મારું શહેર રાજ્યપાલ આચાર્ય દેવવ્રત બે દિવસીય જામનગર પ્રવાસે, એરપોર્ટ ખાતે ઉષ્માભેર સ્વાગત.

જામનગર, તા. 12 જુલાઈ:
ગુજરાતના રાજ્યપાલ આચાર્ય દેવવ્રત આજે બે દિવસીય જામનગર જિલ્લા પ્રવાસે પહોંચ્યા હતા. જામનગર એરપોર્ટ ખાતે રાજ્યપાલશ્રીનું જિલ્લા વહીવટી તંત્ર, જનપ્રતિનિધિઓ અને મહાનુભાવોએ ઉષ્માભેર સ્વાગત કર્યું હતું. સ્વાગત સમારોહ બાદ રાજ્યપાલશ્રીને ઔપચારિક ગાર્ડ ઓફ ઓનર અર્પણ કરવામાં આવ્યો હતો.

રાજ્યપાલશ્રીના આ બે દિવસીય પ્રવાસ દરમિયાન જામનગર શહેર તેમજ ધ્રોલ તાલુકાના લતીપુર ગામે વિવિધ જાહેર અને કૃષિલક્ષી કાર્યક્રમોનું આયોજન કરવામાં આવ્યું છે. ખાસ કરીને પ્રાકૃતિક કૃષિના પ્રચાર-પ્રસાર અને પર્યાવરણ સંરક્ષણને પ્રોત્સાહન આપતા અનેક કાર્યક્રમો યોજાનાર છે, જેમાં ખેડૂતો, ગ્રામજનો અને વિવિધ ક્ષેત્રના આગેવાનો મોટી સંખ્યામાં જોડાશે.

પ્રવાસ દરમિયાન રાજ્યપાલશ્રીના અધ્યક્ષસ્થાને પ્રાકૃતિક કૃષિ સ્ટોલનું લોકાર્પણ, વૃક્ષારોપણ કાર્યક્રમ, સ્વચ્છતા અભિયાન, ખાટલા પરિષદ, યોગાસન કાર્યક્રમ, પ્રાકૃતિક ફાર્મની મુલાકાત તેમજ ખેડૂતો સાથે કૃષિ સંવાદ જેવા વિવિધ કાર્યક્રમો યોજાશે. આ કાર્યક્રમોનો મુખ્ય ઉદ્દેશ્ય પ્રાકૃતિક ખેતીને પ્રોત્સાહન આપવાનો, પર્યાવરણ જાગૃતિ વધારવાની અને ખેડૂતો સાથે સીધો સંવાદ સ્થાપિત કરવાનો છે.

રાજ્યપાલશ્રીના સ્વાગત પ્રસંગે રાજ્ય સરકાર અને સ્થાનિક વહીવટીતંત્રના અનેક મહાનુભાવો ઉપસ્થિત રહ્યા હતા. તેમાં રાજ્યકક્ષાના શિક્ષણમંત્રી શ્રી રીવાબા જાડેજા, જામનગરના મેયર મોનિકા વ્યાસ, જિલ્લા પંચાયત પ્રમુખ રંજનબેન જીવાણી, ધારાસભ્ય મેઘજીભાઈ ચાવડા, ધારાસભ્ય દિવ્યેશભાઈ અકબરી, જિલ્લા કલેક્ટર પી.બી. પંડ્યા, જામનગર મહાનગરપાલિકા કમિશનર દીપેશ કેડિયા, જિલ્લા વિકાસ અધિકારી નિશા, જિલ્લા પોલીસ વડા ડૉ. રવિ મોહન સૈની તેમજ અગ્રણી બીનાબેન કોઠારી સહિતના મહાનુભાવો હાજર રહ્યા હતા.

રાજ્યપાલશ્રીનો આ પ્રવાસ પ્રાકૃતિક કૃષિ, પર્યાવરણ સંરક્ષણ અને ગ્રામ વિકાસને કેન્દ્રમાં રાખીને આયોજિત કરવામાં આવ્યો છે. લતીપુર ખાતે યોજાનારા કાર્યક્રમોમાં ખેડૂતોને પ્રાકૃતિક ખેતીની પદ્ધતિઓ, ઓછી ખર્ચાળ કૃષિ અને જમીનની ફળદ્રુપતા જાળવવા અંગે માર્ગદર્શન આપવામાં આવશે. ઉપરાંત યોગ, સ્વચ્છતા અને વૃક્ષારોપણ જેવા કાર્યક્રમો દ્વારા સમાજમાં આરોગ્ય અને પર્યાવરણ પ્રત્યે જાગૃતિ લાવવાનો પણ પ્રયાસ કરવામાં આવશે.

રાજ્યપાલ આચાર્ય દેવવ્રત લાંબા સમયથી પ્રાકૃતિક ખેતીના સમર્થક તરીકે ઓળખાય છે અને દેશભરમાં ખેડૂતોને રાસાયણિક ખેતીના વિકલ્પ તરીકે પ્રાકૃતિક ખેતી અપનાવવા પ્રેરિત કરી રહ્યા છે. જામનગર જિલ્લાના આ પ્રવાસ દરમિયાન તેઓ ખેડૂતો સાથે સીધો સંવાદ કરીને તેમના પ્રશ્નો સાંભળશે તેમજ પ્રાકૃતિક ખેતીના લાભો અંગે માર્ગદર્શન આપશે.

જામનગર જિલ્લામાં રાજ્યપાલશ્રીના આગમનને લઈને વહીવટી તંત્ર દ્વારા તમામ તૈયારીઓ પૂર્ણ કરવામાં આવી છે. વિવિધ કાર્યક્રમોમાં મોટી સંખ્યામાં ખેડૂતો, સ્થાનિક નાગરિકો, જનપ્રતિનિધિઓ અને અધિકારીઓ ઉપસ્થિત રહે તેવી શક્યતા છે. રાજ્યપાલશ્રીના આ બે દિવસીય પ્રવાસથી જિલ્લામાં પ્રાકૃતિક કૃષિ અને ગ્રામ વિકાસ સંબંધિત પ્રવૃત્તિઓને નવી દિશા અને પ્રોત્સાહન મળશે તેવી અપેક્ષા વ્યક્ત કરવામાં આવી રહી છે.