મારું શહેર જામનગરમાં આશા વર્કર બહેનોનું ઉગ્ર વિરોધ પ્રદર્શન: માનદવેતન વધારા સહિત પડતર માંગણીઓ માટે કલેક્ટર કચેરીએ આવેદનપત્ર પાઠવ્યું.
જામનગરમાં આશા વર્કર બહેનોએ વર્ષ 2022થી માનદવેતનમાં કોઈ વધારો ન કરવામાં આવ્યો હોવાની ફરિયાદ સાથે તેમજ લાંબા સમયથી પડતર રહેલી વિવિધ માંગણીઓના નિરાકરણની માંગ ઉઠાવીને વિરોધ પ્રદર્શન કર્યું હતું. દેશવ્યાપી આંદોલનના ભાગરૂપે અખિલ ભારતીય મજદૂર સંઘના નેજા હેઠળ જામનગરના લાલ બંગલા સર્કલ ખાતે બપોરે 11 વાગ્યે મોટી સંખ્યામાં આશા વર્કર બહેનો એકત્રિત થઈ સામૂહિક ધરણા પર બેઠી હતી.
આંદોલન દરમિયાન આશા વર્કર બહેનોએ સરકાર સામે પોતાની વિવિધ પડતર માંગણીઓ રજૂ કરી હતી. તેમનું કહેવું હતું કે છેલ્લા ઘણા વર્ષોથી તેઓ આરોગ્ય વિભાગના વિવિધ કાર્યક્રમોમાં મહત્વપૂર્ણ કામગીરી બજાવી રહ્યા છે, છતાં તેમને મળતું માનદવેતન અત્યંત ઓછું છે અને વર્ષ 2022 બાદ તેમાં કોઈ વધારો કરવામાં આવ્યો નથી. વધતી મોંઘવારી વચ્ચે હાલનું માનદવેતન જીવન નિર્વાહ માટે પૂરતું ન હોવાથી સરકાર તાત્કાલિક યોગ્ય નિર્ણય લે તેવી માંગ કરવામાં આવી હતી.
આશા વર્કરોએ માંગ કરી હતી કે તેમનો લઘુત્તમ માસિક પગાર રૂ. 18,000થી વધારી રૂ. 36,000 સુધી સુનિશ્ચિત કરવામાં આવે, જેથી તેઓને આર્થિક સુરક્ષા મળી રહે. સાથે જ આશા કાર્યકરોને રાષ્ટ્રીય આરોગ્ય મિશન (NHM) હેઠળ કાયમી રીતે મર્જ કરવામાં આવે અને વર્ષોથી ચાલતી કોન્ટ્રાક્ટ સિસ્ટમનો અંત લાવવામાં આવે તેવી પણ માંગ કરવામાં આવી હતી.
આંદોલનકારીઓએ વધુમાં જણાવ્યું હતું કે આરોગ્ય સેવાઓ જેવી મહત્વપૂર્ણ કામગીરી ખાનગી એનજીઓ મારફતે કરાવવાની પ્રથા બંધ કરવામાં આવે અને સરકાર દ્વારા સીધી ભરતી તથા નિયમિત સેવા વ્યવસ્થા અમલમાં મૂકવામાં આવે. આશા વર્કરોનું માનવું છે કે આરોગ્ય સેવાઓમાં તેમની ભૂમિકા અત્યંત મહત્વપૂર્ણ હોવા છતાં તેઓને કર્મચારી તરીકેના મૂળભૂત હકો મળતા નથી.
ધરણા દરમિયાન EPF અને ESI જેવી સામાજિક સુરક્ષા યોજનાઓના લાભો આશા વર્કરોને આપવામાં આવે તેવી પણ માંગ ઉઠાવવામાં આવી હતી. ઉપરાંત નિવૃત્તિ બાદ યોગ્ય પેન્શન યોજના અમલમાં મૂકવામાં આવે અને નિવૃત્તિ સમયે એકમૂશ્ત રૂ. 10 લાખની નિવૃત્તિ સહાય આપવામાં આવે તેવી રજૂઆત કરવામાં આવી હતી.
આશા વર્કર બહેનોએ 'સમાન કામ માટે સમાન મહેનતાણું' ના સિદ્ધાંતનો અમલ કરવાની માંગ પણ કરી હતી. તેમનું કહેવું હતું કે તેઓ આરોગ્ય વિભાગના અન્ય કર્મચારીઓ જેટલી જ જવાબદારી સાથે કામગીરી બજાવે છે, છતાં તેમને સમાન વેતન અને અન્ય લાભોથી વંચિત રાખવામાં આવે છે.
આ ઉપરાંત ફરજ દરમિયાન અકસ્માત કે કુદરતી મૃત્યુની દુર્ભાગ્યપૂર્ણ ઘટના બને તો પરિવારને રૂ. 5 લાખનું વળતર ચૂકવવાની વ્યવસ્થા કરવામાં આવે તેવી માંગ પણ કરવામાં આવી હતી. આશા વર્કરોને ફરજ દરમિયાન વિવિધ વિસ્તારોમાં સતત મુસાફરી કરવી પડતી હોવાથી તેમને મુસાફરી ભથ્થું આપવામાં આવે તેમજ કામગીરી દરમિયાન જરૂરી ગણવેશ ઉપલબ્ધ કરાવવામાં આવે તેવી પણ રજૂઆત કરવામાં આવી હતી.
આંદોલનકારીઓએ સરકારને અપીલ કરી હતી કે આશા કાર્યકરો માટે ફરજનો સમયગાળો સ્પષ્ટપણે નક્કી કરવામાં આવે અને વધારાની કામગીરી માટે યોગ્ય વળતર ચૂકવવામાં આવે. હાલ તેઓ દિવસ-રાત વિવિધ આરોગ્ય અભિયાનો, રસીકરણ, માતા-શિશુ આરોગ્ય, સર્વે, જનજાગૃતિ કાર્યક્રમો અને અન્ય સરકારી કામગીરીમાં જોડાયેલા રહે છે, પરંતુ તેના પ્રમાણમાં તેમને યોગ્ય માનદવેતન અને સુવિધાઓ મળતી નથી.
લાલ બંગલા સર્કલ ખાતે ધરણા કાર્યક્રમ દરમિયાન આશા વર્કર બહેનોએ સરકાર સામે પોતાની માંગણીઓને લઈને સૂત્રોચ્ચાર કર્યા હતા અને વહેલી તકે યોગ્ય નિર્ણય લેવામાં આવે તેવી માંગ કરી હતી. મોટી સંખ્યામાં જોડાયેલી આશા વર્કર બહેનોએ જણાવ્યું હતું કે જો તેમની માંગણીઓનું વહેલી તકે નિરાકરણ નહીં આવે તો આગામી દિવસોમાં આંદોલન વધુ ઉગ્ર બનાવવામાં આવશે.
ધરણા કાર્યક્રમ પૂર્ણ થયા બાદ આશા વર્કર બહેનોના પ્રતિનિધિમંડળે જિલ્લા કલેક્ટર કચેરી ખાતે પહોંચીને પોતાની તમામ માંગણીઓ આવરી લેતું આવેદનપત્ર જિલ્લા વહીવટી તંત્રને સોંપ્યું હતું. આવેદનપત્રમાં સરકારને આશા વર્કરોના હિતમાં તાત્કાલિક નિર્ણય લઈને વર્ષોથી પડતર રહેલી માંગણીઓનો હકારાત્મક ઉકેલ લાવવાની માંગ કરવામાં આવી હતી.
આંદોલનકારીઓએ જણાવ્યું હતું કે કોરોના મહામારી સહિત અનેક આરોગ્ય સંકટ દરમિયાન આશા વર્કરોએ પોતાના જીવના જોખમે લોકો સુધી આરોગ્ય સેવાઓ પહોંચાડવામાં મહત્વપૂર્ણ યોગદાન આપ્યું હતું. તેથી હવે તેમના પરિશ્રમને યોગ્ય માન્યતા આપતા સરકાર તેમની વાજબી માંગણીઓ સ્વીકારી યોગ્ય નિર્ણય લેશે તેવી આશા વ્યક્ત કરવામાં આવી હતી.
