મારું શહેર ભારે વરસાદની આગાહીને પગલે જામનગર ફાયર વિભાગ હાઈ એલર્ટ પર, તમામ કર્મચારીઓ સ્ટેન્ડબાય.
ગુજરાતમાં આગામી ત્રણથી ચાર દિવસ દરમિયાન ભારે વરસાદ અને વાવાઝોડાની હવામાન વિભાગની આગાહીને ધ્યાનમાં રાખીને જામનગર મહાનગરપાલિકાનો ફાયર એન્ડ ઇમર્જન્સી વિભાગ સંપૂર્ણ સજ્જ બન્યો છે. કોઈપણ પ્રકારની કુદરતી આપત્તિ કે ઇમર્જન્સી પરિસ્થિતિનો તાત્કાલિક સામનો કરી શકાય તે માટે ફાયર વિભાગ દ્વારા વિશેષ તૈયારીઓ હાથ ધરવામાં આવી છે. તમામ ફાયર સ્ટેશનો પર જરૂરી સાધન-સામગ્રી, રેસ્ક્યૂ બોટ, પમ્પિંગ મશીનો અને અન્ય બચાવ સાધનો તૈયાર રાખવામાં આવ્યા છે.
ફાયર વિભાગ દ્વારા તમામ અધિકારીઓ અને કર્મચારીઓની રજાઓ હાલ પૂરતી રદ કરવામાં આવી છે અને સમગ્ર સ્ટાફને 24 કલાક સ્ટેન્ડબાય રહેવા સૂચના આપવામાં આવી છે. ભારે વરસાદ, પાણી ભરાવાની સ્થિતિ, વૃક્ષ ધરાશાયી થવા, શોર્ટ સર્કિટ અથવા અન્ય કોઈપણ આપાતકાલીન ઘટનામાં તાત્કાલિક બચાવ અને રાહત કામગીરી હાથ ધરી શકાય તે માટે વિશેષ આયોજન કરવામાં આવ્યું છે. શહેરના સંવેદનશીલ વિસ્તારો પર પણ સતત નજર રાખવામાં આવી રહી છે.
આ દરમિયાન જામનગરના મેયર મોનિકાબેન વ્યાસ અને શાસક પક્ષના નેતા અમરભાઈ મોદીએ ફાયર વિભાગની મુલાકાત લઈને તૈયારીઓની સમીક્ષા કરી હતી. તેમણે ફાયર અધિકારીઓ સાથે ચર્ચા કરીને ઉપલબ્ધ સાધનો, માનવબળ અને ઇમર્જન્સી પ્રતિસાદ વ્યવસ્થાની માહિતી મેળવી હતી. સાથે જ કર્મચારીઓને કોઈપણ પરિસ્થિતિમાં સતર્ક રહીને ઝડપથી કામગીરી કરવાની સૂચના આપી હતી.
મેયરે જણાવ્યું હતું કે નાગરિકોની સુરક્ષા મહાનગરપાલિકાની પ્રથમ પ્રાથમિકતા છે અને ભારે વરસાદની સંભાવનાને ધ્યાનમાં રાખીને તમામ વિભાગો વચ્ચે સંકલન સ્થાપિત કરવામાં આવ્યું છે. ફાયર વિભાગ ઉપરાંત આરોગ્ય, એન્જિનિયરિંગ, ડ્રેનેજ અને અન્ય સંબંધિત વિભાગોને પણ એલર્ટ પર રાખવામાં આવ્યા છે, જેથી જરૂર પડ્યે તાત્કાલિક કામગીરી કરી શકાય.
જામનગર મહાનગરપાલિકાએ નાગરિકોને પણ અપીલ કરી છે કે ભારે વરસાદ દરમિયાન બિનજરૂરી બહાર ન નીકળવું, પાણી ભરાયેલા વિસ્તારોમાં જવાનું ટાળવું અને કોઈપણ આપાતકાલીન સ્થિતિમાં તરત જ ફાયર વિભાગ અથવા નિયંત્રણ કક્ષાનો સંપર્ક કરવો. આગામી દિવસોમાં હવામાનની સ્થિતિ પર સતત નજર રાખીને જરૂર મુજબ વધારાના પગલાં લેવામાં આવશે.
