સબરસ મહારાષ્ટ્રમાં પ્રેમિકાનો ખૌફનાક કાંડ! યુવકના....
થાણેમાં હચમચાવતો હત્યાકાંડ: યુવકના ટુકડા કરી ડ્રમમાં છુપાવ્યો મૃતદેહ, પ્રેમિકા પર હત્યાનો શંકા
મુંબઈ/થાણે: મહારાષ્ટ્રના થાણે જિલ્લાના કલ્યાણ વિસ્તારમાંથી એક અત્યંત ચોંકાવનારો હત્યાકાંડ સામે આવ્યો છે. બંધ ફ્લેટમાંથી આવતી અસહ્ય દુર્ગંધની ફરિયાદ બાદ પોલીસ તપાસ માટે પહોંચી હતી, જ્યાં બાથરૂમમાં રાખેલા પ્લાસ્ટિકના ડ્રમમાંથી એક યુવકનો ટુકડા કરાયેલો અને સડી ગયેલો મૃતદેહ મળી આવતા સમગ્ર વિસ્તારમાં હડકંપ મચી ગયો હતો. પ્રાથમિક તપાસમાં પોલીસને શંકા છે કે આ હત્યા યુવકની પ્રેમિકાએ કરી હોઈ શકે છે. આરોપી મહિલા ઘટના બાદ ફ્લેટને બહારથી બંધ કરીને કોલકાતા ભાગી ગઈ હોવાની આશંકા વ્યક્ત કરવામાં આવી રહી છે.
પ્રાપ્ત માહિતી મુજબ આ ઘટના કલ્યાણના મલંગ રોડ પર આવેલી નીલકંઠ સોસાયટીના એક ફ્લેટમાં બની હતી. છેલ્લા બે-ત્રણ દિવસથી ફ્લેટમાંથી સતત દુર્ગંધ આવતી હોવાથી સ્થાનિક રહેવાસીઓ પરેશાન હતા. શરૂઆતમાં લોકોએ સામાન્ય કારણ હોવાનું માની અવગણના કરી હતી, પરંતુ દુર્ગંધ સતત વધી જતાં સોસાયટીના લોકોએ માનપાડા પોલીસનો સંપર્ક કર્યો હતો.
સૂચના મળતા જ માનપાડા પોલીસની ટીમ ઘટનાસ્થળે પહોંચી હતી. ફ્લેટ બહારથી બંધ હોવાથી પોલીસે દરવાજાનું તાળું તોડીને અંદર પ્રવેશ કર્યો હતો. તપાસ દરમિયાન બાથરૂમમાં એક મોટો પ્લાસ્ટિકનો ડ્રમ મળી આવ્યો હતો. ડ્રમની અંદર એક બોરી રાખવામાં આવી હતી. જ્યારે પોલીસે બોરી ખોલી ત્યારે તેમાં એક યુવકનો ટુકડા કરાયેલો અને સડી ગયેલો મૃતદેહ મળી આવ્યો હતો. મૃતદેહની હાલત એવી હતી કે તેની ઓળખ કરવામાં પણ મુશ્કેલી પડી રહી હતી.
પોલીસના પ્રાથમિક અનુમાન મુજબ હત્યા બાદ મૃતદેહના ટુકડા કરીને તેને ડ્રમમાં છુપાવવામાં આવ્યો હતો. પુરાવા નાશ કરવાનો પ્રયાસ કરવા માટે બાથરૂમનો નળ ખુલ્લો રાખવામાં આવ્યો હોવાનું પણ તપાસમાં સામે આવ્યું છે. સતત વહેતા પાણીથી દુર્ગંધ અને અન્ય પુરાવાઓ નષ્ટ કરવાની કોશિશ કરવામાં આવી હોવાનું પોલીસ માની રહી છે. ઘટનાના થોડા સમય બાદ આરોપી મહિલા ફ્લેટ છોડીને કોલકાતા ભાગી ગઈ હોવાની શંકા વ્યક્ત કરવામાં આવી છે.
ફોરેન્સિક ટીમ અને ક્રાઈમ બ્રાન્ચના અધિકારીઓએ ઘટનાસ્થળેથી વિવિધ પુરાવાઓ એકત્ર કર્યા છે. મૃતદેહને પોસ્ટમોર્ટમ માટે મોકલી આપવામાં આવ્યો છે, જ્યારે મૃતકની ઓળખ અને હત્યાનું ચોક્કસ કારણ જાણવા માટે તપાસ હાથ ધરવામાં આવી છે. પોલીસ ફ્લેટમાં મળેલા દસ્તાવેજો, મોબાઇલ ફોન, સીસીટીવી ફૂટેજ અને અન્ય ડિજિટલ પુરાવાઓની પણ તપાસ કરી રહી છે.
પોલીસના જણાવ્યા મુજબ યુવક અને શંકાસ્પદ મહિલા વચ્ચેના સંબંધો, બંનેના કોલ રેકોર્ડ, મુસાફરીની વિગતો અને આર્થિક વ્યવહારોની પણ તપાસ કરવામાં આવી રહી છે. કોલકાતા તરફ ભાગી ગયાની આશંકાના આધારે સંબંધિત રાજ્યની પોલીસ સાથે પણ સંપર્ક સાધવામાં આવ્યો છે, જેથી શંકાસ્પદ મહિલાને ઝડપથી શોધી શકાય.
આ ઘટનાએ સમગ્ર કલ્યાણ વિસ્તારમાં ચકચાર મચાવી દીધી છે. સોસાયટીના રહેવાસીઓમાં ભયનો માહોલ જોવા મળી રહ્યો છે. જોકે, પોલીસે સ્પષ્ટ કર્યું છે કે હાલ તપાસ પ્રાથમિક તબક્કામાં છે અને યુવકની પ્રેમિકા પર માત્ર શંકા વ્યક્ત કરવામાં આવી છે. હત્યાના કારણો અને આરોપીની સંડોવણી અંગેનો અંતિમ નિષ્કર્ષ તપાસ પૂર્ણ થયા બાદ જ સામે આવશે.
