મારું શહેર અમરેલીમાં આકાશી આફત: ધોધમાર વરસાદથી જનજીવન અસ્તવ્યસ્ત, નદીઓમાં ઘોડાપૂર, હાઈવે બંધ, ઘરોમાં પાણી; બાળકી તણાઈ.

અમરેલી જિલ્લામાં ગત રાત્રિથી શરૂ થયેલા અવિરત અને ભારે વરસાદે સમગ્ર જિલ્લામાં જળબંબાકાર જેવી સ્થિતિ સર્જી છે. ગીર અને ઉપરવાસના વિસ્તારોમાં પડેલા ધોધમાર વરસાદના કારણે જિલ્લાની મુખ્ય નદીઓમાં ઘોડાપૂર આવ્યું છે, જ્યારે અનેક માર્ગો, કોઝવે અને હાઈવે પાણીમાં ગરકાવ થતાં વાહનવ્યવહાર ખોરવાઈ ગયો છે. શહેરોથી લઈને ગ્રામ્ય વિસ્તારો સુધી જનજીવન પર વરસાદની વ્યાપક અસર જોવા મળી રહી છે. સૌથી વધુ અસર અમરેલી–સાવરકુંડલા નેશનલ હાઈવે પર જોવા મળી છે. મોટા ગોખરવાળા નજીક કોઝવે પર વરસાદી પાણી ફરી વળતાં હાઈવે પર વાહનવ્યવહાર બંધ કરવો પડ્યો હતો. બંને તરફ વાહનોની લાંબી કતારો લાગી ગઈ હતી અને મુસાફરો કલાકો સુધી રસ્તા પર અટવાઈ રહ્યા હતા. બીજી તરફ વડિયા તાલુકાના ખાણ ખીજડીયા–ઢૂંઢીયા પીપળીયા માર્ગ પર સુરવો નદીના પ્રચંડ પ્રવાહમાં માટીનો કોઝવે ધોવાઈ જતાં આ માર્ગ પણ સંપૂર્ણપણે બંધ થઈ ગયો હતો. ભારે વરસાદને કારણે શેત્રુંજી અને નાવલી નદી બંને કાંઠે વહેતી થઈ છે. ગાવડકા નજીક શેત્રુંજી નદીમાં ઘોડાપૂરની સ્થિતિ સર્જાઈ છે, જ્યારે લીલીયા શહેરમાંથી પસાર થતી નાવલી નદીમાં નવા નીર આવતાં કાંઠા વિસ્તારના વેપારીઓ અને રહેવાસીઓને મુશ્કેલીઓનો સામનો કરવો પડી રહ્યો છે. ઉપરવાસમાંથી પાણીની આવક વધતાં ઠેબી ડેમના બે દરવાજા ખોલવામાં આવ્યા છે. તંત્ર દ્વારા અમરેલી, ફતેપુર, પ્રતાપરા અને ચાપાથળ સહિતના નીચાણવાળા ગામોના લોકોને સાવચેત રહેવા અને નદીના પ્રવાહથી દૂર રહેવા અપીલ કરવામાં આવી છે. બીજી તરફ મોટી કુંકાવાવનો સોનલ ડેમ ઓવરફ્લો થતાં ખેડૂતોમાં ખુશીનો માહોલ પણ જોવા મળ્યો છે. અમરેલી શહેરમાં લાઠી રોડ સહિતના અનેક મુખ્ય માર્ગો પાણીમાં ગરકાવ થઈ ગયા છે. ચાલુ માર્ગ કામગીરી અને પાણીના નિકાલમાં અવરોધ સર્જાતા અનેક વાહનો બંધ પડી ગયા હતા, જેના કારણે ટ્રાફિક જામની સમસ્યા ઊભી થઈ હતી. લીલીયાના મફત પ્લોટ વિસ્તારમાં ઘૂંટણસમા પાણી ઘરોમાં ઘૂસી જતાં ઘરવખરીને નુકસાન પહોંચ્યું હોવાનું સ્થાનિકોએ જણાવ્યું છે. સ્થાનિકોનો આક્ષેપ છે કે વરસાદી પાણીના નિકાલ માટે યોગ્ય વ્યવસ્થા ન હોવાથી દર વર્ષે આવી જ સ્થિતિ સર્જાય છે. જોકે, આ આક્ષેપો અંગે સંબંધિત તંત્રની સત્તાવાર પ્રતિક્રિયા સામે આવી નથી. જિલ્લાના ગ્રામ્ય વિસ્તારોમાં પણ ભારે વરસાદની અસર જોવા મળી છે. ધારી તાલુકાના કેનાલપરા ગામે આશરે 7 ઇંચ વરસાદ નોંધાતા ખેતરો પાણીથી ભરાઈ ગયા છે. કેટલાક વિસ્તારોમાં પાકને નુકસાન થવાની શક્યતા વ્યક્ત કરવામાં આવી રહી છે, જ્યારે બીજી તરફ વરસાદથી જળાશયો અને પાણીના સ્ત્રોતોમાં નોંધપાત્ર વધારો થયો છે. આ વચ્ચે એક દુઃખદ ઘટના પણ સામે આવી છે. લાઠીના માલવિયા પીપરિયા ગામ નજીક પાણીના વહેણમાં અચાનક પૂર આવતાં ખેતમજૂર પરિવારની ત્રણ વર્ષની બાળકી નંદની ધસમસતા પ્રવાહમાં તણાઈ ગઈ હતી. ઘટનાની જાણ થતાં ફાયર વિભાગ અને સ્થાનિક પ્રશાસનની ટીમો તાત્કાલિક સ્થળ પર પહોંચી હતી અને બાળકીની શોધખોળ તેમજ બચાવ કામગીરી હાથ ધરી હતી. હવામાન વિભાગે અમરેલી સહિત સૌરાષ્ટ્રના કેટલાક વિસ્તારોમાં હજુ પણ ભારે વરસાદની શક્યતા વ્યક્ત કરી છે. વહીવટી તંત્ર દ્વારા પરિસ્થિતિ પર સતત નજર રાખવામાં આવી રહી છે અને નાગરિકોને નદી, કોઝવે અને પાણી ભરાયેલા માર્ગો નજીક ન જવા તેમજ તંત્રની સૂચનાઓનું પાલન કરવાની અપીલ કરવામાં આવી છે. હાલમાં સમગ્ર જિલ્લામાં રાહત, બચાવ અને દેખરેખની કામગીરી યુદ્ધના ધોરણે ચાલુ છે.