જાહેરાત
તાજા સમાચાર
અમદાવાદમાં અમિત શાહના હસ્તે ₹1,400 કરોડથી વધુના 30 વિકાસ પ્રકલ્પોનું લોકાર્પણ અને ખાતમુહૂર્ત: 9 હજારથી વધુ પરિવારોને મળશે પાકા મકાનો. | સુરતમાં નાયબ મુખ્યમંત્રી હર્ષ સંઘવીની ઉપસ્થિતિમાં દીપાવલી અને વિક્રમ સંવત ૨૦૮૩ના નૂતન વર્ષનો સ્નેહમિલન સમારોહ યોજાયો. | દિવાળી બાદ અમદાવાદમાં વાયુ પ્રદૂષણનો પ્રકોપ: 17 વિસ્તારોમાં AQI 200ને પાર, થલતેજ સૌથી વધુ પ્રદૂષિત. | કાળી ચૌદશે દેવભૂમિ દ્વારકાના કજુરડા-વિજયનગરના સ્મશાનમાં યોજાયો ‘જ્યોત જલાવો, ભૂત ભગાવો’ કાર્યક્રમ. | ભાણવડના શિવ બળદ આશ્રમમાં અનોખી દિવાળીની ઉજવણી: દાતાઓના સહયોગથી અશક્ત અને નિરાધાર બળદોને પૌષ્ટિક ખોળ ખવડાવી જીવદયાનો સંદેશ. | ગુજરાતમાં ભ્રષ્ટાચારનો ચોંકાવનારો ચહેરો: એક વર્ષમાં 152 સરકારી કર્મચારીઓ લાંચ લેતા ઝડપાયા, રૂ. 13 કરોડની લાંચનો ખુલાસો. | મીની મથુરા માધવપુર ઘેડમાં ભાઈબીજના પર્વે ઉમટશે શ્રદ્ધાળુઓનો મહેરામણ. | મીની મથુરા માધવપુર ઘેડમાં ભાઈબીજના પર્વે ઉમટશે શ્રદ્ધાળુઓનો મહેરામણ. | માધવપુર SBI બેંકમાં નવી ચલણી નોટોની અછતથી ગ્રાહકોમાં નારાજગી: દિવાળીના તહેવારમાં નવી નોટો માટે લોકોની માંગ તેજ. | ગીરના જંગલમાં વધુ 100 જીપ્સી ઉમેરવાની કવાયત સામે વિરોધ: વન્યજીવોની સુરક્ષા અને પર્યાવરણ પર વધતા પ્રવાસન ભારણ અંગે ચિંતા. |
પાછા મુખ્ય સમાચાર પર
ક્રાઇમ ૧૨૯ વાર જોવાયેલ • 4 મહિના પેહલા

ક્રાઇમ જામનગરમાં મહિલાના મકાનમાં ચાલતા જુગારધામ પર એલસીબીનો દરોડો, પાંચ મહિલા સહિત આઠ જુગારીઓ ઝડપાયા.

જામનગરમાં મહિલાના મકાનમાં ચાલતા જુગારધામ પર એલસીબીનો દરોડો, પાંચ મહિલા સહિત આઠ જુગારીઓ ઝડપાયા.

જામનગર શહેરમાં જુગારની પ્રવૃત્તિઓ સામે લોકલ ક્રાઇમ બ્રાન્ચ (એલસીબી)એ મોટી કાર્યવાહી હાથ ધરી છે. રાજપાર્ક નજીક આવેલા એક રહેણાંક મકાનમાં ચાલી રહેલા જુગારધામ પર દરોડો પાડી પાંચ મહિલા સહિત કુલ આઠ જુગારિયાઓને ઝડપી પાડવામાં આવ્યા છે. પોલીસે સ્થળ પરથી રોકડ રકમ, મોબાઇલ ફોન અને વાહનો સહિત કુલ રૂ. 1.88 લાખનો મુદ્દામાલ કબજે કર્યો છે.

પ્રાપ્ત માહિતી મુજબ, જામનગર શહેરના રાજપાર્ક વિસ્તાર નજીક રંગમતી પાર્ક શેરી નં. 2માં સાઈ કૃપા પ્રોવિઝન સ્ટોરની બાજુમાં આવેલા મકાનમાં સરોજબેન અશ્વિનભાઈ પ્રેમશંકરભાઈ પંડ્યા દ્વારા બહારથી સ્ત્રી-પુરુષોને બોલાવી ગંજીપાનાના પત્તા વડે જુગાર રમાડવામાં આવતો હોવાની ચોક્કસ બાતમી એલસીબીને મળી હતી.

બાતમીની ખરાઈ કર્યા બાદ એલસીબીની ટીમે કોર્ટમાંથી વોરંટ મેળવી ગઈકાલે મોડી સાંજે સ્થળ પર દરોડો પાડ્યો હતો. દરોડા દરમિયાન મકાનની અંદર ગંજીપાનાના પત્તા વડે જુગાર રમાઈ રહ્યો હોવાનું સામે આવ્યું હતું.

પોલીસે સ્થળ પરથી મકાન માલિક સરોજબેન અશ્વિનભાઈ પ્રેમશંકરભાઈ પંડ્યા સહિત ભરત કરમશીભાઈ ચોપડા, ક્રિપાલસિંહ પ્રકાશસિંહ જાડેજા, જયરાજસિંહ વનરાજસિંહ ગોહિલ, નલીનીબેન બાબુભાઈ કોટડીયા, આશાબેન કેસુભાઈ મોઢવાડિયા, આનંદબા રાજેન્દ્રસિંહ ઝાલા અને સતીબેન હરીશભાઈ ચાવડા સહિત કુલ આઠ સ્ત્રી-પુરુષોની અટકાયત કરી હતી.

દરોડા દરમિયાન પોલીસે જુગારના અડ્ડા પરથી રૂ. 72,500ની રોકડ રકમ, આઠ મોબાઇલ ફોન, બે મોટરસાયકલ તેમજ અન્ય સામગ્રી મળી કુલ રૂ. 1,88,000નો મુદ્દામાલ કબજે કર્યો હતો.

આ સમગ્ર મામલે તમામ આરોપીઓ સામે જામનગરના સિટી "બી" ડિવિઝન પોલીસ મથકે ગુજરાત જુગારધારા હેઠળ ગુનો નોંધવામાં આવ્યો છે. પોલીસે જુગારધામ કેટલા સમયથી ચાલી રહ્યું હતું અને તેમાં અન્ય લોકોની સંડોવણી છે કે નહીં તે અંગે વધુ તપાસ શરૂ કરી છે.

જામજોધપુરમાં પણ જાહેર જુગાર રમતા શખ્સો ઝડપાયા

બીજી તરફ જામજોધપુર પોલીસ દ્વારા પણ જાહેરમાં જુગાર રમતા શખ્સો સામે કાર્યવાહી હાથ ધરવામાં આવી હતી. જામજોધપુરના આંબેડકર ચોક વિસ્તારમાં કેટલાક લોકો જાહેરમાં ગંજીપાનાના પત્તા વડે "રોન પોલીસ" નામનો જુગાર રમી રહ્યા હોવાની માહિતી મળતાં પોલીસે દરોડો પાડ્યો હતો.

કાર્યવાહી દરમિયાન ઈશાભાઈ ઓસમાણભાઈ રાવકડા અને અસલમભાઈ અહમદભાઈ સમા સહિતના શખ્સોની અટકાયત કરવામાં આવી હતી. જ્યારે મોહમ્મદ મુસાભાઈ કટારિયા નામનો એક આરોપી પોલીસને ચકમો આપી ફરાર થઈ ગયો હતો.

પોલીસે સ્થળ પરથી રૂ. 1,530ની રોકડ રકમ તેમજ જુગાર રમવા માટે વપરાતું સાહિત્ય કબજે કરી કાયદેસરની કાર્યવાહી હાથ ધરી છે.

જામનગર જિલ્લા પોલીસ દ્વારા જુગાર, દારૂ અને અન્ય ગેરકાયદે પ્રવૃત્તિઓ સામે સતત કાર્યવાહી કરવામાં આવી રહી છે. તાજેતરની આ કાર્યવાહીના કારણે આવા ધંધા સાથે સંકળાયેલા તત્વોમાં ફફડાટ વ્યાપી ગયો હોવાનું માનવામાં આવે છે. પોલીસે જણાવ્યું છે કે જિલ્લામાં ગેરકાયદે પ્રવૃત્તિઓ સામેનું અભિયાન આગામી દિવસોમાં પણ વધુ સઘન બનાવવામાં આવશે.

આ સમાચાર શેર કરો:
સમય સંદેશ મેનુ