ક્રાઇમ સિક્કામાં ત્રિપલ તલાકનો આરોપ: પરણિત મહિલાની ફરિયાદ બાદ પતિ સામે ગુનો નોંધાયો.

જામનગર જિલ્લાના સિક્કા પોલીસ મથકમાં એક પરિણીત મુસ્લિમ મહિલાની ફરિયાદના આધારે પતિ સામે મુસ્લિમ મહિલા (લગ્ન અધિકારોનું સંરક્ષણ) અધિનિયમ, 2019ની કલમ-4 હેઠળ ગુનો નોંધવામાં આવ્યો છે. ફરિયાદમાં પતિએ જાહેરમાં ત્રણ વખત "તલાક" ઉચ્ચારી ત્રિપલ તલાક આપ્યાનો તેમજ લાંબા સમયથી શારીરિક અને માનસિક ત્રાસ ગુજાર્યાનો ગંભીર આક્ષેપ કરવામાં આવ્યો છે. પોલીસે ફરિયાદના આધારે ગુનો નોંધી સમગ્ર મામલે વધુ તપાસ શરૂ કરી છે.

ફરિયાદ મુજબ, સિક્કા ખાતે રહેતી હીનાબેનના લગ્ન વર્ષ 2020માં સલાયાના રહેવાસી હસન હમીદ ભાયા સાથે મુસ્લિમ રીતિ-રિવાજ મુજબ થયા હતા. લગ્નના શરૂઆતના લગભગ ત્રણ વર્ષ સુધી દામ્પત્ય જીવન સુખમય રહ્યું હતું. જોકે ત્યારબાદ પતિના સ્વભાવમાં બદલાવ આવવા લાગ્યો હતો. ફરિયાદી મહિલાના જણાવ્યા મુજબ, પતિ નાની-નાની બાબતે ઝઘડા કરતો, અપશબ્દો બોલતો, મારપીટ કરતો તેમજ સતત શારીરિક અને માનસિક ત્રાસ આપતો હતો.

ફરિયાદમાં વધુમાં જણાવાયું છે કે બીજી પુત્રીના જન્મ બાદ પતિનું વર્તન વધુ બદલાઈ ગયું હતું. મહિલાના આક્ષેપ મુજબ, પતિને પડોશમાં રહેતી એક યુવતી સાથે પ્રેમસંબંધ બંધાયો હતો અને તેની સાથે લગ્ન કરવાની ઈચ્છાને કારણે પત્ની પ્રત્યેનો ત્રાસ વધારી દેવામાં આવ્યો હતો. બાદમાં પતિ ઘર છોડીને ચાલ્યો ગયો હતો અને ત્યારપછી તે બીજી મહિલા સાથે રહેતો હોવાની માહિતી ફરિયાદીને મળી હતી.

ફરિયાદી મહિલા છેલ્લા ચાર મહિનાથી પોતાની બે પુત્રીઓ સાથે પિયર સિક્કા ખાતે રહે છે. પરિવારના વડીલો અને બંને પક્ષના સગા-સંબંધીઓ દ્વારા અનેક વખત સમાધાનના પ્રયાસો પણ કરવામાં આવ્યા હતા. આ દરમિયાન અરજીના અનુસંધાને બંને પક્ષોને સિક્કા પોલીસ મથકે બોલાવવામાં આવ્યા હતા. ફરિયાદ મુજબ, પોલીસ મથકની બહાર જ પતિએ પોતાની બીજી યુવતી સાથે લગ્ન કરી લીધા હોવાનું જણાવ્યું હતું અને ત્યારબાદ પત્નીને જાહેરમાં સતત ત્રણ વખત "તલાક" શબ્દ ઉચ્ચારી ત્રિપલ તલાક આપી દીધાનો આક્ષેપ કરવામાં આવ્યો છે.

મહિલાએ જણાવ્યું છે કે શરૂઆતમાં સમાજના આગેવાનો અને પરિવારજનોની મદદથી સમાધાન થઈ જશે તેવી આશા હોવાથી તેણે તાત્કાલિક પોલીસ ફરિયાદ નોંધાવી નહોતી. પરંતુ સમય જતાં કોઈ સમાધાન ન થતાં અને સાસરીયા પક્ષ તરફથી પોતાની તેમજ બે પુત્રીઓની કોઈ આર્થિક કે સામાજિક જવાબદારી સ્વીકારવામાં ન આવતાં આખરે કાયદાકીય કાર્યવાહીનો માર્ગ અપનાવ્યો હતો.

આ ફરિયાદના આધારે સિક્કા પોલીસે પતિ સામે મુસ્લિમ મહિલા (લગ્ન અધિકારોનું સંરક્ષણ) અધિનિયમ, 2019ની જોગવાઈઓ હેઠળ ગુનો નોંધી તપાસ શરૂ કરી છે. તપાસ દરમિયાન બંને પક્ષોના નિવેદનો, ઉપલબ્ધ પુરાવાઓ અને અન્ય સંબંધિત માહિતીના આધારે આગળની કાયદેસરની કાર્યવાહી હાથ ધરવામાં આવશે. પોલીસે જણાવ્યું છે કે તપાસ પૂર્ણ થયા બાદ પુરાવાના આધારે જરૂરી કાર્યવાહી કરવામાં આવશે.

નોંધનીય છે કે મુસ્લિમ મહિલા (લગ્ન અધિકારોનું સંરક્ષણ) અધિનિયમ, 2019 હેઠળ તાત્કાલિક ત્રિપલ તલાક (એક જ સમયે ત્રણ વખત "તલાક" ઉચ્ચારી લગ્ન સમાપ્ત કરવાનો પ્રયાસ) ગેરકાયદેસર અને દંડનીય ગુનો ગણવામાં આવે છે. આ કાયદાનો મુખ્ય હેતુ મુસ્લિમ મહિલાઓના લગ્નસંબંધિત અધિકારોનું રક્ષણ કરવો અને આવા કૃત્યો સામે કાનૂની સુરક્ષા પૂરી પાડવાનો છે. હાલમાં સિક્કા પોલીસ સમગ્ર ઘટનાની તમામ દિશામાં તપાસ કરી રહી છે.