મારું શહેર ચૂંટણી કાર્ડમાં ગંભીર બેદરકારી: દિકરાનું નામ સુધારતા પિતાની સરનેમ જ બદલી નાખી, તપાસની માંગ.
ચૂંટણી કાર્ડમાં નામ સુધારવાની પ્રક્રિયા દરમિયાન ગંભીર બેદરકારીનો એક ચોંકાવનારો કિસ્સો સામે આવ્યો છે. દિકરાના નામ અને સરનેમમાં સુધારો કરતી વખતે સંબંધિત અધિકારીઓએ પિતાના નામ પાછળની સરનેમ જ બદલી નાખી હોવાનું સામે આવ્યું છે. જેના કારણે સમગ્ર પરિવારને ફરી સરકારી કચેરીના ધક્કા ખાવાની ફરજ પડી છે.
મળતી માહિતી મુજબ, વિજય સુગરના નામમાં જરૂરી સુધારો કરવાની પ્રક્રિયા દરમિયાન સરનેમ "સુમણીયા" કરી દેવામાં આવી હતી. પરંતુ તે જ સમયે તેમના પિતા હોથીભા સુમણીયાના નામ પાછળની મૂળ સરનેમ બદલીને "હોથીભા સુગર" કરી દેવામાં આવી. એટલે કે, પુત્રનો રેકોર્ડ સુધારવાના બદલે પિતાનો જ રેકોર્ડ ખોટી રીતે બદલાઈ ગયો.
આ ઘટના ચૂંટણી નોંધણી પ્રક્રિયામાં ગંભીર બેદરકારી અને ચકાસણીના અભાવ તરફ ઈશારો કરે છે. પોતાનું નામ કે ઓળખ કોઈ વ્યક્તિ ભૂલતો નથી, પરંતુ સરકારી રેકોર્ડમાં આવી રીતે જાતિ, સરનેમ અને ઓળખ સાથે ચેડાં થવા નાગરિકો માટે ચિંતાનો વિષય છે. આવી ભૂલોને કારણે લોકોને વારંવાર સરકારી કચેરીઓના ધક્કા ખાવા પડે છે, સમય અને નાણાં બંનેનો બગાડ થાય છે તેમજ જરૂરી દસ્તાવેજોમાં પણ વિસંગતતા સર્જાય છે.
આ મામલે ચૂંટણી પંચે તાત્કાલિક તપાસ કરવી જોઈએ અને જવાબદાર અધિકારીઓ સામે કડક કાર્યવાહી કરવી જોઈએ તેવી માંગ ઉઠી રહી છે. સાથે જ ચૂંટણી કાર્ડમાં કોઈપણ પ્રકારના સુધારા કરતા પહેલાં ડબલ વેરિફિકેશન અને દસ્તાવેજોની ફરજિયાત ચકાસણીની વ્યવસ્થા અમલમાં મૂકવી જોઈએ, જેથી ભવિષ્યમાં આવી ગંભીર ભૂલો ન બને.
નાગરિકોની ઓળખ, નામ અને સરનેમ તેમની કાનૂની ઓળખનો મહત્વપૂર્ણ ભાગ છે. તેથી સરકારી તંત્રએ ખાતરી કરવી જોઈએ કે કોઈપણ સુધારાની પ્રક્રિયામાં અન્ય વ્યક્તિની વિગતોમાં અનિચ્છનીય ફેરફાર ન થાય. અસરગ્રસ્ત પરિવારે પણ પ્રશ્ન ઉઠાવ્યો છે કે, "શું અમારી ભૂલ વગર પણ અમારે જ સરકારી કચેરીઓના ધક્કા ખાવા પડે?" હવે જોવાનું એ રહેશે કે ચૂંટણી પંચ આ ગંભીર બેદરકારી સામે શું કાર્યવાહી કરે છે.
