હવામાન ભારે વરસાદ વચ્ચે ડાંગમાં સતર્કતા: મહાલની એકલવ્ય શાળાના 311 વિદ્યાર્થીઓનું સુરક્ષિત સ્થળાંતર.
ડાંગ જિલ્લામાં સતત વરસી રહેલા ભારે વરસાદને પગલે જિલ્લા વહીવટી તંત્ર સંપૂર્ણ સતર્ક બન્યું છે. સુબીર તાલુકાના અંતરિયાળ મહાલ ગામમાં આવેલી એકલવ્ય મોડેલ રેસિડેન્શિયલ સ્કૂલના પ્રાંગણમાં વરસાદી પાણી ભરાઈ જતાં અગમચેતીના ભાગરૂપે 311 વિદ્યાર્થીઓનું સુરક્ષિત સ્થળાંતર કરવામાં આવ્યું છે. વિદ્યાર્થીઓની સલામતીને સર્વોચ્ચ પ્રાથમિકતા આપીને તેમને નજીકની માધ્યમિક શાળામાં સહીસલામત ખસેડવામાં આવ્યા હતા.
વનાચ્છાદિત ડાંગ જિલ્લામાં શુક્રવારથી જ સાર્વત્રિક વરસાદ વરસી રહ્યો છે. જિલ્લામાં સૌથી વધુ વરસાદ સુબીર તાલુકામાં નોંધાયો છે, જેના કારણે નીચાણવાળા વિસ્તારોમાં પાણી ભરાવાની સ્થિતિ સર્જાઈ છે. મહાલ ગામની એકલવ્ય શાળાના કેમ્પસમાં પણ વરસાદી પાણી ભરાઈ જતાં હવામાન વિભાગની ભારે વરસાદની આગાહીને ધ્યાનમાં રાખીને જિલ્લા વહીવટી તંત્રે તાત્કાલિક નિર્ણય લીધો હતો.
સ્થળાંતરની કામગીરીમાં સુબીર મામલતદાર, સુબીર પોલીસ સ્ટેશનના પી.આઈ. અને તેમની ટીમ, શાળાના શિક્ષકો તેમજ સ્થાનિક ગ્રામજનોએ સંયુક્ત રીતે કામગીરી કરી હતી. તમામ 311 વિદ્યાર્થીઓને સલામત રીતે નજીકની માધ્યમિક શાળામાં ખસેડવામાં આવ્યા હતા. સાથે જ વિદ્યાર્થીઓ માટે રહેવાની, ભોજનની અને અન્ય જરૂરી સુવિધાઓની પણ યોગ્ય વ્યવસ્થા કરવામાં આવી છે, જેથી તેમને કોઈ મુશ્કેલીનો સામનો ન કરવો પડે.
ડાંગ જિલ્લા કલેક્ટર શ્રી એન.ડી. પરમાર સમગ્ર પરિસ્થિતિ પર સતત નજર રાખી રહ્યા છે અને સંબંધિત વિભાગોને જરૂરી માર્ગદર્શન આપી રહ્યા છે. સંભવિત આપત્તિની સ્થિતિને પહોંચી વળવા જિલ્લા તંત્ર દ્વારા તમામ લાઈન વિભાગોના અધિકારીઓ અને કર્મચારીઓને મુખ્ય મથક (હેડક્વાર્ટર) ન છોડવાની સૂચના આપવામાં આવી છે, જેથી જરૂરિયાત સમયે તાત્કાલિક રાહત અને બચાવ કામગીરી હાથ ધરી શકાય.
જિલ્લા વહીવટી તંત્રે નાગરિકોને પણ સાવચેત રહેવા અને બિનજરૂરી મુસાફરી ટાળવા અપીલ કરી છે. કોઈપણ અનિચ્છનીય બનાવ, આપત્તિ અથવા તાત્કાલિક મદદની જરૂર પડે તો નાગરિકો ડાંગ જિલ્લા કંટ્રોલ રૂમ નંબર 02631-220347, વૈકલ્પિક નંબર 6355820252 અથવા ટોલ-ફ્રી હેલ્પલાઇન 1077 પર સંપર્ક કરી શકે છે. ભારે વરસાદ વચ્ચે વિદ્યાર્થીઓની સુરક્ષા માટે જિલ્લા તંત્ર દ્વારા લેવામાં આવેલા આ સમયસરના પગલાંને મહત્વપૂર્ણ અને પ્રશંસનીય માનવામાં આવી રહ્યા છે.
