મારું શહેર જામનગરમાં શ્વાન પર ક્રૂર હુમલાનો વધુ એક બનાવ: જીવદયાપ્રેમીઓમાં ભારે રોષ, આરોપી સામે કડક કાર્યવાહીની માંગ

જામનગર શહેરમાં અબોલ પશુઓ પ્રત્યેની ક્રૂરતાનો વધુ એક ચોંકાવનારો અને નિંદનીય બનાવ સામે આવ્યો છે. શહેરના કામદાર કોલોની રોડ નં. 2 વિસ્તારમાં મોડી રાત્રે એક અજાણ્યા શખ્સે રસ્તા પર રહેતા વૃદ્ધ શ્વાન પર હોકી વડે નિર્દયતાપૂર્વક હુમલો કર્યો હોવાનું પ્રકાશમાં આવતા જીવદયાપ્રેમીઓ અને પશુપ્રેમીઓમાં ભારે રોષ ફેલાયો છે.

મળતી માહિતી મુજબ, હુમલાખોરે કોઈ કારણ વિના શ્વાનને નિશાન બનાવી તેના માથાના ભાગે હોકીના ફટકા ઝીંક્યા હતા. હુમલો એટલો ગંભીર હતો કે શ્વાનને ગંભીર ઇજાઓ પહોંચી હતી અને ભારે રક્તસ્ત્રાવ શરૂ થયો હતો. સ્થાનિક લોકોની જાણ થતાં ઘાયલ શ્વાનને તાત્કાલિક સારવાર માટે પશુચિકિત્સા કેન્દ્રમાં ખસેડવામાં આવ્યો હતો.

નાકની નસને નુકસાન, આંખ પર પણ ગંભીર અસર

પશુચિકિત્સકોના જણાવ્યા અનુસાર હુમલામાં શ્વાનના નાકના ભાગે ગંભીર ઇજા પહોંચી છે અને તેની નસોને નુકસાન થયું હોવાનું પ્રાથમિક તપાસમાં સામે આવ્યું છે. ઉપરાંત એક આંખ પર પણ ગંભીર અસર થઈ હોવાનું જાણવા મળ્યું છે. હાલ શ્વાનની સારવાર ચાલી રહી છે અને તેની સ્થિતિ પર સતત નજર રાખવામાં આવી રહી છે.

જીવદયાપ્રેમીઓમાં ઉગ્ર પ્રતિક્રિયા

ઘટનાની જાણ થતાં શહેરના અનેક જીવદયાપ્રેમીઓ, પશુપ્રેમીઓ અને સામાજિક કાર્યકરોમાં ભારે આક્રોશ જોવા મળ્યો હતો. નિર્દોષ અને અબોલ જીવ પર આ પ્રકારની ક્રૂરતા કરનાર વ્યક્તિ સામે કડકમાં કડક કાયદેસરની કાર્યવાહી કરવામાં આવે તેવી માંગ ઉઠી છે.

જીવદયાપ્રેમીઓનું કહેવું છે કે છેલ્લા કેટલાક સમયથી શહેરમાં પશુઓ સાથે દુર્વ્યવહાર અને ક્રૂરતાના બનાવોમાં વધારો જોવા મળી રહ્યો છે, જે ચિંતાજનક બાબત છે. આવા બનાવો સામે કડક કાર્યવાહી નહીં થાય તો અસામાજિક તત્વોનો મનોબળ વધુ વધશે.

સીટી સી-ડિવિઝન પોલીસ મથકે પહોંચ્યા જીવદયાપ્રેમીઓ

આ ઘટનાને ગંભીરતાથી લઈને જીવદયાપ્રેમીઓનો એક જૂથ સીટી સી-ડિવિઝન પોલીસ મથકે પહોંચ્યો હતો. તેઓએ હુમલાખોર સામે પોલીસ ફરિયાદ નોંધાવી કાયદેસરની કાર્યવાહી કરવાની માંગ કરી હતી.

જીવદયાપ્રેમીઓએ જણાવ્યું હતું કે પશુઓ પર અત્યાચાર અટકાવવા માટે બનાવાયેલા કાયદાઓનો કડક અમલ થવો જોઈએ અને આરોપીને શોધી તેની સામે દાખલારૂપ કાર્યવાહી કરવી જોઈએ.

સીસીટીવી ફૂટેજના આધારે તપાસ શરૂ

ઘટના સ્થળ આસપાસ આવેલા સીસીટીવી કેમેરાના ફૂટેજ મેળવવાની કાર્યવાહી હાથ ધરવામાં આવી છે. પોલીસ અને સંબંધિત તંત્ર હુમલાખોરની ઓળખ મેળવવા માટે ફૂટેજની તપાસ કરી રહ્યા હોવાનું જાણવા મળ્યું છે.

સ્થાનિક લોકોનું માનવું છે કે સીસીટીવીના આધારે આરોપીની ઝડપથી ઓળખ થઈ શકે છે અને તેને કાયદાના કટઘરામાં લાવી શકાય છે.

પશુઓ પ્રત્યે સંવેદનશીલ બનવાની જરૂર

સામાજિક આગેવાનો અને પશુપ્રેમીઓએ આ ઘટનાને માનવતાને શરમાવે તેવી ગણાવી છે. તેઓએ જણાવ્યું કે અબોલ પશુઓ સમાજનો અભિન્ન ભાગ છે અને તેમના પ્રત્યે દયા, કરુણા અને સંવેદનશીલતા રાખવી દરેક નાગરિકની નૈતિક જવાબદારી છે.

હાલ સમગ્ર શહેરની નજર હવે પોલીસ તપાસ પર મંડાઈ છે. જીવદયાપ્રેમીઓ અને નાગરિકોની માંગ છે કે આરોપીને તાત્કાલિક શોધી તેની સામે કડક કાયદેસરની કાર્યવાહી કરવામાં આવે, જેથી ભવિષ્યમાં કોઈપણ વ્યક્તિ અબોલ જીવ પર અત્યાચાર કરવાની હિંમત ન કરી શકે.