ક્રાઇમ જામજોધપુરના સોનવડીયા ગામે સગીર વિદ્યાર્થી સાથે જાતીય સતામણીનો ગંભીર કિસ્સો, આરોપી સામે પોક્સો હેઠળ ગુનો

જામનગર: જામજોધપુર તાલુકાના સોનવડીયા ગામમાં 15 વર્ષના સગીર વિદ્યાર્થી સાથે જાતીય સતામણી અને ધમકી આપ્યાનો ચોંકાવનારો બનાવ સામે આવ્યો છે. આ મામલે જામજોધપુર પોલીસ સ્ટેશનમાં આરોપી વિરુદ્ધ ભારતીય ન્યાય સંહિતા (BNS) તથા પોક્સો અધિનિયમ હેઠળ ગુનો નોંધવામાં આવ્યો છે.

પ્રાપ્ત વિગતો મુજબ, સોનવડીયા ગામની ઇન્દિરા સોસાયટીમાં રહેતા એક વ્યક્તિએ પોલીસમાં નોંધાવેલી ફરિયાદ અનુસાર તેમનો 15 વર્ષીય પુત્ર શાળામાં અભ્યાસ કરે છે અને ગામમાં દૈનિક કામકાજ માટે આવન-જાવન કરતો હતો. દરમિયાન ગામમાં રહેતા રાણાભાઈ નૈયાભાઈ રાડા (રબારી) નામના શખ્સે અગાઉ આપેલા રૂ.20ના બહાને સગીર પાસે રૂ.3,000ની માંગણી શરૂ કરી હતી.

ફરિયાદમાં જણાવ્યા મુજબ, સગીરે રૂપિયા આપવાની અસમર્થતા દર્શાવતા આરોપીએ તેના પર અયોગ્ય દબાણ ઉભું કરી અશ્લીલ અને સૃષ્ટિ વિરુદ્ધનું કૃત્ય કરવાની માંગણી કરી હતી. સગીરે તેનો વિરોધ કરતાં આરોપીએ તેને તેમજ તેના પિતાને જાનથી મારી નાખવાની ધમકી આપી હતી.

આ ઘટનાથી સગીર અને તેનો પરિવાર ભયભીત થઈ ગયો હતો. અંતે પરિવારજનોએ સમગ્ર મામલે જામજોધપુર પોલીસનો સંપર્ક કરી ફરિયાદ નોંધાવી હતી.

પોલીસે આરોપી રાણાભાઈ નૈયાભાઈ રાડા સામે ભારતીય ન્યાય સંહિતા-2023ની કલમ 308(4), 351(3) તેમજ પોક્સો અધિનિયમની કલમ 12 અને 18 હેઠળ ગુનો નોંધી કાયદેસરની કાર્યવાહી હાથ ધરી છે.

બનાવની વધુ તપાસ પોલીસ ઇન્સ્પેક્ટર એન.બી. ચૌહાણ ચલાવી રહ્યા છે. પોલીસ દ્વારા આરોપીની પૂછપરછ સહિત અન્ય પુરાવાઓ એકત્ર કરવાની કામગીરી શરૂ કરવામાં આવી છે.

સગીરો સાથેના આવા ગુનાઓને લઈને કાયદામાં કડક જોગવાઈઓ કરવામાં આવી છે અને પોક્સો અધિનિયમ હેઠળ આવા કેસોની સંવેદનશીલતાથી તપાસ કરવામાં આવે છે. સ્થાનિક સ્તરે આ બનાવને લઈને ભારે ચર્ચા જાગી છે.