'એક પેડ મા કે નામ' અભિયાન હેઠળ મહાવૃક્ષારોપણ, સ્વચ્છતા શ્રમદાનથી આપ્યો હરિયાળા ગુજરાતનો સંકલ્પ

ગુજરાતના રાજ્યપાલ આચાર્ય દેવવ્રતજીએ ભાવનગર જિલ્લાના પ્રવાસ દરમિયાન ભાવનગર તાલુકાના સરતાનપર ગામે યોજાયેલા 'એક પેડ મા કે નામ' અભિયાનમાં સહભાગી બની પર્યાવરણ સંરક્ષણ અને સ્વચ્છતાનો પ્રેરણાદાયી સંદેશ આપ્યો હતો. ગામના 'મા ખોડીયાર વન' પરિસરમાં યોજાયેલા કાર્યક્રમ દરમિયાન રાજ્યપાલશ્રીએ ગ્રામજનો, અધિકારીઓ અને મહાનુભાવો સાથે મળીને આશરે 100 જેટલાં દેશી પ્રજાતિના વૃક્ષોનું મહાવૃક્ષારોપણ કર્યું હતું. તેમણે જણાવ્યું હતું કે, આ અભિયાન માત્ર વૃક્ષો વાવવાનો કાર્યક્રમ નથી, પરંતુ આવનારી પેઢીઓને હરિયાળું, સ્વસ્થ અને પર્યાવરણ-સંતુલિત ભારત આપવાનો રાષ્ટ્રીય સંકલ્પ છે. કાર્યક્રમ દરમિયાન રાજ્યપાલશ્રીએ ગ્રામજનો સાથે સ્વચ્છતા હી સેવા અભિયાન અંતર્ગત શ્રમદાન પણ કર્યું અને સ્વચ્છતા કર્મચારીઓનું સન્માન કરીને તેમના યોગદાનને બિરદાવ્યું હતું.

કાર્યક્રમને સંબોધતા રાજ્યપાલ આચાર્ય દેવવ્રતજીએ જણાવ્યું હતું કે, વડાપ્રધાન શ્રી નરેન્દ્ર મોદી દ્વારા શરૂ કરાયેલા 'એક પેડ મા કે નામ' અભિયાનનો હેતુ માત્ર વૃક્ષારોપણ સુધી મર્યાદિત નથી. દરેક નાગરિકે પોતાના દ્વારા વાવવામાં આવેલા વૃક્ષનું વર્ષો સુધી જતન અને સંવર્ધન કરવાની જવાબદારી પણ નિભાવવી જોઈએ. તેમણે જણાવ્યું કે આજે સમગ્ર વિશ્વ જળવાયુ પરિવર્તન, વધતા પ્રદૂષણ અને ઘટતા જંગલોના પડકારોનો સામનો કરી રહ્યું છે. આવી સ્થિતિમાં વધુમાં વધુ વૃક્ષો વાવવા અને તેમનું સંરક્ષણ કરવું એ સમયની સૌથી મોટી જરૂરિયાત બની છે. સરતાનપર ગામમાં મંદિરની જમીન પર વિશાળ વિસ્તારમાં હાથ ધરાયેલું વૃક્ષારોપણ અને તેની સંભાળ રાખવાની ગ્રામજનોની સ્વૈચ્છિક પ્રતિબદ્ધતા સમગ્ર ગુજરાત માટે અનુસરણીય ઉદાહરણ છે.

રાજ્યપાલશ્રીએ પોતાના સંબોધનમાં વૃક્ષોના મહત્વ પર વિશેષ ભાર મૂકતા જણાવ્યું હતું કે વૃક્ષો માત્ર પર્યાવરણ માટે જ નહીં પરંતુ સમગ્ર માનવજાત માટે જીવનદાતા સમાન છે. પ્રાણવાયુનો મુખ્ય સ્ત્રોત હોવા ઉપરાંત વૃક્ષો જૈવ વૈવિધ્યનું સંરક્ષણ કરે છે, વરસાદના ચક્રને સંતુલિત રાખે છે, જમીનનું ધોવાણ અટકાવે છે અને અસંખ્ય પક્ષીઓ તથા જીવસૃષ્ટિને આશ્રય આપે છે. તેમણે કહ્યું કે વૃક્ષો નિઃસ્વાર્થ સેવા, પરોપકાર અને સમર્પણનો જીવંત સંદેશ આપે છે. આપણે થોડા વર્ષો સુધી વૃક્ષનું જતન કરીએ છીએ, જ્યારે તે દાયકાઓ સુધી સમાજને ઓક્સિજન, ફળ, છાંયો અને પર્યાવરણનું સંતુલન જાળવીને સેવા આપે છે. તેથી દરેક નાગરિકે જીવનમાં ઓછામાં ઓછું એક વૃક્ષ વાવી તેનું નિયમિત સંવર્ધન કરવાનો સંકલ્પ લેવો જોઈએ.

રાજ્યપાલશ્રીએ વધુમાં જણાવ્યું હતું કે 'એક પેડ મા કે નામ' અભિયાન માત્ર ઔપચારિક સરકારી કાર્યક્રમ નથી પરંતુ તેને વ્યાપક જનભાગીદારીથી સફળ જનઆંદોલન બનાવવાની જરૂર છે. તેમણે સરતાનપર ગામની સ્વચ્છતા, હરિયાળી અને પર્યાવરણ પ્રત્યેની જાગૃતતા માટે ગ્રામજનોની પ્રશંસા કરી હતી. તેમણે જણાવ્યું કે જ્યારે સમગ્ર ગામ એકજૂથ થઈને પર્યાવરણ સંરક્ષણ અને સ્વચ્છતાનું કાર્ય કરે છે ત્યારે તે અન્ય ગામો માટે પણ પ્રેરણાનું કેન્દ્ર બને છે. રાજ્યપાલશ્રીએ લોકોને પ્લાસ્ટિકનો ઉપયોગ ઘટાડવા, પાણીનું સંરક્ષણ કરવા અને વધુમાં વધુ હરિયાળી વધારવા માટે સતત પ્રયાસો ચાલુ રાખવા આહ્વાન કર્યું હતું.

આ પ્રસંગે રાજ્યપાલશ્રી, ઉપસ્થિત મહાનુભાવો અને સરતાનપર ગામના ગ્રામજનોએ સંયુક્ત રીતે પીપળો, વડલો, બહેડા, લીમડો, જાંબુ, આંબા, ગરમાળો સહિત વિવિધ દેશી પ્રજાતિના વૃક્ષોનું મહાવૃક્ષારોપણ કર્યું હતું. કાર્યક્રમની સૌથી નોંધપાત્ર બાબત એ રહી કે વાવવામાં આવેલા તમામ વૃક્ષોના જતન અને સંવર્ધનની જવાબદારી ગામના ગ્રામજનોએ સ્વૈચ્છિક રીતે સ્વીકારી છે. આ નિર્ણય ગ્રામજનોના પર્યાવરણ પ્રત્યેના માલિકીભાવ અને જવાબદારીનું ઉત્તમ ઉદાહરણ માનવામાં આવી રહ્યું છે. નિષ્ણાતોના મત મુજબ દેશી પ્રજાતિના વૃક્ષો સ્થાનિક આબોહવામાં વધુ સારી રીતે વિકસે છે અને પર્યાવરણ માટે પણ વધુ લાભદાયી સાબિત થાય છે.

વૃક્ષારોપણ કાર્યક્રમ પૂર્ણ થયા બાદ રાજ્યપાલ આચાર્ય દેવવ્રતજીએ 'સ્વચ્છતા હી સેવા' અભિયાન હેઠળ ગ્રામજનો સાથે મળીને સફાઈ અભિયાનમાં પણ ભાગ લીધો હતો. તેમણે સ્વયં શ્રમદાન કરીને સ્વચ્છતા પ્રત્યે જનજાગૃતિ ફેલાવવાનો પ્રયાસ કર્યો હતો. ત્યારબાદ ગામના સ્વચ્છતા કર્મચારીઓનું સન્માન કરીને તેમણે જણાવ્યું હતું કે સમાજને સ્વચ્છ, સ્વસ્થ અને સુંદર બનાવવામાં સફાઈ કર્મચારીઓનું યોગદાન અત્યંત મહત્વપૂર્ણ છે. તેમના નિષ્ઠાપૂર્વકના કાર્યને કારણે જ સ્વચ્છ ભારતના સંકલ્પને સાકાર કરવામાં સફળતા મળી રહી છે. રાજ્યપાલશ્રીએ દરેક નાગરિકને પોતાના ગામ અને શહેરને સ્વચ્છ રાખવાની સામૂહિક જવાબદારી નિભાવવાનું પણ આહ્વાન કર્યું હતું.

આ કાર્યક્રમમાં જિલ્લા કલેક્ટર મનીષકુમાર બંસલ, જિલ્લા વિકાસ અધિકારી હનુલ ચૌધરી, જિલ્લા પોલીસ અધિક્ષક નીતેશ પાંડેય, નાયબ જિલ્લા વિકાસ અધિકારી ડી.કે. સોનાર, સરતાનપર ગામના સરપંચ ધર્મેન્દ્રભાઈ બારૈયા સહિત વિવિધ વિભાગોના અધિકારીઓ, પદાધિકારીઓ અને મોટી સંખ્યામાં ગ્રામજનો ઉપસ્થિત રહ્યા હતા. સમગ્ર કાર્યક્રમમાં પર્યાવરણ સંરક્ષણ, વૃક્ષારોપણ, સ્વચ્છતા અને જનભાગીદારીનો મજબૂત સંદેશ આપવામાં આવ્યો હતો. રાજ્યપાલશ્રીની આ મુલાકાતે માત્ર સરતાનપર ગામમાં હરિયાળી વધારવાનો સંકલ્પ જ મજબૂત કર્યો નથી, પરંતુ સમગ્ર રાજ્યમાં પર્યાવરણ જાળવણી અને સ્વચ્છતા માટે લોકોમાં નવી પ્રેરણા પણ પ્રગટાવી છે.