ક્રાઇમ જામનગરમાં “સાયચા ગેંગ” સામે GUJCTOC હેઠળ કડક કાર્યવાહી ખૂનથી ખંડણી સુધીના ૭૪ ગુનાઓમાં સંડોવાયેલી સંગઠિત ટોળકી સામે પોલીસનો મોટો પ્રહાર.

જામનગર શહેર અને જિલ્લામાં વર્ષોથી આતંક સમાન માહોલ ઉભો કરીને સંગઠિત ગુનાખોરી ચલાવતી કહેવાતી “સાયચા ગેંગ” સામે પોલીસ દ્વારા અત્યાર સુધીની સૌથી મોટી અને કડક કાર્યવાહી હાથ ધરવામાં આવી છે. રાજકોટ વિભાગના નાયબ પોલીસ મહાનિરીક્ષક નિર્લિપ્ત રાય ની સૂચના અને જામનગર જિલ્લાના પોલીસ અધિક્ષક ડો. રવિ મોહન સૈની ના માર્ગદર્શન હેઠળ જામનગર પોલીસ દ્વારા સંગઠિત ગુનાખોરી સામે વિશેષ અભિયાન શરૂ કરવામાં આવ્યું હતું. આ અભિયાન અંતર્ગત શહેરમાં લાંબા સમયથી સંગઠિત રીતે ગુનાઓ આચરતી “સાયચા ગેંગ” સામે ગુજરાત આંતકવાદ અને સંગઠિત ગુના નિયંત્રણ અધિનિયમ એટલે કે GUJCTOC ACT-2015 હેઠળ ગંભીર ગુનો નોંધવામાં આવ્યો છે. પોલીસે અત્યાર સુધીમાં ગેંગ સાથે સંકળાયેલા છ આરોપીઓને ઝડપી પાડ્યા છે, જ્યારે અન્ય આરોપીઓ સામે પણ કાયદેસરની કાર્યવાહી આગળ વધારવામાં આવી રહી છે.

પોલીસ સૂત્રોના જણાવ્યા મુજબ એજાજ ઉમર સાયચા અને રજાક નુરમામદ સાયચા નામના શખ્સોએ પોતાના સાગરીતો સાથે મળીને વર્ષોથી જામનગર શહેર અને આસપાસના વિસ્તારોમાં સંગઠિત ગુનાખોરીનું નેટવર્ક ઉભું કર્યું હતું. પોલીસના દાવા મુજબ આ ટોળકી માત્ર સામાન્ય મારામારી કે ધાકધમકી પૂરતી મર્યાદિત નહોતી, પરંતુ ખુન, ખુનની કોશિશ, અપહરણ, ખંડણી, ગેરકાયદેસર વસૂલી, ફાયરિંગ, હથિયારબંધ હુમલા, વ્યાજખોરી, જમીન કબજા, આત્મહત્યા માટે દુષ્પ્રેરણ, દારૂબંધીના ગુનાઓ, જુગારધારા, જાહેરનામા ભંગ અને અસામાજિક તત્વો દ્વારા શહેરમાં ભયનું વાતાવરણ ઉભું કરવાના અનેક ગંભીર ગુનાઓમાં સંડોવાયેલી હોવાનું સામે આવ્યું છે.

પોલીસ દ્વારા આપવામાં આવેલી માહિતી મુજબ જામનગર શહેર વિભાગના નાયબ પોલીસ અધિક્ષક જયવીરસિંહ ઝાલા, એલ.સી.બી. પોલીસ ઇન્સપેક્ટર વી.બી. ચૌધરી, પોલીસ સબ ઇન્સપેક્ટર એમ.વી. ભાટીયા તેમજ સીટી બી ડિવિઝન પોલીસ સ્ટેશનના પોલીસ ઇન્સપેક્ટર એન.એમ. ગઢવી ના નેતૃત્વ હેઠળ એલ.સી.બી., એસ.ઓ.જી., પેરોલ-ફર્લો સ્ક્વોડ અને સીટી બી ડિવિઝનની ખાસ ટીમ દ્વારા લાંબા સમયથી આ ગેંગની ગતિવિધિઓ પર ગુપ્ત નજર રાખવામાં આવી રહી હતી. વિવિધ ગુનાઓના રેકોર્ડ, ગુપ્ત બાતમીઓ, સાક્ષીઓના નિવેદનો અને ટેક્નિકલ સર્વેલન્સના આધારે આખી ટોળકી સામે મજબૂત પુરાવા એકત્રિત કર્યા બાદ GUJCTOC હેઠળ કાર્યવાહી હાથ ધરવામાં આવી હતી.

જામનગર સીટી બી ડિવિઝન પોલીસ સ્ટેશનમાં ગુનો નંબર ૧૧૨૦૨૦૦૯૨૬૧૦૩૮/૨૦૨૬ મુજબ GUJCTOC ACT-2015 ની કલમ 3(1)(ii), 3(2), 3(4) અને 3(5) હેઠળ ગંભીર ગુનો નોંધવામાં આવ્યો છે. પોલીસનું કહેવું છે કે આ ટોળકી વર્ષોથી સંગઠિત રીતે ગુનાઓ આચરી રહી હતી અને સામાન્ય નાગરિકોમાં ભય અને ત્રાસનું વાતાવરણ ઉભું કરીને પોતાની દાદાગીરી ચલાવતી હતી. પોલીસના મતે ગેંગના સભ્યો સીધા અથવા પરોક્ષ રીતે વિવિધ ગુનાહિત પ્રવૃત્તિઓમાં સામેલ રહ્યા છે અને શહેરમાં ગેરકાયદેસર પ્રભાવ ઉભો કરવાનો પ્રયાસ કરતા હતા.

હાલ પોલીસે છ આરોપીઓને ઝડપી પાડ્યા છે, જેમાં ગુલામ જુસબભાઈ સાયચા, મહેબુબ જુસબભાઈ સાયચા, અસગર જુસબભાઈ સાયચા, હનીફ નુરમામદભાઈ સાયચા, ઇમ્તિયાઝ નુરમામદભાઈ સાયચા અને રજાક દાઉદભાઈ ચાવડા ઉર્ફે “રજાક સોપારી”નો સમાવેશ થાય છે. આ તમામ આરોપીઓ જામનગરના બેડી વિસ્તાર અને ગરીબનગર પાણાખાણા વિસ્તારમાં રહેતા હોવાનું પોલીસ દ્વારા જણાવાયું છે. બીજી તરફ બસીર જુસબભાઈ સાયચા, સિકંદર નુરમામદભાઈ સાયચા, ઇમરાન નુરમામદભાઈ સાયચા અને રજાક નુરમામદભાઈ સાયચા હાલ જેલમાં હોવાનું સામે આવ્યું છે, જ્યારે એજાજ ઉમરભાઈ સાયચા હજુ ફરાર હોવાનું પોલીસ દ્વારા જણાવાયું છે.

પોલીસના જણાવ્યા મુજબ “સાયચા ગેંગ” સામે કુલ ૭૪ જેટલા ગુનાઓ અલગ અલગ પોલીસ સ્ટેશનોમાં નોંધાયેલા છે. આ ગુનાઓમાં આર્મ્સ એક્ટ, હત્યા, હત્યાનો પ્રયાસ, ખંડણી, અપહરણ, જુગારધારા, દારૂબંધી, લેન્ડ ગ્રેબિંગ, જાહેરમાં મારામારી, ગેરકાયદેસર વસૂલી અને ફાયરિંગ જેવા ગંભીર ગુનાઓનો સમાવેશ થાય છે. કેટલાક કેસોમાં આરોપીઓ સામે IPC ની કલમ 302, 307, 386, 364, 120-B જેવી ગંભીર કલમો લાગુ કરવામાં આવી હતી. પોલીસના જણાવ્યા મુજબ ગેંગના સભ્યો માત્ર જામનગર પૂરતા મર્યાદિત નહોતા, પરંતુ રાજકોટ, અમદાવાદ, કચ્છ અને અન્ય વિસ્તારોમાં પણ ગુનાખોરી સાથે જોડાયેલા કેસોમાં નામચીન રહ્યા છે.

શહેરના કાનૂની નિષ્ણાતોના મતે GUJCTOC હેઠળ કાર્યવાહી થવી એ ખૂબ જ ગંભીર બાબત ગણાય છે. સામાન્ય રીતે આવી કલમોનો ઉપયોગ સંગઠિત ગુનાખોરી, માફિયા નેટવર્ક અને સતત ગુનાખોરી ચલાવતી ટોળકીઓ સામે કરવામાં આવે છે. આ કાયદા હેઠળ આરોપીઓ સામે તપાસ વધુ કડક રીતે થાય છે અને પુરાવા આધારે તેમની મિલ્કતો પણ જપ્ત કરવાની કાર્યવાહી થઈ શકે છે. જામનગરમાં આ પ્રકારની કાર્યવાહીથી સ્પષ્ટ થાય છે કે પોલીસ હવે સંગઠિત ગુનાખોરી સામે ઝીરો ટોલરન્સની નીતિ અપનાવી રહી છે.

પોલીસે સ્પષ્ટ કર્યું છે કે ગેંગના સભ્યો દ્વારા ગેરકાયદેસર પ્રવૃત્તિઓથી કમાયેલી મિલ્કતોની પણ તપાસ શરૂ કરવામાં આવશે. આરોપીઓએ સ્થાવર અને જંગમ મિલ્કતો કેવી રીતે વસાવી, તે અંગે વેરિફિકેશન હાથ ધરાશે અને જો ગેરકાયદેસર આવકથી મિલ્કતો ખરીદવામાં આવી હોવાનું સામે આવશે તો તે મિલ્કતો ટાંચમાં લેવા માટેની કાર્યવાહી પણ કરવામાં આવશે. પોલીસના જણાવ્યા મુજબ આ સમગ્ર કેસમાં હજુ વધુ આરોપીઓની સંડોવણી સામે આવી શકે છે અને જે કોઈ વ્યક્તિ સીધી કે પરોક્ષ રીતે ગેંગ સાથે જોડાયેલી હશે તેના વિરુદ્ધ પણ કાયદેસરની કાર્યવાહી કરવામાં આવશે.

શહેરમાં આ કાર્યવાહી બાદ ભારે ચર્ચા શરૂ થઈ ગઈ છે. ઘણા નાગરિકોનું માનવું છે કે લાંબા સમયથી કેટલાક અસામાજિક તત્વો શહેરમાં ભયનો માહોલ ઉભો કરી રહ્યા હતા અને સામાન્ય લોકો ખુલ્લેઆમ ફરિયાદ કરતાં પણ ડરતા હતા. હવે GUJCTOC જેવી કડક કાર્યવાહી થતા લોકોમાં રાહતની લાગણી જોવા મળી રહી છે. કેટલાક વેપારીઓએ જણાવ્યું હતું કે ખંડણી, ધમકી અને દાદાગીરી જેવી પ્રવૃત્તિઓના કારણે ઘણા લોકો માનસિક તણાવમાં જીવતા હતા. પોલીસની આ કાર્યવાહીથી અસામાજિક તત્વોમાં ડર ફેલાશે તેવી આશા વ્યક્ત કરવામાં આવી રહી છે.

સામાજિક આગેવાનોનું પણ માનવું છે કે શહેરના વિકાસ અને શાંતિ માટે સંગઠિત ગુનાખોરી સામે કડક કાર્યવાહી અત્યંત જરૂરી છે. જામનગર એક ઔદ્યોગિક અને વેપારી શહેર તરીકે ઝડપથી આગળ વધી રહ્યું છે અને આવા સમયમાં ગેંગવોર, ખંડણી અને હિંસક પ્રવૃત્તિઓ શહેરની છબીને નુકસાન પહોંચાડી શકે છે. તેથી પોલીસ દ્વારા હાથ ધરાયેલી કાર્યવાહી શહેરના ભવિષ્ય માટે મહત્વપૂર્ણ ગણાઈ રહી છે.

પોલીસ સૂત્રોના જણાવ્યા મુજબ ગેંગના સભ્યો સામેના ઘણા ગુનાઓ વર્ષો જૂના છે અને સમયાંતરે અલગ અલગ પ્રકારની ગુનાખોરીમાં તેઓના નામ સામે આવતા રહ્યા હતા. કેટલીક ફરિયાદોમાં ગેરકાયદેસર રીતે વ્યાજ વસૂલવું, લોકોની જમીન પર કબજો જમાવવો અને દાદાગીરીથી પૈસા ઉઘરાવવાના આરોપો પણ સામેલ છે. પોલીસ હવે જૂના કેસોની પણ સમીક્ષા કરી રહી છે અને જરૂર પડશે ત્યાં વધુ કડક કલમો ઉમેરવાની પ્રક્રિયા હાથ ધરવામાં આવી શકે છે.

જામનગર પોલીસ દ્વારા આગામી દિવસોમાં વધુ દરોડા, પૂછપરછ અને તપાસ હાથ ધરવામાં આવશે તેવી શક્યતા વ્યક્ત કરવામાં આવી રહી છે. ફરાર આરોપીઓને ઝડપી પાડવા માટે અલગ અલગ ટીમો બનાવવામાં આવી છે. પોલીસ ટેક્નિકલ સર્વેલન્સ, મોબાઈલ લોકેશન અને ગુપ્ત બાતમીદારોની મદદથી ગેંગના અન્ય સભ્યો સુધી પહોંચવાનો પ્રયાસ કરી રહી છે. પોલીસનું કહેવું છે કે શહેરમાં કાયદો અને વ્યવસ્થા જાળવવા માટે આવી કાર્યવાહી સતત ચાલુ રહેશે.

આ સમગ્ર બનાવે જામનગર શહેરમાં સંગઠિત ગુનાખોરીના જાળાને લઈને લોકોમાં ચિંતા પણ ઉભી કરી છે. ઘણા લોકોનું માનવું છે કે વર્ષોથી ચાલતી આવી પ્રવૃત્તિઓ સામે જો સમયસર કડક કાર્યવાહી થાય તો સામાન્ય નાગરિકોમાં સુરક્ષાની લાગણી વધુ મજબૂત બની શકે. પોલીસની આ કાર્યવાહી માત્ર એક ગેંગ સામેનો કેસ નથી, પરંતુ શહેરમાં ગુનાખોરીના નેટવર્ક સામેનો મોટો સંદેશ માનવામાં આવી રહ્યો છે કે હવે કાયદાથી ઉપર કોઈ નથી.

જામનગર પોલીસ દ્વારા હાથ ધરાયેલી આ કાર્યવાહી હાલ સમગ્ર રાજ્યમાં ચર્ચાનો વિષય બની છે. GUJCTOC જેવા કડક કાયદા હેઠળ કેસ નોંધાતા હવે આરોપીઓ માટે કાનૂની લડત પણ વધુ મુશ્કેલ બનશે. શહેરના લોકોમાં એવી અપેક્ષા વ્યક્ત થઈ રહી છે કે પોલીસ આગામી દિવસોમાં પણ સંગઠિત ગુનાખોરી સામે આવી જ આક્રમક કાર્યવાહી ચાલુ રાખશે જેથી જામનગરમાં શાંતિ, સુરક્ષા અને કાયદાનું શાસન વધુ મજબૂત બની શકે