માટે એપ લોન્ચ કરવામાં આવ્યું છે તો એપ ને ડાઉનલોડ કરવા માટે આપેલ લિન્ક પર ક્લિક કરો અને મેળવો લટટેસ્ટ ઉપડેટ : https://play.google.com/store/apps/details?id=com.samaysandeshnews