ક્રાઇમ કેશોદ એરપોર્ટ ગેટ સામેના મકાનમાંથી ₹1.99 લાખનો વિદેશી દારૂ ઝડપાયો.

જુનાગઢ જિલ્લા લોકલ ક્રાઇમ બ્રાન્ચ (LCB) એ કેશોદના એરપોર્ટ ગેટ સામે આવેલા વાસાવાડી વિસ્તારમાં મોટી કાર્યવાહી કરીને ભારતીય બનાવટના વિદેશી દારૂનો જંગી જથ્થો ઝડપી પાડ્યો છે. પોલીસે એક રહેણાંક મકાન પર દરોડો પાડી કુલ 1320 નંગ દારૂ અને બીયરના ટીન કબજે કર્યા છે, જેની બજાર કિંમત રૂ. 1,99,152 થાય છે. આ કાર્યવાહી બાદ સમગ્ર વિસ્તારમાં ખળભળાટ મચી ગયો છે.

પ્રાપ્ત વિગતો મુજબ, જુનાગઢ એલસીબીના પોલીસ કોન્સ્ટેબલ પૃથ્વીરાજસિંહ જયવંતસિંહ રાયજાદા તથા દેવેનભાઈ જીજુભાઈ સિંધવ પેટ્રોલિંગમાં હતા ત્યારે ખાનગી બાતમીદાર મારફતે ચોક્કસ માહિતી મળી હતી કે કેશોદ એરપોર્ટ ગેટ સામે આવેલા વાસાવાડી વિસ્તારમાં રહેતો રામા ઉર્ફે કસ્યો કારાભાઈ કોડીયાતર પોતાના રહેણાંક મકાનમાં બહારના રાજ્યમાંથી મંગાવેલો વિદેશી દારૂનો જથ્થો સંગ્રહ કરી વેચાણ કરી રહ્યો છે.

બાતમીના આધારે પોલીસ ટીમે પંચોને સાથે રાખી સ્થળ પર દરોડો પાડ્યો હતો. પોલીસ પહોંચતા જ મકાનનો દરવાજો ખુલ્લો જોવા મળ્યો હતો. જોકે પોલીસની હાજરીની જાણ થતાં આરોપી રામા ઉર્ફે કસ્યો કારાભાઈ કોડીયાતર સ્થળ પરથી નાસી છૂટ્યો હતો. ત્યારબાદ પોલીસે સમગ્ર મકાનની સઘન તપાસ હાથ ધરી હતી.

તપાસ દરમિયાન મકાનમાં રાખેલા પ્લાસ્ટિકના બાચકા તથા પુઠાની પેટીઓમાંથી અલગ-અલગ બ્રાન્ડનો ભારતીય બનાવટનો વિદેશી દારૂ અને બીયરનો જથ્થો મળી આવ્યો હતો. જેમાં 8 PM Special Rare Whisky ની 504 બોટલ, Green Label Whisky ની 384 બોટલ, RJ Green Special Whisky ની 408 બોટલ તેમજ Kingfisher Strong Premium Beer ના 24 ટીન મળી આવ્યા હતા.

પોલીસે કબજે કરેલા મુદ્દામાલમાં 504 નંગ 8 PM સ્પેશિયલ રેર વ્હિસ્કીની કિંમત રૂ. 79,624, 384 નંગ ગ્રીન લેબલ વ્હિસ્કીની કિંમત રૂ. 54,528, 408 નંગ આર.જે. ગ્રીન સ્પેશિયલ વ્હિસ્કીની કિંમત રૂ. 61,200 તથા 24 ટીન કિંગફિશર સ્ટ્રોંગ પ્રીમિયમ બીયરની કિંમત રૂ. 4,800 મળી કુલ રૂ. 1,99,152નો મુદ્દામાલ જપ્ત કરવામાં આવ્યો હતો.

આ મામલે કેશોદ પોલીસ સ્ટેશનમાં આરોપી રામા ઉર્ફે કસ્યો કારાભાઈ કોડીયાતર, રહે. વાસાવાડી, એરપોર્ટ ગેટ સામે, કેશોદ વિરુદ્ધ ગુજરાત પ્રોહિબિશન એક્ટની કલમ 65-A અને 65(E) હેઠળ ગુનો દાખલ કરવામાં આવ્યો છે. કેસની વધુ તપાસ એએસઆઈ જગમાલભાઈ ખીમાભાઈ ગરચર ચલાવી રહ્યા છે.

પોલીસના જણાવ્યા મુજબ હાલ આરોપી ફરાર હોવાથી તેને ઝડપી પાડવા માટે અલગ-અલગ ટીમો કાર્યરત કરવામાં આવી છે. ઉપરાંત આ દારૂનો જથ્થો ક્યાંથી મંગાવવામાં આવ્યો હતો, તેની પાછળ કોણ-કોણ સંકળાયેલા છે અને તેનો સપ્લાય ક્યાં કરવાનું હતું તે અંગે પણ તપાસનો ધમધમાટ શરૂ કરવામાં આવ્યો છે.

આ સમગ્ર કાર્યવાહીનો સૌથી ચર્ચાસ્પદ મુદ્દો એ રહ્યો કે જુનાગઢ ક્રાઇમ બ્રાન્ચે કેશોદ પોલીસને અગાઉથી જાણ કર્યા વિના સીધી રેઇડ કરી હોવાની ચર્ચા પોલીસ બેડામાં જોરશોરથી ચાલી રહી છે. જેના કારણે સ્થાનિક પોલીસ તંત્રમાં પણ ખળભળાટ મચી ગયો છે.

ઉલ્લેખનીય છે કે કેશોદ અને આસપાસના ગ્રામ્ય વિસ્તારોમાંથી પસાર થતા આંતરિક રસ્તાઓનો ઉપયોગ છેલ્લા કેટલાક સમયથી બુટલેગરો દ્વારા દારૂની હેરફેર માટે કરવામાં આવતો હોવાના આક્ષેપો થતા રહ્યા છે. અગાઉ પણ એરપોર્ટ રોડ સહિતના વિસ્તારોમાંથી વિદેશી દારૂના જથ્થા ઝડપાયા હતા. આવી સ્થિતિમાં ફરી એકવાર મોટી માત્રામાં દારૂ મળી આવતાં કાયદો-વ્યવસ્થાને લઈને અનેક સવાલો ઉભા થયા છે.

સ્થાનિક લોકોનું માનવું છે કે જો આવા ગેરકાયદેસર ધંધાઓ સામે સતત અને કડક કાર્યવાહી નહીં કરવામાં આવે તો કેશોદ તાલુકો બુટલેગરો માટે સુરક્ષિત કેન્દ્ર બની શકે છે. હાલ પોલીસે ફરાર આરોપીની શોધખોળ તેજ કરી છે અને સમગ્ર નેટવર્કનો પર્દાફાશ કરવા માટે તપાસના ચક્રો ગતિમાન કર્યા છે.